وڭتۇستىك كورەيانىڭ بۇرىنعى پرەزيدەنتى رەزيدەنسيادان اپتانىڭ سوڭىنا دەيىن كەتەدى

استانا. KAZINFORM - كورەيا رەسپۋبليكاسىنىڭ بۇرىنعى پرەزيدەنتى يۋن سوك يەل سەۋلدىڭ وڭتۇستىك بولىگىندەگى ۇيىنە ورالادى، دەپ حابارلايدى Yonhap اقپارات اگەنتتىگى.

ەسكە سالا كەتسەك، وتكەن اپتادا وڭتۇستىك كورەيانىڭ كونستيتۋتسيالىق سوتى پرەزيدەنت يۋن سوك يەلعا يمپيچمەنت جاريالاۋدى قولدادى. وسىلايشا، ول اقىرى قىزمەتىنەن بوساتىلدى.

- يۋن اپتانىڭ سوڭىنا دەيىن رەزيدەنسيادان كەتەدى دەپ كۇتىلىپ وتىر، - دەدى پرەزيدەنت اكىمشىلىگىنىڭ وكىلى.

ول بۇل جۇما مەن جەكسەنبى اراسىندا بولاتىنىن قوسىپ ءوتتى.

پرەزيدەنتتىڭ قاۋىپسىزدىك قىزمەتى بۇرىنعى ونىڭ ۇيىندە قاۋىپسىزدىكتى قامتاماسىز ەتۋ ءۇشىن 40-قا جۋىق ادامنان تۇراتىن توپ قۇرىپ ۇلگەرگەنى حابارلاندى.

يۋن سوك يەلدىڭ ءۇيى سەۋلدىڭ وڭتۇستىگىندەگى تۇرعىن كەشەنىندە ورنالاسقان. ول بۇعان دەيىن 2022 -جىلدىڭ مامىرىندا يناۋگۋراتسياسىنان كەيىن دە 6 اي بويى سوندا تۇرعان.

يۋن سوك يەل مەن ونىڭ زايىبى كيم كون حي باسقا جەرگە كوشۋدى ويلاستىرىپ جاتىر. ويتكەنى ولاردىڭ 11 ءۇي جانۋارى - ءيت پەن مىسىقتارى بار، ال كۇزەتشىلەردىڭ بولۋى كورشىلەرىنە ءبىراز قولايسىزدىق تۋدىرۋى مۇمكىن.

- ەرلى-زايىپتىلاردىڭ ءتورت بولمەلى پاتەرى بار، دەپ جازدى The Korean Herald.

ولاردىڭ ءۇيى 37 قاباتتى عيماراتتا، 757 تۇرعىن جانە كوممەرتسيالىق بلوكتان تۇراتىن كەشەننىڭ ءبىر بولىگىندە ورنالاسقان جانە اۋدانى 164 شارشى مەتردى قۇرايدى. پرەزيدەنتتىك رەزيدەنسياعا كوشكەنگە دەيىن بالالارى جوق ەرلى-زايىپتىلار وندا جەتى ءۇي جانۋارى - ءتورت ءيت جانە ءۇش مىسىقپەن تۇرعان.

اۆتور

زارينا تۋعانبايەۆا