وڭتۇستىك كورەيادا زاڭسىز جۇرگەن قازاقستان ازاماتتارى قايتارىلادى - مينيسترلىك

استانا. KAZINFORM - وڭتۇستىك كورەيادا 15 مىڭ قازاقستان ازاماتى زاڭسىز ءجۇر. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ءمالىم ەتتى.

بۇگىن ماجىلىستەگى ۇكىمەت ساعاتىنان كەيىن وڭتۇستىك كورەياداعى قازاقستان ازاماتتارىنىڭ زاڭدى جۇمىس ىستەۋىنە جاعداي جاساۋ مۇمكىندىگى تۋرالى سۇراق قويدى.

«ەلىمىزدىڭ مەملەكەتتىك ورگاندارى ءبىز دايارلاعان قۇجات جوباسىنا كەلىسىمىن بەردى. ول كەلىسىمشارت ق ر سىرتقى ىستەر مينيسترلىگى ارقىلى كورەياعا جولداندى. قازىر ونى سول ەلدىڭ مەملەكەتتىك ورگاندارى قاراستىرىپ جاتىر. بۇدان بولەك، كورەيا رەسپۋبليكاسىنىڭ پرەزيدەنتى قازاقستانعا ساپارمەن كەلگەن كەزدە، ەكى ەلدىڭ مينيسترلىكتەرى ءتيىستى مەموراندۋمعا قول قويدى. وسى ورايدا ءتيىستى قۇجاتتاردى الماسۋ ىسكە اسىرىلىپ جاتىر»، - دەدى س. جاقىپوۆا.

ونىڭ ايتۋىنشا، ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اسقاربەك ەرتايەۆ وڭتۇستىك كورەياعا بارعان.

«ولار ءبىزدىڭ مەملەكەتكە ءۇش تالاپ قويىپ وتىر. بىرىنشىدەن، كورەياداعى ەلشىلىكتە اتالعان جۇمىستارمەن اينالىساتىن اتتاشە لاۋازىمىن ەنگىزۋ كەرەك ەكەنىن ايتتى. 15 مىڭعا جۋىق قازاقستان ازاماتى سول ەلدە زاڭسىز ءجۇر. ولار «15 مىڭ ادامدى قازاقستانعا شاقىرتىڭدار» دەگەن تالابىن جاريالادى. كەلەسى تالابى حالىقارالىق سەرتيفيكاتقا قاتىستى. بۇل تۇرعىدا قازاقستاندىقتار كورەيا رەسپۋبليكاسىنا جۇمىس ىستەۋگە باراردا سەرتيفيكاتسيا راسىمدەرىنەن ءوتۋى كەرەك. ءبىز ءۇش وڭىردە جاڭا ورتالىقتاردى دايىنداپ قويدىق. الماتىدا ول كىسىلەر وزدەرى كەلىپ، قاراپ كەتتى. ايتا كەتۋ كەرەك، ءبىز بارلىق تالاپتى ورىندادىق. ەندى قازىر بارلىق راسىمدەردى كۇتىپ وتىرمىز»، - دەدى مينيستر.

ونىڭ سوزىنە قاراعاندا، قازاقستان ازاماتتارىن قايتارۋ كەزىندە ەشقانداي اكىمشىلىك ءارى قۇقىقتىق مىندەتتەمەلەر قويىلمايدى. ەگەر ولار قازىر كەلىپ، اۋەجايدان بيلەت ساتىپ الىپ كەلسە، جاۋاپكەرشىلىك بولمايدى.

سونىمەن قاتار ۆەدومستۆو باسشىسى قازاقستان ازاماتتارىنىڭ زاڭدى تۇردە جۇمىس ىستەۋىنە قاتىستى ءىس-شارالار جىل سوڭىنا دەيىن اياقتالۋى مۇمكىن ەكەنىن ايتتى.

ەسكە سالا كەتەيىك، بيىل جازدا قازاقستان مەن كورەيا 11 ماڭىزدى قۇجاتقا قول قويدى.

اۆتور
رۋسلان عابباسوۆ