وڭتۇستىك كورەيادا وقۋشى سانىنىڭ ازايۋىنا بايلانىستى 49 مەكتەپ جابىلۋى مۇمكىن

استانا. KAZINFORM - وڭتۇستىك كورەيادا تومەن تۋۋ دەڭگەيىنە بايلانىستى باستاۋىش سىنىپ وقۋشىلارىنىڭ سانى ازايىپ، 2025 وقۋ جىلىندا 49 مەكتەپتىڭ جابىلۋى جوسپارلانىپ وتىر، دەپ حابارلادى Yonhap اگەنتتىگى.

وڭتۇستىك كورەيا ۇلتتىق جينالىسىنىڭ ءبىلىم بەرۋ كوميتەتىنىڭ دەپۋتاتى كيم دە شيكتىڭ 28-اقپاندا جاريالاعان ءبىلىم مينيسترلىگىنىڭ دەرەكتەرىنە سايكەس، 2025 وقۋ جىلىندا باستاۋىش سىنىپتىڭ ءبىرىنشى سىنىبىنا قابىلداناتىن وقۋشىلار سانى 356258 بولادى. بۇل - 10 -جىل بۇرىنعى كورسەتكىشتەن %21,8- عا تومەن.

ساراپشىلاردىڭ پىكىرىنشە، تۋۋ كورسەتكىشىنىڭ تومەندەۋىنە بايلانىستى الداعى جىلدارى كوپتەگەن مەكتەپتى بىرىكتىرۋ نەمەسە جابۋ پروتسەسى جالعاسۋى مۇمكىن. ستاتيستيكا اگەنتتىگىنىڭ مالىمەتتەرى بويىنشا، وڭتۇستىك كورەيادا تۋۋ كورسەتكىشى 2004 -جىلعى 476958 بالادان 2024 -جىلى 238300 بالاعا دەيىن ەكى ەسە ازايدى.

وڭىرلەر بويىنشا تۋۋ كورسەتكىشىنىڭ ەڭ كوپ تومەندەۋى چوللابۋك- دو (%60,6-)، كۆاندجۋ (%59,3-) جانە سەۋل (%58,3-) قالالارىندا بايقالدى.

وسى دەموگرافيالىق وزگەرىستەرگە بايلانىستى 2025 -جىلى ەلدەگى 49 مەكتەپتىڭ جابىلۋى جوسپارلانىپ وتىر. 2020 -جىلدان بىلتىرعا دەيىن ەلدە 137 مەكتەپ جابىلدى.

ەسكە سالا كەتەيىك، جاپونيادا تۋۋ كورسەتكىشى بىلتىر رەكوردتىق دەڭگەيگە دەيىن تومەندەگەنىن حابارلاعان ەدىك.

اۆتور

دانا نۇرباقىت