وڭتۇستىك كورەيادا شەتەلدىك پاتسيەنتتەردىڭ رەكوردتىق سانى تىركەلدى
استانا. قازاقپارات- 2023- جىلى بۇل ەلدە شامامەن 600 مىڭ شەتەلدىك ەمدەلگەن. بۇل پاندەمياعا دەيىنگى كەزەڭنەن دە كوپ.
2023-جىلى بۇل ەلدە شامامەن 600 مىڭ شەتەلدىك ەمدەلگەن. بۇل پاندەمياعا دەيىنگى كەزەڭنەن دە كوپ. وتكەن جىلى وڭتۇستىك كورەياعا مەديتسينالىق تۋريزمنىڭ ون بەس جىلدىق تاريحىنداعى ەڭ كوپ شەتەلدىك پاتسيەنت كەلدى. مۇندا 600 مىڭ ادام نەگىزىنەن جاپونيا، قىتاي جانە ا ق ش ازاماتتارى ەمدەلدى. ت م د ەلدەرىنەن كەلگەندەردىڭ كوپشىلىگى رەسەيلىكتەر - 15 مىڭ جانە قازاقستاندىقتار - 12 مىڭ.
وڭتۇستىك كورەيانىڭ باستى اۋەجايىنا الماتى-ينچحون باعىتىنداعى ۇشاق كەلىپ قوندى. پاتسيەنتتى قارسى الۋعا راحيا جۇسىپبەكوۆا كەلدى. ول 2009 -جىلدان بەرى سەۋلدە تۇرادى جانە 12 جىل بويى مەديتسينالىق ۇيلەستىرۋشى بولىپ جۇمىس ىستەيدى. وسى ۋاقىت ىشىندە ونىڭ جۇمىس جوسپارى وزگەرمەگەن: پاتسيەنتتى اۋەجايدا كۇتىپ الۋ، قوناقۇي مەن اۋرۋحاناعا دەيىن ەرىپ ءجۇرۋ.
ءبىراق سوڭعى بىرنەشە جىلدا مەديتسينالىق ۇيلەستىرۋشىنىڭ جۇمىسى قيىنداي ءتۇستى. شەتەلدىكتەر ەمدەلۋگە كەلىپ، كەيىننەن زاڭسىز جۇمىسقا تۇرۋ جاعدايلارى جيىلەپ كەتكەن. ەگەر پاتسيەنت وڭتۇستىك كورەيا اۋماعىندا جاسىرىنىپ قالسا، ونى ەمدەۋگە شاقىرعان كلينيكا نەمەسە كومپانياعا 3 ميلليون ۆون نەمەسە 2270 دوللار ايىپپۇل سالىنىپ، شەتەلدىكتەرگە مەديتسينالىق قىزمەت كورسەتۋ ليتسەنزياسىنان ايىرىلۋى مۇمكىن. وسىلايشا، راحيانى ەكى رەت الداپ كەتىپتى.
ستاتيستيكالىق مالىمەتتەرگە سۇيەنسەك، شەتەلدىكتەردىڭ باسىم بولىگى وڭتۇستىك كورەيادا دەرماتولوگيالىق جانە ىشكى اۋرۋلاردان ەمدەلەدى، پروفيلاكتيكالىق تەكسەرۋلەردەن ءوتىپ، پلاستيكالىق وتا جاساۋعا كەلىسەدى. الماتىلىق ءلايلا استەيەۆا وڭتۇستىك كورەياعا اسقازان-ىشەك اۋرۋىنا بايلانىستى كەلدى. ونىڭ ايتۋىنشا، قازاقستان اۋرۋحانالارىندا PH- مەتريا جانە وڭەش موتوريكاسىن تەكسەرۋ قۇرالدارى بولماعان. وسىنداي دياگنوستيكادان ءلايلا سەۋل كلينيكاسىندا ءوتتى.
ءلايلا استەيەۆا، پاتسيەنت:
- وسىندا كەلگەنىمدە ماعان: «ءسىز اۋىزبەن تىنىس الاسىز، سول سەبەپتى ءىشىڭىز كەبەدى»، - دەدى. مەن اۋىزبەن تىنىس الۋدى دوعارىپ، مۇرنىممەن تىنىس الا باستادىم، سونىمەن ءبارى باسىلدى.
ەل ۇكىمەتى وڭتۇستىك كورەيانى ازيانىڭ مەديتسينالىق تۋريزم ورتالىعىنا اينالدىرۋدى جوسپارلاپ وتىر. جوسپار بويىنشا 2027 -جىلعا قاراي مۇندا جىل سايىن 700 مىڭ شەتەلدىك پاتسيەنت ەمدەلەتىن بولادى.
24.kz
