وڭتۇستىك كورەيا «تەمىر كۇمبەز» انالوگىن ازىرلەۋ ۇستىندە
استانا. KAZINFORM - ەل ۇكىمەتى اتالعان قۇرىلعىنىڭ قۇرىلىسىنا 329 ميلليون دوللار ءبولۋدى جوسپارلاپ وتىر، دەپ حابارلايدى Yonhap اقپارات اگەنتتىگى.

وڭتۇستىك كورەيا دۇيسەنبى كۇنى سولتۇستىك كورەيادان كەلەتىن ارتيللەريالىق قاۋىپتەرگە قارسى قورعانىستى كۇشەيتۋ ءۇشىن يزرايلدىڭ «تەمىر كۇمبەزىنە» ۇقساس ءوزىنىڭ زىمىرانعا قارسى قورعانىس جۇيەسىن ازىرلەۋدى رەسمي تۇردە باستادى.
ەل ۇكىمەتى 2028 -جىلعا قاراي تومەن بيىكتىكتەگى زىمىرانعا قارسى قورعانىس جۇيەسىن (Low-Altitude Missile Defense, LAMD) دامىتۋعا 479,8 ميلليارد ۆون (329 ميلليون دوللار) ءبولۋدى جوسپارلاپ وتىر.
وڭتۇستىك كورەيا سەۋلدەگى اۋە قورعانىسىن كۇشەيتۋگە ۇمتىلۋ ۇستىندە، ويتكەنى سولتۇستىك كورەيادا ەلدىڭ 51 ميلليون حالقىنىڭ جارتىسى تۇراتىن ەل استاناسى ايماعىنىڭ اۋقىمىندا ۇزاق قاشىقتىققا اتىلاتىن كوپتەگەن ارتيللەريالىق قوندىرعى بار.
وڭتۇستىك كورەيانىڭ قورعانىستىق ساتىپ الۋ باعدارلاماسىنىڭ باسقارماسىنىڭ (DAPA) مالىمدەۋىنشە، بۇل جۇيە نەگىزگى اسكەري نىسانداردى سولتۇستىك كورەيانىڭ ارتيللەريالىق قاۋىپ-قاتەرىنەن قورعاۋعا كومەكتەسەدى.
جوباعا قورعانىستى دامىتۋ مەملەكەتتىك اگەنتتىگى مەن LIG Nex1 Co ،Hanwha Aerospace Co جانە Hanwha Systems Co سياقتى قورعانىس كومپانيالارى قاتىسادى، دەپ حابارلادى DAPA.
ەسكە سالا كەتسەك، 14-قاڭتاردا سولتۇستىك كورەيا جاپون تەڭىزىنە قاراي بىرنەشە بالليستيكالىق زىمىران ۇشىردى.
سونداي-اق 6 -قاڭتاردا كحدر جاپون تەڭىزىنە قاراي (بولجام بويىنشا) بالليستيكالىق زىمىران ۇشىردى.
اۆتور
زارينا تۋعانبايەۆا