وڭتۇستىك كورەيا پرەزيدەنتىنىڭ ۇشاعىنداعى 168 جولاۋشىنىڭ ءتولقۇجات دەرەگى جەلىگە تارادى
استانا. KAZINFORM — وڭتۇستىك كورەيا پوليتسياسى پرەزيدەنت لي چجە ميەن، ونىڭ جۇبايى، مينيسترلەر، جولاۋشىلار، جالپى 168 ادامنىڭ جەكە دەرەگىنىڭ ينتەرنەتكە تاراپ كەتۋىنە قاتىستى الدىن الا تەرگەۋ باستادى. بۇل تۋرالى Yonhap اگەنتتىگى حابارلادى.
ۇلتتىق پوليتسيا اگەنتتىگىنىڭ مالىمەتى بويىنشا، ماۋسىم ايىندا اقپاراتتىق قاۋىپسىزدىككە قاتىستى اقىلى سايتتا «جولاۋشىلار ءتىزىمى (وڭتۇستىك كورەيا - بەلگيا)» اتتى فايل جاريالانعان.
فايلدا پرەزيدەنت پەن ونىڭ جۇبايى، ۇكىمەتتىڭ جوعارى لاۋازىمدى شەنەۋنىكتەرى، پرەزيدەنتتىڭ اتقارۋشى كەڭسەسىنىڭ (چحونۆادە) جانە سىرتقى ىستەر مينيسترلىگىنىڭ قىزمەتكەرلەرى، پرەزيدەنتتىڭ قاۋىپسىزدىك قىزمەتىنىڭ مۇشەلەرى جانە چحونۆادە قىزمەتىنەن حابار تاراتاتىن جۋرناليستەردىڭ - جالپى 168 ادامنىڭ جەكە دەرەگى بولعان. اقپاراتتا كورەي جانە اعىلشىن تىلدەرىندەگى ەسىمدەر، جۇمىس ورىندارى، لاۋازىمدارى، تۋعان كۇندەرى، ءتولقۇجات نومىرلەرى، بەرىلگەن كۇندەرى جانە جارامدىلىق مەرزىمى قامتىلعان.
فايل تابىلعان سايت پايدالانۋشىلارعا فايلدار مەن سىلتەمەلەردىڭ زياندى كودتارى بار-جوعىن تەكسەرۋگە مۇمكىندىك بەرەدى. اقىلى جازىلۋشىلار مەن باسقا پايدالانۋشىلار پلاتفورماعا جۇكتەلگەن فايلداردى جۇكتەي الادى.
پوليتسيا لي چجە ميەننىڭ ماۋسىم ايىندا بەلگياعا، يتالياعا جانە فرانسياعا ساپارلارى كەزىندە پرەزيدەنت ۇشاعىنداعى جولاۋشىلاردىڭ دەرەكتەرى بار فايلدا زياندى باعدارلامالار بار-جوعىن تەكسەرۋ كەزىندە پلاتفورماعا تارالىپ كەتكەن دەپ كۇدىكتەنەدى.
فايل 2 -ماۋسىمدا، پرەزيدەنتتىڭ شەتەلگە ساپارى الدىندا جۇكتەلىپ، شامامەن بەس اي بويى تۇرعان. قازىر فايل جابىق.
وڭتۇستىك كورەيا پرەزيدەنتىنىڭ اكىمشىلىگى اقپاراتتىڭ تاراپ كەتكەنى بەلگىلى بولعان كەزدە شۇعىل شارالار قابىلدانعانىن، ارى قارايعى جۇمىس سىرتقى ىستەر مينيسترلىگى جانە باسقا دا ءتيىستى مەكەمەلەردىڭ قولىندا ەكەنىن مالىمدەدى.
بۇعان دەيىن وڭتۇستىك كورەيا پرەزيدەنتى پوليتسيانى تۇبەگەيلى رەفورمالاۋعا شاقىرعان بولاتىن.
