وڭتۇستىك كورەيا پرەزيدەنتىنىڭ تاعدىرى ناۋرىزدا شەشىلەدى

استانا. قازاقپارات- وڭتۇستىك كورەيانىڭ كونستيتۋتسيالىق سوتى ەكى جارىم ايدان كەيىن پرەزيدەنت يۋن سوك يەلگە قاتىستى يمپيچمەنت ءىسىن قاراۋدى اياقتادى، دەپ حابارلايدى 24kz.

كەشە سوت تىڭداۋى ءوتتى، وندا بيلىكتەن شەتتەتىلگەن مەملەكەت باسشىسى سوڭعى ءسوزىن ايتتى. يۋنعا بۇلىككە شاقىرۋ جانە بيلىكتى اسىرا پايدالانۋ ايىپتارى تاعىلدى. وتكەن جىلدىڭ 3- جەلتوقسانىندا پرەزيدەنت ەلدە اسكەري جاعداي جاريالادى، ءبىراق ونى بىرنەشە ساعاتتان كەيىن پارلامەنت جويدى.

كونستيتۋتسيالىق سوت بيلىكتەن شەتتەتكەن پرەزيدەنت يۋن سوك يەل سەنساتسيالىق مالىمدەمە جاسادى. ول: «ەگەر سوت وعان جاريالانعان يمپيچمەنتتىڭ كۇشىن جويىپ، قىزمەتىنە قايتارسا، وندا ەلدە كونستيتۋتسيالىق رەفورما جۇرگىزەمىن»، - دەپ ۋادە بەردى.

يۋن ءوزى سىرتقى ساياساتپەن اينالىساتىنىن، ال ىشكى ىستەر بويىنشا وكىلەتتىكتەردى پرەمەر-مينيسترگە جۇكتەۋدى ۇسىندى. سونىمەن قاتار بيلىكتەن مەرزىمىنەن بۇرىن كەتۋى مۇمكىن ەكەنىن مەڭزەدى. يۋن سوك يەل اسكەري جاعداي ەنگىزگەنى ءۇشىن حالىقتان العاش رەت كەشىرىم سۇرادى، ءبىراق ونى قاجەتتى شارا دەپ ەسەپتەيتىنىن ايتتى. جانە 3-جەلتوقساندا ۇلتتىق جينالىس عيماراتىنا از عانا اسكەر كىرگەنىن جانە اسكەري جاعداي بار بولعانى 2 ساعاتقا سوزىلعانىن اتاپ ءوتتى.

يۋننىڭ ادۆوكاتتارى بولسا، سول ءتۇنى بىردە-ءبىر ازامات زارداپ شەكپەگەنىن، ال پرەزيدەنتتىڭ ارەكەتتەرىنە وپپوزيتسيانىڭ زاڭداردى تالقىلاۋسىز قابىلداۋى جانە مەملەكەتتىك بيۋدجەتتى ءبىرجاقتى قىسقارتۋى سەبەپ بولعانىن جەتكىزدى.

ال ايىپتاۋشى تاراپ ۇلتتىق جينالىس زاڭگەرلەرى: «يۋن سوك يەلدى دەموكراتيا مەن ەل دامۋى ءۇشىن مىندەتتى تۇردە بيلىكتەن شەتتەتۋ كەرەك»، - دەپ وتىر. «سەبەبى پرەزيدەنت كونستيتۋتسيا مەن زاڭداردى بۇزىپ، ۇلتتىق جينالىستىڭ بيلىگىن باسىپ الۋعا تىرىستى»، - دەيدى.

سۋديالار شەشىمنىڭ ناقتى كۇنىن ازىرگە جاريالاعان جوق. الايدا بۇعان دەيىن نو مۋ حيەن مەن پاك كىن حە پرەزيدەنتتەرىنە يمپيچمەنت جاريالاۋ ماسەلەسىن قاراۋعا شامامەن ەكى اپتا كەتكەن بولاتىن. يۋن سوك يەلدى بيلىكتەن كەتىرۋ ءۇشىن 8 سۋديانىڭ كەمىندە التاۋى ونى قولداۋى كەرەك. ەگەر يۋن قىزمەتىنەن كەتسە، ەلدە 60 كۇن ىشىندە كەزەكتەن تىس پرەزيدەنتتىك سايلاۋ وتەدى. ال قىزمەتىنە قايتارىلسا، 2027 -جىلدىڭ مامىرىنا دەيىن بيلىكتە قالادى.

يۋن سوك يەلدىڭ جاقتاستارى كۇندە شەرۋ وتكىزىپ جاتىر. كەشە بيلىك كونستيتۋتسيالىق سوت عيماراتىن شابۋىلدان قورعاۋ ءۇشىن 64 پوليتسيا بولىمشەسىنەن 3800 قىزمەتكەر تارتتى. سونىمەن قاتار سوت عيماراتىنا باراتىن كوشەلەردى جابۋ ءۇشىن 190 پوليتسيا اۆتوبۋسى قويىلدى. يۋندى قولداۋشىلار يمپيچمەنتتى جويۋ ءۇشىن 190 مىڭ قول جيناۋدى ماقسات ەتىپ وتىر. الەۋمەتتىك ساۋالناما ناتيجەلەرى بويىنشا، رەسپوندەنتتەردىڭ جارتىسىنان كوبى يمپيچمەنتتى قولدايدى، ال شامامەن %40- ءى يۋن سوك يەلدىڭ قىزمەتىندە قالۋىن قۇپتايدى.

24.kz