وڭتۇستىك كورەيا پرەزيدەنتىن ۇستاۋ كەزىندە تەرگەۋشىلەر مەن قاۋىپسىزدىك قىزمەتى قارسىلاستى
استانا. KAZINFORM – كەشە مەملەكەتتىك سىبايلاس جەمقورلىققا قارسى اگەنتتىك يۋن سوك يەلدى ۇستاۋ ارەكەتىن پرەزيدەنتتىڭ قاۋىپسىزدىك قىزمەتى مەن تەرگەۋشىلەر اراسىنداعى بىرنەشە ساعاتقا سوزىلعان قارسىلىقتان كەيىن ۋاقىتشا توقتاتتى، دەپ حابارلايدى Kazinform Yonhap News Agency-گە سىلتەمە جاساپ.
جوعارى لاۋازىمدى تۇلعالاردىڭ سىبايلاس جەمقورلىق ىستەرىن تەرگەۋ باسقارماسى (CIO) تەرگەۋشىلەرىنىڭ پرەزيدەنت رەزيدەنسياسىنا يۋن سوك يەلدى ۇستاۋ ءۇشىن بارعانىنان كەيىن بەس ساعات وتكەن سوڭ، ساعات 13:30-دا وردەردى ورىنداۋدى توقتاتقانىن مالىمدەدى.
- وردەردى ورىنداۋ جالعاسىپ جاتقان قارسىلىققا بايلانىستى ءىس جۇزىندە مۇمكىن ەمەس دەپ شەشتىك جانە قىزمەتكەرلەردىڭ قاۋىپسىزدىگىنە الاڭداۋشىلىق سەبەپتى ونى توقتاتتىق، - دەپ مالىمدەدى CIO باسپا سوزگە ارنالعان حابارلاماسىندا.
CIO وكىلدەرى تەكسەرۋ جۇرگىزىلگەن سوڭ، كەلەسى قادامدار تۋرالى شەشىم قابىلدايتىنىن ايتتى.
- ءبىز زاڭمەن بەلگىلەنگەن راسىمدەردى ورىنداۋدان باس تارتقان كۇدىكتىنىڭ ارەكەتىنە بايلانىستى تەرەڭ وكىنىش بىلدىرەمىز، - دەپ تولىقتىردى ۆەدومستۆو.
بۇعان دەيىن حابارلانعانداي، قىزمەتىنەن شەتتەتىلگەن وڭتۇستىك كورەيا پرەزيدەنتى يۋن سوك يەلدىڭ رەزيدەنسياسىنا كەلگەن تەرگەۋشىلەر ونى ۇستاۋ بارىسىندا اسكەري قىزمەتشىلەردىڭ قارسىلىعىنا تاپ بولدى.
ۇستاۋ شاراسى سوتتىڭ بۇرىن شىعارعان وردەرى نەگىزىندە جۇرگىزىلۋدە.
ەسكە سالساق، 14-جەلتوقساندا وڭتۇستىك كورەيا پارلامەنتىنىڭ 300 مۇشەسىنىڭ 204- ءى يۋن سوك يەلدى پرەزيدەنتتىك قىزمەتىنەن شەتتەتۋگە داۋىس بەرگەن بولاتىن. بۇل شەشىم ەلدە ونىڭ اسكەري جاعداي ەنگىزۋىنە بايلانىستى قابىلدانعان.
ايجان سەرىكجان قىزى
اۆتور
