وڭتۇستىك كورەيا پرەزيدەنتى اسكەري جاعداي ەنگىزۋدى ەشقاشان جوسپارلاماعانىن مالىمدەدى

استانا. قازاقپارات - وڭتۇستىك كورەيادا پرەزيدەنت يۋن سوك يەلگە قاتىستى سوت پروتسەسى جالعاسىپ جاتىر، دەپ حابارلايدى 24kz.

كەشە كونستيتۋتسيالىق سوتتىڭ بەسىنشى وتىرىسى ءوتتى. مەملەكەت باسشىسى «بۇلىككە شاقىرۋ جانە بيلىكتى اسىرا پايدالاندى» دەگەن ايىپپەن تەرگەلىپ جاتىر. وتكەن جىلدىڭ 3-جەلتوقسانىندا يۋن ەلدە اسكەري جاعداي ەنگىزگەن. الايدا بىرنەشە ساعاتتان كەيىن پارلامەنت بۇل شەشىمدى جويدى. 14-جەلتوقساندا دەپۋتاتتار پرەزيدەنتكە يمپيچمەنت جاريالاپ، سوت ونى قاماۋعا الۋعا وردەر بەردى.

وڭتۇستىك كورەيانىڭ قىزمەتىنەن ۋاقىتشا شەتتەتىلگەن پرەزيدەنتى يۋن سوك يەل سوتتىڭ بەسىنشى وتىرىسىنا ءوزى قاتىستى. يۋننىڭ ادۆوكاتتارى ونىڭ اسكەري جاعداي ەنگىزۋدى ەشقاشان جوسپارلاماعانىن مالىمدەدى. ولاردىڭ ايتۋىنشا، بۇل ارەكەتتەر تەك ساياسي داعدارىستى ەڭسەرۋگە باعىتتالعان شارالارى بولعان. ال پرەزيدەنتتىڭ ءوزى: «ەشتەڭە بولعان جوق»، دەپ ءىستى «زاڭسىز» دەپ وتىر.

دەگەنمەن يۋن سوك يەل ورتالىق سايلاۋ كوميسسياسىنىڭ كەڭسەلەرىنە اسكەر جىبەرۋگە بۇيرىق بەرگەنىن مويىندادى. ول بىلاي دەدى: «مەن سول كەزدەگى قورعانىس ءمينيسترى كيم يەن حيەنعا ورتالىق سايلاۋ كوميسسياسىنىڭ كەڭسەلەرىنە اسكەر جىبەرۋدى بۇيىردىم. بۇل ەشقانداي قىلمىستىق تەرگەۋ جۇرگىزۋ ءۇشىن ەمەس، تەك جۇيەلەردىڭ دۇرىس جۇمىس ىستەپ تۇرعانىن تەكسەرۋ ءۇشىن جاسالدى. سەبەبى مەن پروكۋرور رەتىندە سايلاۋ ناتيجەلەرىن بۇرمالاۋ ىستەرىمەن اينالىسقان كەزدە تۇسىنىكسىز، جالعان بيۋللەتەندەردىڭ كوپ ەكەنىن كوردىم».

سۋديالار اسكەري جاعداي كەزىندە بۇيرىقتاردى ورىنداعان جوعارى لاۋازىمدى اسكەري قىزمەتكەرلەرگە ءسوز بەردى. اتاپ ايتقاندا، سەۋلدى قورعاۋ ارمياسىنىڭ قولباسشىسى بولعان گەنەرال لي چجين ۋ مالىمدەمە جاسادى. سۋديانىڭ پرەزيدەنتتەن بىرەۋدى تۇتقىنداۋ تۋرالى تىكەلەي بۇيرىق العان-الماعانى تۋرالى سۇراعىنا لي «جوق» دەپ جاۋاپ بەرىپ، بۇل ماسەلەگە قاتىستى قوسىمشا تۇسىنىكتەمە بەرۋدەن باس تارتتى.

لي چجين ۋ، وڭتۇستىك كورەيا اسكەرىنىڭ گەنەرال-لەيتەنانتى:

- جوعارعى قولباسشى، ياعني، ەلدىڭ اتىنان سويلەيتىن ءارى بۇرىنعى باس پروكۋرور رەتىندە زاڭدى جاقسى بىلەتىن ادام ەل مەن الەم الدىندا مالىمدەمە جاساعان كەزدە ونىڭ زاڭدى نەمەسە زاڭسىز ەكەنىن ويلانۋعا دا ۋاقىت بولمادى. سوندىقتان مەن ونىڭ شەشىمى زاڭدى دەپ سانادىم جانە پارلامەنتكە بارۋ تۋرالى بۇيرىق العان كەزدە مەن ونى ورىنداۋعا مىندەتتى بولدىم.

سەۋلدە پرەزيدەنتتىڭ جاقتاستارى مەن قارسىلاستارىنىڭ ميتينگىلەرى تولاستاماي تۇر. سەنبى كۇنى كۆانحۆامۋن الاڭى ماڭىندا پرەزيدەنتتى قولدايتىن 40 مىڭعا جۋىق ادام جينالدى. ولار «يۋن سوك يەلگە بوستاندىق!»، «يمپيچمەنتكە جول جوق!» دەپ ۇرانداتتى. سونىمەن قاتار شامامەن 6 مىڭ قارسىلاس تا كوشەگە شىعىپ، «يۋن سوك يەل قىزمەتتەن كەتۋى كەرەك!»، «دەموكراتيانى قورعايىق!» دەپ تالاپ قويدى. پرەزيدەنت قاماۋدا وتىرعان سەۋلدەگى تۇرمە ورتالىعىنىڭ الدىندا ونىڭ جاقتاستارى تاۋلىك بويى كەزەكشىلىك ەتۋدە.

كيم پيەن گىن، پرەزيدەنت يۋن سوك يەلدىڭ جاقتاسى:

- مەن پرەزيدەنتتى قولداۋ ءۇشىن توكيودان كەلدىم. ونىڭ قاماۋعا الىنۋى زاڭسىز دەپ سانايمىن. ونى دەرەۋ تۇرمەدەن بوساتۋ كەرەك.

ايتا كەتەيىك، يۋن سوك يەل 15 -قاڭتاردا تەرگەۋشىلەر ونى پرەزيدەنتتىك رەزيدەنسيادا تۇتقىنداعاننان بەرى كيەنگي پروۆينتسياسىنداعى ىيۆان قالاسىندا ورنالاسقان سەۋلدىڭ تۇرمە ورتالىعىندا قاماۋدا وتىر. كونستيتۋتسيالىق سوتتىڭ ونى قىزمەتىنە قايتا الا ما، جوق پا دەگەن شەشىم قابىلداۋىنا 180 كۇن بەرىلگەن. بۇگىن پارلامەنتتىك كوميتەت اسكەري جاعداي تۋرالى ءىستى تەرگەۋ ماقساتىندا پرەزيدەنت يۋن قاماۋدا وتىرعان سەۋلدىڭ تۇرمە ورتالىعىنا بارىپ، ونى تەرگەمەك. الايدا بيلەۋشى پارتيا پرەزيدەنتتەن جاۋاپ الۋعا قارسىلىق بىلدىرۋدە.

24.kz