وتاندىق جەدەل جاردەم قىزمەتىندە ۋدز اپپاراتتارى العاش رەت قولدانىلا باستادى
پاۆلودار. KAZINFORM - پاۆلودار وبلىسىندا جەدەل جاردەم بريگادالارى پورتاتيۆتى ۋلترادىبىستىق زەرتتەۋ اپپاراتتارىمەن جابدىقتالدى. بۇل - قازاقستاندا جەدەل مەديتسينالىق جاردەم قىزمەتىنە ۋدز تەحنولوگياسىن ەنگىزۋ بويىنشا العاشقى تاجىريبە.
وڭىرلىك دەنساۋلىق ساقتاۋ باسقارماسىنىڭ باسشىسى ەرمەك كۋچۋكوۆتىڭ ايتۋىنشا، پاۆلودار مەن اقسۋ قالالارىنداعى قوسالقى ستانسيالارعا بەس زاماناۋي قۇرىلعى بەرىلگەن. ولاردى قولدانۋ ءۇشىن 45 دارىگەر ارنايى دايارلىقتان ءوتىپ، سەرتيفيكات العان.
جاڭا تەحنولوگيانىڭ كومەگىمەن دارىگەرلەر ناۋقاستىڭ جاعدايىن وقيعا ورنىندا 2-3 مينۋت ىشىندە تەكسەرە الادى.
- ءۇش اپتادا ماماندار 900-گە جۋىق زەرتتەۋ جۇرگىزگەن. سونىڭ ناتيجەسىندە اۋىر پرەەكلامپسيا، پلاتسەنتانىڭ مەرزىمىنەن بۇرىن اجىراۋى جانە ىشكى اعزالاردىڭ جاراقاتى سياقتى شۇعىل جاعدايلاردى دەر كەزىندە انىقتاۋعا مۇمكىندىك تۋعان، - دەيدى وڭىرلىك جەدەل جاردەم ستانسياسىنىڭ باسشىسى قانادان احمەتجانوۆ.
تاعى ءبىر ەرەكشەلىگى - ۋدز اپپاراتتارى جەدەل جاردەمنىڭ ءبىرىڭعاي كولل-ورتالىعىمەن بىرىكتىرىلگەن. وسىلايشا، اعا دارىگەر زەرتتەۋ ناتيجەلەرىن ناقتى ۋاقىت رەجيمىندە باقىلاپ، ارىپتەستەرىنە دياگنوزدى ناقتىلاۋعا كومەكتەسەدى.
پاۆلودارلىق تاجىريبە دەنساۋلىق ساقتاۋ مينيسترلىگىنە تانىستىرىلعان. قازىر بۇل جوبانى ەلىمىزدىڭ باسقا وڭىرلەرىنە تاراتۋ ماسەلەسى قاراستىرىلىپ جاتىر.
بۇعان دەيىن ەلىمىزدە العاشقى مەديسينالىق كومەك قالاي دامىپ كەلە جاتقانى تۋرالى جازعانبىز.