وتاندىق عالىمدار جول ساپاسىن جاقسارتاتىن قوسپا ويلاپ تاپتى

ەندى قوسپا قاراقوعا - پەتروپاۆل تاس جولىنىڭ 200 مەترلىك ۋچاسكەسىندە سىنالىپ جاتىر. تيىمدىلىگى دالەلدەنسە، جاڭا تەحنولوگيانى جول قۇرىلىسىنا ەنگىزۋ جوسپارلانعان. پرەزيدەنت تە حالىققا جولداۋىندا جول ينفراقۇرىلىمىن دامىتۋ جانە وتاندىق عىلىمي ازىرلەمەلەردى وندىرىسكە ەنگىزۋ ماسەلەلەرىن باسىم مىندەتتەردىڭ ءبىرى رەتىندە اتاپ ءوتتى. اسفالتبەتون جابىنىنا تەك بيتۋم شيكىزاتىن پايدالانۋ جەتكىلىكسىز. جولدىڭ بەرىكتىگىن ارتتىرۋدا پوليمەر قوسپالاردىڭ دا ورىنى ەرەكشە. ءبىراق بۇل ەۋروپا مەملەكەتتەرىندە قولدانىلاتىن ءتاسىل. باعاسى وتە قىمبات بولعان سوڭ ءبىزدىڭ ەلدە ازىرگە قولدانىسقا ەنە قويعان جوق. وتاندىق عالىمداردىڭ جاڭالىعى ءوندىرىس قالدىقتارىن پايدالانۋ ارقىلى شىعىندى ازايتۋدى كوزدەيدى.

 يۋليا بىزوۆا، م. قوزىبايەۆ اتىنداعى س ق ۋ «حيميا جانە حيميالىق تەحنولوگيالار» كافەدراسىنىڭ مەڭگەرۋشىسى:

- ءبىز قوسپامىزدا 2 كومپونەنتتى قولداندىق. ءبىرىنشىسى جارامسىز بولىپ قالعان سۇيىقتىق. ونى جىلۋ ەلەكتر ورتالىعىنان الدىق. ەكىنشىسى مۇناي-حيميا ءوندىرىسىنىڭ قالدىقتارى. بۇل ارقىلى جول ايازعا جانە ىلعالعا ءتوزىمدى بولادى. ۋنيۆەرسيتەتىمىزدەگى بازالىق جابدىقتار ازدىق ەتتى. سوندىقتان 4 جاڭا جابدىق ساتىپ الدىق. زەرتحانالىق سىناقتار جاقسى ناتيجە كورسەتتى.

جاڭا قوسپا نەگىزىندە دايىندالعان اسفالتتىڭ سۋدى ءسىڭىرۋى ازايىپ، ەسەسىنە بەرىكتىگى 50 پايىزعا ارتقان. جوعارى تەمپەراتۋراعا ءتوزىمدى ءارى ەكولوگيالىق تۇرعىدا ءتيىمدى ەكەن. جىلىنا 10 مىڭ توننا بيتۋم ءوندىرۋ كەزىندە 10 تونناعا دەيىن ءوندىرىس قالدىعىن قايتا پايدالانۋعا بولادى دەيدى عالىمدار.

 انتونينا ديۋرياگينا، م. قوزىبايەۆ اتىنداعى س ق ۋ پروفەسسورى:

 - 3 جارىم جىل بۇرىن مينيسترلىكتەن جول جابىنىن زەرتتەۋ بويىنشا گرانت ۇتىپ الدىق. بارلىق ءوتىنىم ماقۇلداندى، قاجەتتى قارجى ءبولىندى. بۇگىندە يننوۆاتسيالىق ءادىسىمىز رەسمي تۇردە پاتەنتتەلدى. قۇجاتتارىمىز تولىق دايىن. بۇل تەحنولوگيا جولداردىڭ ساپاسىن جاقسارتۋعا ۇلكەن سەپتىگىن تيگىزەدى دەپ سەنەمىز.

قوسپا تاجىريبە رەتىندە قاراقوعا - پەتروپاۆل تاس جولىنىڭ 200 مەترلىك بولىگىنە توسەلدى. جول قۇرىلىسى سالاسىنىڭ ماماندارى ونىڭ ناقتى تيىمدىلىگىن ۋاقىت كورسەتەدى دەيدى.

قانات يسايەۆ «سترويەكسپەرت» سىناق زەرتحاناسى» ج ش س ديرەكتورى: 

- ءبىز ءۇش ءتۇرلى ۇلگىنى سالىستىرىپ سىنادىق. ولار كادىمگى اسفالت، باسقا ءوندىرۋشىنىڭ قوسپاسى جانە ۋنيۆەرسيتەت ماماندارى ازىرلەگەن ماتەريال. ناتيجەسىندە ءارقايسىسىنىڭ كورسەتكىشتەرى ءارتۇرلى بولدى. ۋنيۆەرسيتەت ۇسىنعان قوسپا سىناقتان جاقسى ناتيجە كورسەتتى. ماماندار كۇزگى- قىسقى جانە كوكتەمگى كەزەڭدەردە جولدىڭ جاعدايىن باقىلاماق. جابىندا جارىقتار مەن ويىقتاردىڭ پايدا بولۋى، بەرىكتىگى مەن سۋعا توزىمدىلىگى تەكسەرىلەدى. ەگەر جاڭا قوسپا سىناقتان ءساتتى وتسە، جول قۇرىلىسى مەن جوندەۋ جۇمىستارىندا پايدالانىلماق.

24.kz