وسكەمەندەگى ەكولوگيالىق بيۋرو رەسمي تۇردە جۇمىسىن باستادى

وسكەمەن. KAZINFORM - وسكەمەن قالاسىنداعى ەكولوگيالىق قورعاۋ بيۋروسى رەسمي تۇردە ءوز جۇمىسىن باستادى.

شىعىس قازاقستان وبلىسى ءماسليحاتىنىڭ جانىنان «وسكەمەن تىنىسى» ەكولوگيالىق قورعاۋ بيۋروسى قۇرىلعان. بۇگىن وسىعان قاتىستى جوبا وبلىس اكىمىنە تانىستىرىلىپ، بيۋرو رەسمي تۇردە جۇمىسىنا كىرىستى.

- بۇعان دەيىن جاي قوعامدىق ۇيىم بولماي، ناقتى جۇمىستاردى قولعا الاتىن ۇجىمعا اينالۋ ءۇشىن نە ىستەۋ كەرەكتىگى ويلاستىرىلعان بولاتىن. قالالىق ءماسليحات بىزگە قولايلى نۇسقالاردى ۇسىنعان جوق. زاڭ بويىنشا ءماسليحاتتاردا تۇراقتى كوميسسيالار، باسقا دا ورگاندار قۇرىلۋى مۇمكىن، ءبىراق ءبىز دەپۋتات بولماعاندىقتان قالاي ىستەيتىنىمىزدى بىلمەدىك. ونىڭ ۇستىنە ءدال وسىنداي ۇيىم قۇرعاندار دا بۇرىن بولماعان. ماسەلەنى ش ق و اكىمدىگىنە ايتقان سوڭ وبلىستىق ءماسليحات بىزگە قولداۋ كورسەتتى، - دەيدى جوبا جەتەكشىسى ەلەنا بەرەزينسكايا- ابيلوۆا.

ۇيىمنىڭ ماقساتى - وسكەمەندەگى اۋا ساپاسىن جاقسارتۋعا ىقپال ەتۋ جانە ايماقتاعى كاسىپورىندارعا سالىنعان ەكولوگيالىق ايىپپۇلداردان تۇسكەن قاراجاتتى ءبولۋ بويىنشا ۇسىنىستار ەنگىزۋ.

ەسكە سالساق، وسىعان دەيىن وسكەمەندە ەكولوگيا ماسەلەسىن شەشۋ ءۇشىن ارنايى بيۋرو قۇرىلىپ، باقىلاۋ كۇشەيتىلەتىندىگى حابارلانعان.

اۆتور

تالعاتجان مۇحامەتبەك ۇلى