وسكەمەندە كولىگىن 5 مينۋتتان ارتىق قىزدىرعان 3 ادامعا ايىپپۇل سالىندى
وسكەمەن. KAZINFORM - وسكەمەن قالاسىندا تۇرعىن اۋدانداردا قوزعالتقىشى 5 مينۋتتان استام جۇمىس ىستەپ تۇرعان 3 ادامعا ايىپپۇل سالىندى.

پوليتسەيلەرگە كولىگىن 5 مينۋتتان ارتىق قىزدىرعان ادامدار جايلى 3 ارىزدى دا ءبىر ادام تۇسىرگەن. ول تاڭەرتەڭ اۋلاعا شىعىپ، كولىكتەردى ۆيدەوعا ءتۇسىرىپ، ءتارتىپ ساقشىلارىنا ارىزدانىپ ءجۇر.
- 102 ارناسىنا وسىلاي 3 ارىز ءتۇستى. كولىك جۇرگىزۋشىلەرى اكىمشىلىك جاۋاپكەرشىلىككە تارتىلدى. پوليتسيادا وسىنداي زاڭبۇزۋشىلىققا جول بەرگەن ازاماتتارعا جاپپاي ايىپپۇل سالۋ مىندەتى جوق. اۆتوكولىكتى ۇزاق قىزدىرعاندارعا اكىمشىلىك حاتتاما تەك ازاماتتاردىڭ ارىز-شاعىمدارى تۇسكەن كەزدە عانا تولتىرىلادى. سونداي-اق بۇزۋشىلىق تۋرالى دالەلدەر (فوتو، ۆيدەو) بولۋى ءتيىس، - دەپ حابارلادى ش ق و پوليتسيا دەپارتامەنتىنىڭ باسپا ءسوز قىزمەتى.
ايتا كەتەيىك، تۇرعىن اۋدانداردا قوزعالتقىشى 5 مينۋتتان استام جۇمىس ىستەپ تۇرعان كولىك جۇرگىزۋشىلەرىنە زاڭ بويىنشا 5 ا ە ك (19660 تەڭگە) مولشەرىندە ايىپپۇل سالىنادى.
ەسكە سالساق، وسىعان دەيىن قازاقستاندا كولىگىن 5 مينۋتتان ارتىق قىزدىرعانعا العاشقى ايىپپۇل سالىنعانى حابارلانعان.
اۆتور
تالعاتجان مۇحامەتبەك ۇلى