وسكەمەندە 4 ناۋقاسقا «تاماقتىڭ حيميالىق كۇيىگى» دياگنوزى قويىلدى
وسكەمەن. KAZINFORM - وسكەمەن قالاسىندا دارىگەرلەر «تاماقتىڭ حيميالىق كۇيىگى» دياگنوزىن 4 ناۋقاسقا قويدى.
قاراشا ايىنان بەرى وسكەمەندە ەكولوگيالىق جاعداي ۋشىعىپ كەتتى. جەل سوقپاي، قايتا-قايتا قولايسىز مەتەورولوگيالىق جاعداي قالىپتاسىپ، قالا ءىشىن ءتۇتىن باستى. سول ۋاقىتتان بەرى دارىگەرلەرگە قارالعان ناۋقاستار كوبەيگەن. قاراشا ايىندا ەمحانالارعا بارعان حالىق سانى 11 پايىزعا ارتسا، جەلتوقسان باستالعالى بەرى دە تاماعى اۋىرعاندار سانى ازايماي تۇر.
ش ق و دەنساۋلىق ساقتاۋ باسقارماسىنىڭ مالىمەتىنە سۇيەنسەك، قازىر 4 ادامعا «تاماقتىڭ حيميالىق كۇيىگى» دياگنوزى قويىلعان. بۇل دياگنوز بىلتىر كوكتەمدە ەنگىزىلگەنىمەن سول ۋاقىتتان بەرى بىردە-ءبىر ناۋقاسقا قويىلماعان ەدى.
«مەديتسينا قىزمەتكەرلەرى وسى كلينيكالىق حاتتامانى قولدانۋدى ۇيرەنىپ جاتىر. بۇل دياگنوز مۇرىنمەن تىنىس الۋ قيىنداسا، تاماق اۋىرىپ، كۇيىپ، قۇرعاق جوتەل بولسا قويىلۋى مۇمكىن. سونىمەن قاتار ناۋقاس حيميالىق زاتتاردىڭ اسەرى بار جەردە جۇرگەن بولۋى كەرەك. ياعني، دارىگەر ودان قاي جەردە، قانشا ۋاقىت جۇرگەنىن سۇرايدى»، - دەلىنگەن اقپاراتتا.
ەسكە سالساق، وسىعان دەيىن وسكەمەندە العاش رەت ناۋقاسقا «تاماقتىڭ حيميالىق كۇيىگى» دياگنوزى قويىلعانى حابارلانعان.
تالعاتجان مۇحامەتبەك ۇلى
