ورمۋز شايقاسى قايتا باستالدى
استانا. قازاقپارات - ورمۋز ءۇشىن قايتا شايقاس باستالدى. پەنتاگون كەمەلەرى اۋماقتى قورشاپ، كەشم ارالىنا سوققى جاسادى. بۇعازدا بىرنەشە تانكەر ورتەندى. يران دا قاراپ جاتقان جوق. كەيىنگى 5 كۇندە باحرەيندەگى ا ق ش بازالارىنا ءۇش رەت شابۋىلدادى. ال ا ق ش- يران سوعىسىن توقتاتۋ جونىندەگى كەلىسسوزدەردەن ءمان كەتتى.
ەسەسىنە سوققىلار جيىلەپ بارادى. كەي دەرەكتەرگە قاراعاندا يراننىڭ وڭتۇستىگىندەگى اۋە قورعانىس جۇيەلەرىن امەريكالىق دروندار ءدوپ كوزدەگەن.
«ا ق ش اسكەرى جويقىن كۇشپەن تاياۋ شىعىسقا تايادى. ۇشاق تاسىمالدىعىش ءۇشىنشى ءىرى كەمە اراب تەڭىزىنە كەلدى. انە-مىنە، پەنتاگون يرانعا الاپات سوققى جاساۋى مۇمكىن». الەمدىك جانە وڭىرلىك ب ا ق كەيىنگى كۇندەرى تەك وسىنداي حابار تاراتىپ جاتىر. ويتكەنى پەنتاگون شىعاناققا راسىندا مول اسكەر شوعىرلاندىرا باستادى. ءار كەمەدە كەمى 60-70 جويعىش ۇشاق پەن جۇزدەگەن درون بار. تاپ وسى ۇشقىشسىز ۇشۋ اپپاراتتارىنىڭ پارسى جەرىنە بارلاۋ جۇرگىزىپ، اۋە كەڭىستىگىنە ەنگەنى انىقتالدى. ءتىپتى ورمۋزعا جاقىن اۋماقتا اۋە قورعانىس جۇيەلەرىن جويعان بولۋى ابدەن مۇمكىن.
يسلام ساقشىلار كورپۋسى: «وسىدان سوڭ باحرەينگە اۋەدەن سوققى جاساپ، قارىمتا جاۋاپ بەردىك»، - دەيدى. بۇل - كەيىنگى بەس كۇن بەدەرىندە بولعان ءۇشىنشى جاعداي. كورولدىكتەگى امەريكالىق اسكەري بازا مەن راديولوكاتسيالىق جۇيەگە بۇل جولى ونداعان درون ۇشىرىلعان. ەلدىڭ قورعانىس جۇيەسى قاۋىپتىڭ بەتىن قايتارىپ، شابۋىلدى تويتاردى. دەگەنمەن مانامادا بىرنەشە رەت دابىل قاعىلدى. تۇرعىندار قاۋىپسىز جەر ىزدەپ شارق ۇردى. رەسمي تەگەران قۇراما شتاتتار تاراپىنان احۋال ودان ءارى شيەلەنىسە بەرسە، جويقىن جاۋاپ بولاتىنىن العا تارتتى. ءتىپتى «امەريكالىق نىساندارعا العاش بولىپ سوققى بەرۋگە دايىنبىز» دەپ ەسكەرتتى.
ال قاتار مەن ومان اراعايىن بولعان كەلىسسوزدەر ازىرگە ناتيجە بەرەر ەمەس. سوعان قاراماستان، يراننىڭ سىرتقى ىستەر ءمينيسترى كەشە ماسكاتقا بارىپ، بۇعان دەيىن ۆاشينگتونعا جولدانعان ۇسىنىستار ورىندالۋ كەرەگىن ەسكە سالدى. ونىڭ ىشىندە جەتى ماڭىزدى شارت بار. اتاپ ايتقاندا، بارلىق مايداندا سوعىستى توقتاتۋ، تەڭىز قۇرساۋىن الىپ تاستاۋ، سانكسيالاردىڭ كۇشىن جويۋ، بۇعاتتالعان اكتيۆتەردى قايتارۋ، ورمۋزدى يراننىڭ باقىلاۋىنا بەرىپ، قايتادان سوققى جاساماۋ نەگىزگى تالاپتار رەتىندە ەندى. وسىلار ورىندالعان جاعدايدا تەگەران اق ءۇي اكىمشىلىگىمەن كەلىسسوزدى ودان ءارى جالعاستىرۋعا دايار ەكەنىن اڭعارتتى.
ايتا كەتەيىك، بۇل مالىمدەمەگە ا ق ش تاراپى ازىرگە پىكىر بىلدىرگەن جوق. تەك بۇعازدا ەركىن كەمە قاتىناسىن قالپىنا كەلتىرۋ ءۇشىن قوسىمشا اسكەر جىبەرىپ جاتقانىن مالىمدەگەن. ايتپاقشى، وسى تۇندە كۋۆەيتتە دە دابىل قاعىلدى. ەلدىڭ باس قالاسىندا ءبىرقاتار جارىلىس بولدى. ءبىراق شابۋىلدى يران جاسادى ما، باسقا ما ازىرگە بەلگىسىز.