نورۆەگيادا زەينەتكە شىعۋ جاسىن 70 جاسقا دەيىن كوتەرۋگە كىرىستى

استانا. KAZINFORM - نورۆەگيا بيلىگى 2029 -جىلدان باستاپ مەملەكەتتىك زەينەتاقى الۋ جاسىن كەزەڭ-كەزەڭىمەن كوتەرۋدى ۇسىنىپ وتىر. جاڭا ۇسىنىسقا سايكەس، زەينەتكە شىعۋ شەگى ازاماتتاردىڭ ءومىر ءسۇرۋ ۇزاقتىعىنىڭ ارتۋىنا بايلانىستى وزگەرىپ وتىرادى، دەپ حابارلايدى شينحۋا اگەنتتىگى.

Норвегияда зейнетке шығу жасын 70 жасқа дейін көтеруге кірісті
Фото: unsplash.com

ۇسىنىس بويىنشا، قازىرگى 67 جاستاعى ستاندارتتى زەينەتكە شىعۋ جاسىنىڭ ورنىنا ءومىر ءسۇرۋ ۇزاقتىعىنا قاراي ۇلعايىپ وتىراتىن كورسەتكىش ەنگىزىلەدى. سونىمەن قاتار زەينەتاقى الۋعا بولاتىن ەڭ تومەنگى جاس تا كوتەرىلەدى. قازىر بۇل كورسەتكىش 62 جاستى قۇرايدى.

جاڭا وزگەرىستەر ءبىرىنشى كەزەكتە 1967 -جىلى تۋعان ازاماتتارعا اسەر ەتەدى. ولار ءۇشىن زەينەتكە شىعۋ جاسىنا قاتىستى شەكتەر شامامەن ءۇش ايعا ۇلعايادى. ال ءومىر ءسۇرۋ ۇزاقتىعىنا قاتىستى قازىرگى بولجامدار ساقتالسا، 1990 -جىلداردىڭ سوڭىندا تۋعان ادامدار ستاندارتتى زەينەتاقىنى شامامەن 70 جاستان باستاپ الا الادى. زەينەتاقىنى مەرزىمىنەن بۇرىن الۋ جاسى شامامەن 65 جاسقا دەيىن كوتەرىلۋى مۇمكىن.

ۇكىمەت ۇزاق جىلدار بويى ەڭبەك ەتىپ، زەينەتكە ەرتە شىعۋعا ءماجبۇر بولعان ازاماتتارعا ءومىر بويى تولەنەتىن قوسىمشا ۇستەماقى ەنگىزۋدى دە ۇسىنىپ وتىر. بۇدان بولەك، مۇگەدەكتىگى بويىنشا جاردەماقى الاتىن جانە ەڭ تومەنگى زەينەتاقىعا كۇن كورەتىن ادامداردىڭ تولەمدەرىن جاقسارتۋ شارالارى قاراستىرىلعان.

ۇسىنىس بويىنشا قوعامدىق تالقىلاۋ 2027 -جىلعى 17- اقپانعا دەيىن جالعاسادى. ۇكىمەت زاڭ جوباسىن 2027 -جىلدىڭ كوكتەمىندە پارلامەنتكە ەنگىزۋدى جوسپارلاپ وتىر.

ايتا كەتەيىك، بۇعان دەيىن قازاقستان جىل سايىنعى Marsh جانە CFA Institute ازىرلەيتىن Global Pension Index 2026 جاھاندىق زەينەتاقى يندەكسىندە 55 ەلدىڭ اراسىندا 64,8 ۇپايمەن 29-ورىنعا تۇراقتاعان ەدى.