ورتالىق ازياداعى ەڭ جوعارى جالاقى الاتىن ەل اتالدى
استانا. KAZINFORM - قازاقستان ورتالىق ازيا ەلدەرى اراسىندا ورتاشا جالاقىنىڭ سوماسى بويىنشا كوش باستاپ تۇر.

Ranking.kz مالىمەتىنە قاراعاندا، ت م د مەملەكەتارالىق ستاتيستيكالىق كوميتەتى جاريالاعان سالىستىرمالى مالىمەتتەرگە سايكەس، بىلتىرعى قىركۇيەك ايىندا ەلدەگى ورتاشا نومينالدى جالاقى 817,2 دوللاردى قۇرادى، بۇل كورسەتكىش وزبەكستانداعى (437,8 دوللار) نەمەسە قىرعىزستانداعىدان (411,2 دوللار) ەكى ەسە شاماسىندا ارتىق. تاجىكستان قازاقستاننان ودان دا كوپ ارتتا قالدى - وسى ەلدەگى جالاقى 3,4 ەسەگە از (242,8 دوللار). ءبىر جىل ىشىندە ورتالىق ازيانىڭ وڭتۇستىك-شىعىسىنداعى وسى مەملەكەتتە ورىن العان ەلەۋلى ءوسىم بولماسا، قازاقستان مەن تاجىكستان اراسىنداعى الشاقتىق بۇدان دا جوعارى دەڭگەيدە قالىپتاسۋى مۇمكىن ەدى.
دەرەككوزگە سايكەس، تاجىكستاندا 2024 -جىلدىڭ قىركۇيەگىندە نومينالدى جالاقى جىلدىق ماندە 24,9 پايىزعا، ناقتى جالاقى 21,1 پايىزعا ءوستى. بۇل وڭىردەگى ەڭ جوعارى جالاقى يندەكسى دەپ اتاپ وتۋگە بولادى.
قازاقستاندا، قىرعىزستاندا جانە وزبەكستاندا ديناميكا ءبىرشاما قاراپايىم بولدى. تۇرىكمەنستانداعى رەسمي نومينالدى جالاقى تۋرالى ءدال قازىرگى دەرەكتەر جوق. تۇرىكمەنستاننىڭ مەملەكەتتىك ستاتيستيكا كوميتەتىنىڭ سايتىندا مۇنداي اقپارات سوڭعى رەت 2023-جىلى جاڭارتىلعان.
قازاقستاندا ەڭ تومەنگى جالاقى دا جوعارى. 2024 -جىلى 85 مىڭ تەڭگە، ياعني 181,1 دوللار بولعان.
ورتالىق ازيا ءوڭىرىنىڭ باسقا ەلدەرىندە بۇل كورسەتكىشتەر ايتارلىقتاي تومەن بولدى: وزبەكستاندا - 89,4 دوللار، تاجىكستاندا - 54,9 دوللار، قىرعىزستاندا - 28,3 دوللار.
تۇرىكمەنستانداعى ەڭ تومەنگى جالاقى دوللارمەن ەسەپتەگەندە جوعارى بولىپ كورىنۋى مۇمكىن (402,9 دوللار). دەگەنمەن، بۇل اقپاراتتى ءبىر ءماندى جاريالاۋعا كەلمەيدى. 1410 ماناتتى قۇرايتىن ەڭ تومەنگى جالاقىنى ايىرباستاۋ تۇرىكمەنستاننىڭ ۇلتتىق بانكى ۇسىنعان رەسمي دوللار باعامى بويىنشا جۇرگىزىلگەن. بۇل دەرەككوزگە سايكەس، وسى ەلدەگى 1 ا ق ش دوللارى بەس جىلدان استام ۋاقىت بويى 3,5 تۇرىكمەن ماناتىنا تەڭ بولدى. الايدا، كوپتەگەن ساراپشىلاردىڭ سۇحباتتارىنا قاراعاندا، تۇرىكمەنستان ىشىندە ماناتتى بۇل باعاممەن اۋىستىرۋ ءىس جۇزىندە مۇمكىن ەمەس. بۇل ەلدەگى ۆاليۋتانى ساتىپ الۋ جانە ساتۋ وپەراتسيالارى «كولەكەلى نارىقتاعى» باعاممەن جۇزەگە اسىرىلادى.
ۇلتتىق ستاتيستيكا ۆەدومستۆولارىنىڭ ستاتيستيكالىق ەسەپتەرىنە سۇيەنە وتىرىپ، ranking.kz ورتالىق ازيا ەلدەرىندەگى ەكونوميكانىڭ ءارتۇرلى سالالارىنداعى نومينالدى جالاقىنى سالىستىردى. مالىمەتتەر ورتاشا جالاقى تومەن نەمەسە جوعارى بولاتىن ەكونوميكالىق قىزمەت تۇرلەرىن انىقتاۋعا مۇمكىندىك بەردى. بۇل تۇرعىدا جەكەلەگەن سالالارداعى تابىستار سالىستىرىلدى.
جالپى، ورتالىق ازيانىڭ ءتورت ەلىندەگى ەڭ جوعارى نومينالدى جالاقى قارجى جانە ساقتاندىرۋ سەكتورلارىندا بايقالدى. بۇل رەتتە ەلدەر اراسىنداعى كورسەتكىشتەردىڭ ايىرماشىلىعىنا توقتالساق، قازاقستاندا قارجىگەرلەر مەن ساقتاندىرۋشىلاردىڭ جالاقىسى 1,7 مىڭ دوللاردان اسقان، ياعني تاجىكستانداعىدان (561,9 دوللار) ءۇش ەسە كوپ.
قازاقستاندا قارجى جانە تاۋ-كەن ونەركاسىبى ەڭ جوعارى جالاقى الاتىن سالالار رەتىندە بەلگىلى. تاجىكستاندا قارجى سەكتورى كومپانيالارىنىڭ قىزمەتكەرلەرىنەن باسقا، وڭدەۋ ونەركاسىبى مەن قىزمەت كورسەتۋ كاسىپورىندارىنىڭ قىزمەتكەرلەرى جاقسى تابىسقا كەنەلگەن. وزبەكستاندا قارجى جانە IT- سالادا جوعارى (1 مىڭ دوللاردان استام) جالاقى تىركەلگەن. وسىنداي ءۇردىس قىرعىزستاندا دا بايقالدى.
اتاپ ايتقاندا، ورتالىق ازيا ەلدەرىندە ازاماتتاردىڭ جالاقىسى ەڭ تومەن بولعان سەكتورلار ءىشىنارا ۇقساس كەلەدى. ءبىلىم جانە دەنساۋلىق ساقتاۋ، اگروونەركاسىپتىك كەشەن جانە كوممۋنالدىق سالا تومەن جالاقىمەن سيپاتتالادى.
ورتالىق ازيا ەلدەرى ازاماتتارى تابىسىنىڭ ساتىپ الۋ قابىلەتىنە جالاقى مولشەرى دە، ينفلياتسيا دەڭگەيى دە قاتتى اسەر ەتەدى. ت م د مەملەكەتارالىق ستاتيستيكالىق كوميتەتىنىڭ ەسەپتەرىنە قاراعاندا، باعانىڭ ەڭ جوعارى ءوسۋ قارقىنى ءوڭىردىڭ ەكونوميكالىق دامىعان ەلدەرى - قازاقستان مەن وزبەكستاندا بايقالدى.
بۇعان دەيىن ق ر پرەمەر-ءمينيسترى ولجاس بەكتەنوۆ ۇكىمەت وتىرىسىندا قىتاي مەن ەۋروپانىڭ اراسىنداعى جۇك ترانزيتىنە قىزمەت كورسەتۋ ءۇشىن ورتالىق ازيانىڭ ءوز ىشىندە باسەكە ءورشي باستاعانىن ايتتى.
اۆتور
رۋسلان عابباسوۆ