«ورتالىق ازيا-يتاليا» سامميتى اياسىندا توقايەۆ پەن بەردىمۇحامەدوۆ كەزدەستى

استانا. KAZINFORM - مەملەكەت باسشىسى تۇرىكمەنستان پرەزيدەنتى سەردار بەردىمۇحامەدوۆپەن كەزدەستى، دەپ حابارلايدى اقوردانىڭ باسپا ءسوز قىزمەتى.

قاسىم-جومارت توقايەۆ تۇرىكمەنستان پرەزيدەنتىنە ءىلتيپات بىلدىرە وتىرىپ، ونىڭ ءبىرىنشى «ورتالىق ازيا - يتاليا» سامميتىنە قاتىسۋى مەملەكەت ارالىق كوپقىرلى قارىم-قاتىناستاردى ودان ءارى ىلگەرىلەتۋ تۇرعىسىنان ماڭىزدى ەكەنىن اتاپ ءوتتى.

- ەكى ەل اراسىنداعى ىنتىماقتاستىقتى دامىتۋعا باسا ءمان بەرەمىز. ەكونوميكالىق بايلانىستاردا ناقتى ناتيجەلەرگە قول جەتكىزەمىز دەپ ەسەپتەيمىن. باسقا دا سالالار بويىنشا، اسىرەسە، مادەني-گۋمانيتارلىق باعىتتا ىقپالداستىق قارقىندى دامىپ كەلەدى. كۇن تارتىبىندەگى جوبالاردى جۇزەگە اسىرۋعا قوس تاراپ تا كۇش جۇمىلدىراتىنىن ەسكەرسەك، ءوزارا ءتيىمدى قارىم-قاتىناستىڭ كەلەشەگى زور، - دەدى مەملەكەت باسشىسى.

پرەزيدەنتتىڭ پىكىرىنشە، قازىر استانا مەن اشحاباد اراسىنداعى ىنتىماقتاستىق وركەندەپ، كوپتەگەن نەگىزگى سالالاردا وڭ ديناميكا بايقالادى.

سەردار بەردىمۇحامەدوۆ قاسىم-جومارت توقايەۆقا قوناقجايلىق تانىتقانى جانە «ورتالىق ازيا - يتاليا» سامميتىن تابىستى وتكىزگەنى ءۇشىن العىس ايتتى.

- ورتالىق ازيا ەلدەرى مەن يتاليا جوعارى دەڭگەيدەگى وسىنداي فورماتتا تۇڭعىش رەت كەلىسسوز جۇرگىزىپ وتىر. سامميت قورىتىندىسى مەملەكەتتەرىمىز اراسىنداعى ىنتىماقتاستىقتى كەڭەيتۋگە ىقپال ەتەتىنىنە سەنىمدىمىن، - دەدى تۇرىكمەنستان پرەزيدەنتى.

كەزدەسۋدە قاسىم-جومارت توقايەۆ حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆكە ىستىق ىقىلاسىن جولداپ، ونىڭ جاۋاپتى قىزمەتىنە تولاعاي تابىس تىلەدى.