وردا بۇزار جاس وتىز ەكەندىگىن الەم عالىمدارى دالەلدەدى

 استانا. قازاقپارات - سولتۇستىك باتىس ۋنيۆەرسيتەتىنىڭ ەكونوميستەرى بەندجامين دجونس پەن بريۋس ۆاينبەرگ ادامدارعا دانىشپاندىق قاي جاس شاماسىندا كەلەتىنىن انىقتادى.

 عالىمدار 500 دەن استام نوبەل لاۋرەاتتارى مەن شامامەن 300 دەي 20-عاسىردىڭ ايگىلى ونەر تاپقىشتارى تۋرالى دەرەكتەردى ساراپقا سالعان.

مامانداردىڭ انىقتاۋىنشا، ولاردىڭ 96 پايىزى ءوز جاڭالىقتارىن 26 جاستان اسقان شاقتارىندا اشقان. ال عالىمداردىڭ كوبىسى سۇبەلى ەڭبەكتەرىن 30-40 جاسىندا جازعان، دەپ جازادى «ەۆروسمي». دەمەك قازاقتار وتىزدى «وردا بۇزار جاس» دەپ باعالاعانى بەكەر ەمەس.

امەريكالىق ەكونوميستەردىڭ سوزىنە قاراعاندا، ءار سالانىڭ ءوز «دانىشپاندىق جاسى» بولادى ەكەن. سونىمەن، دجونس پەن ۆاينبەرگتىڭ ەسەبىنشە، فيزيكا سالاسىندا جاڭالىق اشقانداردىڭ ورتاشا جاسى - 30، حيميا سالاسىندا - 39، فيزيولوگيادا - 41.

جالپى العاندا، 20-عاسىرداعى «دانىشپاندىق جاس» ورتاشا ەسەپپەن 39 جاستى قۇرادى.