ورازا ۇستاعاندار قانداي سپورتپەن اينالىسقانى دۇرىس
الماتى. KAZINFORM - الماتى قالالىق №36 ەمحانانىڭ جالپى تاجىريبە دارىگەرى ءمولدىر الىمبايەۆا رامازان ايىندا اۋىز بەكىتكەن ادامداردىڭ سپورتپەن قالاي دۇرىس اينالىسۋ كەرەك ەكەنىن ايتىپ بەردى.
دارىگەردىڭ سوزىنشە، ورازا كەزىندە ءبىرقالىپتى فيزيكالىق بەلسەندىلىك دەنساۋلىققا وڭ اسەر ەتەدى. دەگەنمەن، ءار ادام ءار ءتۇرلى ەكەنىن ەستە ۇستاعان ءجون، سول سەبەپتى ورازا كەزىندە جاتتىعۋدى باستاماس بۇرىن دارىگەرمەن كەڭەسىپ العان ارتىق ەتپەيدى.
«ورازا كەزىندە مەن ءبىرقالىپتى سپورت ءتۇرىن تاڭداۋدى ۇسىنامىن. جوعارى قارقىندى جاتتىعۋلاردان اۋلاق بولعان دۇرىس. ونىڭ ورنىنا يوگا، پيلاتەس، ءجۇرۋ نەمەسە تازا اۋاداعى جاتتىعۋلارعا ارتىقشىلىق بەرۋ كەرەك. ءوز تانىڭىزگە كوڭىل ءبولىپ، ءوزىڭىزدى شامادان تىس قيناماۋىڭىز كەرەك. جاتتىعۋلار اراسىندا دەمالىس جاساپ وتىرۋ كەرەك. قاتتى تەرلەمەگەن دۇرىس. اۋىز اشقان سوڭ، جەتكىلىكتى مولشەردە سۋ ءىشۋ ماڭىزدى. قانداي دا ءبىر ىڭعايسىزدىق نەمەسە السىزدىك سەزىنسەڭىز، جاتتىعۋدى دەرەۋ توقتاتىڭىز»، - دەيدى دارىگەر.
ەگەر اۋىز بەكىتكەن ادام كاسىپقوي سپورتشى بولسا، وندا جاتتىعۋدان سوڭ بىردەن سۋ ءىشۋ ءۇشىن اۋىز بەكىتەر الدىندا جانە اۋىزاشار الدىندا جاتتىعۋ جاساعانى دۇرىس.
«رامازان ايى اياقتاعالعان سوڭ، اعزانى قاجەتتى قورەكتىك زاتتارمەن قامتاماسىز ەتۋ ءۇشىن دۇرىس تاماقتانۋ كەرەك. بۇل رەتتە تاڭعى اس پەن كەشكى استا اس قورىتۋعا وڭاي جانە قۇرامىندا كوپ مولشەردە كوكونىس، اقۋىزى بار تاعامدار (ەت، جۇمىرتقا، بۇرشاق داقىلدارى) جانە پايدالى مايلار (مايلار، جاڭعاقتار، داندەر) بولۋى كەرەك. بۇل ۋاقىتتا مايلى، اشى جانە ءتاتتى تاعامداردى شەكتەپ، ارتىق تاماقتانباعان دۇرىس. ادام جانى مەن ءتانىنىڭ ساۋلىعىن ويلاۋ يسلام ءدىنىنىڭ نەگىزگى قاعيداسى ەكەنىن ەستە ۇستاعان ءجون. مامانداردىڭ ۇسىنىسىن ورىنداپ، قولايلى سپورت ءتۇرىن تاڭداۋ ارقىلى ءسىز ورازا كەزىندە دەنە شىنىقتىرۋمەن اينالىسىپ، دەنەڭىز بەن رۋحاني ءال-اۋقاتىڭىزدى نىعايتا الاسىز»، - دەپ اتاپ ءوتتى ءمولدىر الىمبايەۆا.
اۆتور
دۋمان ارعىنگەلدى
