ورالدىق لابرادور ءىزشىل يتتەردىڭ ۇشتىگىنە ەندى
استانا. قازاقپارات - ورالدىق قۇتقارۋشىلاردىڭ ءيىسشىل ءيتى جۋىردا وتكەن «قازقۇتقارۋ-2024» رەسپۋبليكالىق بايقاۋىندا ەكىنشى ورىن الدى.
«دجەسسي» اتتى لابرادوردىڭ جوعالعان جانداردى ىزدەپ تابۋداعى ۇلەسى زور. جىل باسىندا ءدامحاندا بولعان جارىلىس كەزىندە دجەسسي ءۇيىندى استىندا قالىپ قازا تاپقان ادامنىڭ قاي جەردە جاتقانىن ءدال كورسەتكەن.
مىنا ءيتتىڭ اتى دجەسسي. سان مارتە بوراندى-تۇماندى كۇندەرى ورماندا، دالادا جوعالعان جاندارعا جاڭىلماي ىزدەپ بارىپتى. «اداسقان ادامداردى تەز ارادا تابۋعا ءىزشىل يتتەردىڭ كومەگى كوپ»، - دەيدى قۇتقارۋشىلار.
راشيد نۇرعاليەۆ، وبلىستىق ت ج دەپارتامەنتىنىڭ جەدەل-قۇتقارۋ جاساعىنىڭ باسشىسى:
- قىستا بوراندى كۇندەرى وسى يتپەن تالاي ىزدەستىرۋ شارالارىنا شىقتىق. قار استىندا نەمەسە وزگە دە كوزگە كورىنبەيتىن قالتارىستا قالعان اداسقان ادامداردى ىزدەپ تابۋدا يتتەرگە ەشنارسە جەتپەيدى. جالپى قىزمەتتىك يتتەردىڭ ەڭبەك ءوتىلى 10 جىلعا دەيىن. دجەسسي قازىر 8 قار باستى. ەندى 3-4 جىلدان كەيىن زەينەتكە شىعارامىز.
جوعالعان جانداردى ىزدەپ تابۋدا يتتەردىڭ جوعارى ناتيجە كورسەتۋى ارينە كينولوگتىڭ ەڭبەگى. اسان نيازوۆ دجەسسيدى 4 ايلىعىندا ساتىپ الىپتى. سودان بەرى تىنباي جاتتىقتىرىپ كەلەدى. ءار جىل سايىن سەريفيكاتتاۋدان وتكىزىپ، ءيتتىڭ ءيىس سەزۋ قابىلەتىن كينولوگ ساراپشىلار الدىندا دالەلدەيدى. سول جۇيەلى جۇمىستىڭ جەمىسى شىعار لابرادور وسى قىستا كافەدەگى جارىلىس كەزىندە ءۇيىندى استىنان قازا بولعان جاندى ءدال تاۋىپتى.
قىركۇيەك ايىندا الماتىدا وتكەن «قازقۇتقارۋ- 2024» رەسپۋبليكالىق بايقاۋىندا ورالدىق قۇتقارۋشىلاردىڭ كومانداسى ەكىنشى ورىندى جەڭىپ الىپتى.
24.kz
