ورالدا وتكەن رەسپۋبليكالىق ايتىستا جۇلدە اقىندارعا تەڭ ءبولىندى
ورال قالاسىنداعى «اتامەكەن» ونەر ورداسىندا «ازاتتىقتىڭ اق تاڭى» اتتى رەسپۋبليكالىق اقىندار ايتىسى مارەسىنە جەتتى، دەپ حابارلايدى Kazinform.
ب ق و اكىمدىگى، وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن قادىر مىرزا ءالي اتىنداعى وبلىستىق مادەنيەت جانە ونەر ورتالىعى جانە «ايتىس اقىندارى مەن جىرشى-تەرمەشىلەردىڭ حالىقارالىق وداعى» ب ق و فيليالى بىرلەسە ۇيىمداستىرعان جىر دوداسىنا قازاقستاننىڭ وڭىرلەرىنەن 16 اقىن قاتىسىپ، باق سىنادى.
ايتىس الدىندا «وتان» وردەنىنىڭ يەگەرى، ق ر ەڭبەك سىڭىرگەن قايراتكەرى، قازىلار القاسىنىڭ ءتوراعاسى ءجۇرسىن ەرمان اقىندارعا اق باتاسىن بەرىپ، ساتتىلىك تىلەدى.
ايتىستى جۇرگىزگەن قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، ءماجىلىس دەپۋتاتى امانجول ءالتاي اتاپ وتكەندەي، مەملەكەتىنىڭ مەرەيىن قالايتىن، وتان دەسە، جۇرەگى لۇپىلدەيتىن ءار ازاماتقا تاۋەلسىزدىكتەن قاستەرلى، ودان قۇندى ەشتەڭە جوق.
«وسى ايتىستىڭ الىپ دالامىزدىڭ باتىستاعى بايتاق ولكەسى - جايساڭ جايىقتىڭ جاعاسىندا، وردالى ورالدىڭ تورىندە ءوتۋىنىڭ ۇلكەن سەبەبى بار. جىل باسىنان بەرى قازاق دالاسىنىڭ تۇكپىر- تۇكپىرىندە ايتىستىڭ نەبىر الاماندار وتكىزىلدى. سول ءدۇبىرلى دودالاردا جايىقتىڭ جاعاسىنان شىققان باۋىرجان حاليوللا باستاعان باتىس قازاقستان وبلىسى اقىندارىنىڭ مەرەيى ۇستەم، ەڭسەسى بيىك بولدى. ءبىر عانا مىسال، «اسىل دومبىرا» ايتىسىنىڭ قورىتىندى ەسەبىندە باتىس قازاقستان كومانداسىنىڭ باس بايگە يەلەنۋى وسىعان دالەل. سوندىقتان جىلدىڭ قورىتىندى ايتىسىن ورالدا وتكىزۋدى ءجون كوردىك»، - دەدى ا. ءالتاي.
سونداي- اق ايتىسقا كەلگەن وبلىس اكىمىنىڭ ورىنباسارى باقىتجان نارىمبەتوۆ ءسوز الدى.
«ەلىمىز ەگەمەندىك الىپ، ەڭسەسىن تىكتەگەن 32 جىل ىشىندە قول جەتكىزگەن جەتىستىكتەرىمىز بارشىلىق. مەملەكەت دەڭگەيىندە جۇزەگە اسىپ جاتقان تاريحي شەشىمدەر مەن تابىستى قادامدار كەۋدەسىندە جانى، بويىندا قانى بار كەز كەلگەن قانداسىمىزدى، وتانداسىمىزدى ويلاندىرىپ، تولعاندىرارى انىق. مەملەكەتىمىزدىڭ باعىندىرۋى ءتيىس اسقاق ارمانى مەن ۇلى مۇراتتارىن رەسپۋبليكامىزدىڭ بەلگىلى اقىندارى حالىقتىڭ جۇرەگىنە جەتكىزەدى دەپ سەنەمىز»، - دەدى ب. نارىمبەتوۆ.
ساحنا شىمىلدىعىن كوپتەن بەرى كورىنبەي كەتكەن اتىراۋلىق شىناربەك قابيەۆ پەن ارقالىق قالاسىنان كەلگەن ايتىستىڭ اقتاڭگەرى ايبەك قاليەۆ اشتى. «بوستاندىقتان اساتىن باقىت بار ما، ازاتتىقتان اساتىن بايلىق بار ما!» دەگەن قوس اقىننىڭ ءسوزىن باتىسقازاقستاندىق اينابەك بيسەنعاليەۆ پەن الماتىلىق شۇعايىپ سەزىمحان جالعاستىرىپ، ەل ەسىندە قالۋى ءتيىس ۇلت باتىرلارىنا قۇرمەت كورسەتۋ كەرەكتىگىن اتاپ ءوتتى.
شىمكەنتتىك ءبىرجان بايتۋوۆ پەن اقتوبەلىك قاينار الاگوزوۆ ناعىز قۇرداستارعا ءتان ءازىل- قالجىڭمەن ءسوز تالاستىرا ءبىلدى. قاراعاندىلىق ايتباي جۇماعۇلوۆ پەن باتىسقازاقستاندىق باۋىرجان شيرمەدين ۇلى ەلدىك پەن ەرلىك ماسەلەلەرىنە كوبىرەك بەت بۇردى. ماڭعىستاۋلىق اباي جولماعامبەتوۆپەن ساحناعا كوتەرىلگەن باتىسقازاقستاندىق مەيىرمان شاكەنوۆ، اسىرەسە اۋىلداردا جول قاتىناسى، ادامداردىڭ قالاعا كوشۋى سىندى تۇيتكىلدى جايتتاردىڭ شەشىلمەي وتىرعانىن تىلگە تيەك ەتتى. باتىسقازاقستاندىق مۇرادىم ميرلانوۆ پەن اقتوبەلىك جۇلدىز قوجابەكوۆا قىز بەن جىگىتتىڭ ايتىسىن تارتىمدى جاسادى دەۋگە بولادى.
ب ق و- نىڭ تاعى ءبىر وكىلى تالعات مىقي مەن اتىراۋلىق شالقارباي ءىزباساروۆ تاۋەلسىزدىك، ەل مەن جەر قادىرى تۋرالى ولەڭ شۋماقتارىن قۇرداستىق ازىلدەرمەن تۇزدىقتاپ وتىردى. دودانىڭ ەڭ سوڭىندا شىققان قىزىلوردالىق مۇحتار نيازوۆ پەن باتىسقازاقستاندىق جانسايا مۋسينا تاقىرىپتى تەرەڭ تولعاپ، اراسىندا قالجىڭ قوسىپ، جۇرتشىلىقتى ءبىر سەرپىلتىپ تاستادى.
قازىلار القاسىنىڭ شەشىمىمەن ايتىسقا قاتىسقان اقىنداردىڭ بارىنە ب ق و اكىمىنىڭ العىسحاتى تاپسىرىلىپ، 500 مىڭ تەڭگەدەن سىياقى بەرىلدى.
سونىمەن قاتار قىرىق جىل بويى ايتىستى ورگە سۇيرەپ كەلە جاتقان ءجۇرسىن ەرمانعا دا اق جايىق ەلى اتىنان ەرەكشە قۇرمەت كورسەتىلدى.
اۆتور
عايساعالي سەيتاق
