ورالدا جاۋىنگەر جالعىز ءوزى 30-عا جۋىق ادامدى تاسقىننان امان الىپ شىقتى
ورال. KAZINFORM - ورال قالاسىندا 5517 اسكەري ءبولىمىنىڭ قىزمەتكەرى ماۋلەن مارلەنوۆ سۋ تاسقىنى كەزىندە قيىن جاعدايعا تاپ بولعان تۇرعىندارعا دەر كەزىندە كومەككە كەلدى.
ق ر ۇلتتىق ۇلانى «باتىس» وڭىرلىك قولباسشىلىعىنىڭ باسپا ءسوز قىزمەتىنەن ءمالىم ەتكەندەي، ماۋلەن توپان سۋدىڭ ورتاسىندا ادامدار تيەلگەن جۇك كولىگىنىڭ باتىپ بارا جاتقانىن بايقايدى.
سودان كەيىن ونى ءوز كولىگىنىڭ كۇشىمەن تارتىپ شىعارىپ، 30-عا جۋىق ادامدى قاۋىپسىز جەرگە جەتكىزۋگە سەپتىگىن تيگىزدى.
«بىزگە بەكىتىلگەن ايماقتا تۇرعىنداردى ەۆاكۋاتسيالاۋ جۇمىستارىن اتقارىپ جۇرگەنمىن. ءبىر مەزەتتە 30-عا جۋىق تۇرعىندى ەۆاكۋاتسيالاۋعا تىرىسقان جۇك كولىگى سۋ ورتاسىندا باتىپ قالعانىن كوردىم. كوپ ويلانباستان سول كولىكتى ءوز كولىگىمە تىركەپ، قاۋىپسىز ايماققا شىعاردىم»، - دەدى م. مارلەنوۆ.
قازىرگى تاڭدا باتىس قازاقستان وبلىسىندا تاسقىن سۋمەن كۇرەسكە ۇلتتىق ۇلاننان 1 مىڭعا جۋىق سارباز، 40 تەحنيكا جۇمىلدىرىلعان.
ولار تۇرعىنداردى ەۆاكۋاتسيالاۋمەن قاتار وزەن جاعالاۋىندا بوگەتتەردى بەكىتۋ جۇمىستارىنا اتسالىسۋدا.
ەسكە سالا كەتەيىك، بۇدان بۇرىن جايىق وزەنىندەگى سۋ دەڭگەيى ورالدا ءبىر تاۋلىكتە 13 سانتيمەترگە كوتەرىلگەنىن جازعان ەدىك.
ورال قالاسى اكىمدىگى قاۋىپتى ايماق تۇرعىندارىنا كوشۋگە دايىن بولۋ كەرەكتىگىن ەسكەرتتى.
ورال تۇرمەسىندە سوتتالۋشىلار ەلىمىزدىڭ باسقا وڭىرلەرىنە كوشىرىلدى.
اۆتور
عايساعالي سەيتاق
