ورال توڭىرەگىندەگى ساياجايلار سۋعا كەتىپ جاتىر

ورال. KAZINFORM - ورال قالاسى توڭىرەگىندەگى ساياجايلار سۋعا كەتىپ جاتىر.

ورال قالاسى ت ج باسقارماسىنىڭ باستىعى امانگەلدى ەشمۇحانوۆتىڭ ءمالىم ەتكەنىندەي، بۇگىن زاچاگان كەنتىندەگى جايىق وزەنى جايىلماسىندا ورنالاسقان «ستەنوۆيك» باۋ-باقشا سەرىكتەستىگىندە قالعان ادامداردى ەۆاكۋاتسيالاۋ جۇمىستارى جۇرگىزىلۋدە.

ونىڭ سوزىنە قاراعاندا، مۇندا 820 جەر تەلىمى بار.

«اتالعان باۋ-باقشا سەرىكتەستىگىندە 190 وتباسى قىسى-جازى تۇرادى. مۇنداعى تۇرعىنداردىڭ باسىم بولىگى الدىن الا كوشىرىلدى. ءوز ءۇيى مەن جەر تەلىمدەرىن كۇزەتكەن ساناۋلى ادامدار قالعان. قازىرگى كەزدە ب ق و پوليتسيا دەپارتامەنتىمەن بىرگە ولاردى ءماجبۇرلى تۇردە ەۆاكۋاتسيالاۋ جۇرگىزىلۋدە»، دەدى ا. ەشمۇحانوۆ.

ب ق و ت ج دەپارتامەنتىنىڭ باسپا ءسوز قىزمەتىنەن الىنعان مالىمەتكە قاراعاندا، وڭىردە اپاتتىق-قۇتقارۋ جۇمىستارىنا 10663 ادام، 1927 تەحنيكا، 213 سۋ سورۋ قۇرالى، 197 قايىق جانە 5 تىكۇشاق جۇمىلدىرىلعان.

ەسكە سالا كەتەيىك، بۇدان بۇرىن باتىس قازاقستاندا 3300-گە جۋىق ساياجاي ءۇيى سۋعا كەتكەنىن، سونىڭ 2921- ءى ورال قالاسىنداعى وزەن جايىلمالارىندا ورنالاسقانىن جازعان بولاتىنبىز.

سونداي-اق ورال قالاسىندا جايىقتاعى سۋ دەڭگەيى قاۋىپتى شەكتەن اسىپ كەتتى.

اۆتور

عايساعالي سەيتاق