ورال قالاسىندا شەكارا قىزمەتى دەپارتامەنتىنىڭ ءبولىم باسشىسىنا ايىپپۇل سالىندى

ورال. KAZINFORM - ورال قالاسىندا جۇرگىزۋشى كۋالىگىنەن ايىرىلعانىنا قاراماستان، كولىك ايداپ جۇرگەن ب ق و بويىنشا شەكارا قىزمەتى دەپارتامەنتىنىڭ ءبولىم باسشىسى ۇستالدى.

ب ق و سوتىنان تۇسكەن مالىمەتكە قاراعاندا، س. دەگەن ازامات 2024 -جىلعى 14-مامىرداعى قاۋلىعا سايكەس ق ر اكىمشىلىك قۇقىق بۇزۋشىلىق تۋرالى كودەكسى 608-بابى 1-بولىگىنە (جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ) سايكەس كولىك قۇرالىن باسقارۋ قۇقىعىنان ايىرىلعان.

سوعان قاراماستان، دەپارتامەنتتىڭ ءبولىم باسشىسى بيىلعى 15-قىركۇيەكتە اۆتوكولىك ايداپ جۇرگەندە قولعا تۇسكەن.

«سوت وتىرىسىندا س. كولىك قۇرالىن باسقارۋ فاكتىسىن جوققا شىعارماي، جازانى ايىپپۇل تۇرىندەگى ءوندىرىپ الۋمەن شەكتەلۋدى سۇرادى. سوت تالقىلاۋى ونىڭ اتالعان كودەكستىڭ 612-بابى 3-بولىگىن بۇزعانىن كورسەتتى. بۇل ەلۋ ايلىق ەسەپتىك كورسەتكىش مولشەرىندە ايىپپۇل سالۋدى نەمەسە ون تاۋلىككە اكىمشىلىك قاماققا الۋدى كوزدەيدى. سوت كودەكستىڭ 44-بابىن، 829-14-بابى 1-بولىگىنىڭ 1-تارماعىن باسشىلىققا الا وتىرىپ، 612-بابى 3-بولىگى بويىنشا اكىمشىلىك قۇقىق بۇزۋشىلىق جاساعانى ءۇشىن س- نى كىنالى دەپ تاپتى. وعان 184,6 مىڭ تەڭگە كولەمىندە اكىمشىلىك ايىپپۇل سالىندى» ، - دەپ حابارلادى ۆەدومستۆودان.

ەسكە سالا كەتەيىك، بۇدان بۇرىن ورالدا سوت شەشىمىن ەلەمەگەن سالىق ورگانىنىڭ باسشىسى شىعىنعا قالعانىن جازعان ەدىك.

اۆتور

عايساعالي سەيتاق