ورال -استانا باعىتىمەن ۇشقان FlyArystan ۇشاعى قۇستارمەن سوقتىعىسىپ قالدى
استانا. قازاقپارات - 26 -قاڭتاردا ورال - استانا باعىتى بويىنشا FlyArystan FS 7366 اۋە كومپانياسىنىڭ رەيسىن ورىنداعان ۇشاق ورال قالاسىنىڭ اۋەجايىنان ۇشقان كەزدە قۇستارمەن سوقتىعىسقان.

ۇشاق جۇيەلەرى مەن قوزعالتقىشتارىنىڭ جۇمىسىندا اۋىتقۋلار بولماعاندىقتان، ەكيپاج ۇشۋدى جالعاستىرىپ، استانا قالاسىنىڭ اۋەجايىنا شتاتتىق رەجيمدە قونادى.

- ۇشاق كەلگەننەن كەيىن سول قوزعالتقىشتاعى كومپرەسسور قالاقشالارى مەن فيۋزەلياجدا كوپتەگەن زاقىمدانۋلار انىقتالدى. سونداي-اق قۇستاردىڭ قالدىقتارى قوزعالتقىشتا جانە باسقا جەرلەردە تابىلدى. ورال اۋەجايىندا وسىنداي وقيعالاردى بولدىرماۋ ماقساتىندا قۇستاردىڭ تۇرلەرىن انىقتاۋ ءۇشىن د ن ك- تەستىلەۋگە جىبەرىلەدى، - دەلىنگەن Air Astana كومپانياسىنىڭ حابارلاماسىندا.

حابارلامادا كورسەتىلگەندەي، 2024 -جىلى قۇستارمەن سوقتىعىسۋ دەرەگى 2023 -جىلمەن سالىستىرعاندا %30- عا كوبەيگەن. اتاپ ايتقاندا، Air Astana كومپانيالار توبى 203 وقيعا تىركەپتى.
ايتا كەتەيىك، اقتاۋداعى اۋە اپاتىنان كەيىن ەلدەگى ۇشاق ساپاسىنا نازار اۋدارىلا باستادى. دەپۋتاتتار سالاداعى كەمشىلىكتى اتاپ، اۋە كومپانيالارىنداعى شيكىلىكتى اشىق ايتىپ جاتىر.
اۆتور
ەلميرا ورالبايەۆا