وقۋشى قىز قازاق دالاسىنىڭ حوش ءيىسى بار ءاتىر ويلاپ تاپتى

Альбина Айдарханова
Фото: Оқу-ағарту министрлігі

استانا. KAZINFORM – اقمولا وبلىسى اقكول اۋدانىنداعى كەڭەس اۋىلىنىڭ 5-سىنىپ وقۋشىسى البينا ايدارحانوۆا ۇستازىمەن بىرگە قازاق دالاسىنىڭ حوش ءيىسى ساقتالعان ءاتىر شىعاردى. بۇل حوش ءيىس «ەلىم-اي» دەپ اتالادى.

مەكتەپ وقۋشىسىنىڭ ايتۋىنشا، ونى ەرەكشە حوش ءيىس جاساۋعا سۇلتان بەيبارىس تۋرالى اڭىزداعى «جۋساندا تۋعان جەردىڭ ءيىسى بار» دەگەن قاناتتى ءسوز شابىتتاندىرعان.

«وسىنداي ءسوزدى ەستىگەننەن كەيىن، تۋعان جەردىڭ ءيىسى بار ءاتىردى جاساپ شىعارعىم كەلدى. بۇل ءيىستى شىعارۋدا مەن ەجەلگى شىعۋ تەگىمىزدى زەردەلەدىم»، - دەيدى البينا ايدارحانوۆا.

وقۋشى ءوز جۇمىسىندا تابيعي ينگرەديەنتتەردى پايدالانعان. پارفيۋمەريا جاساۋداعى نەگىزگى ءونىم - تۋعان ولكەنىڭ قاسيەتتى جۇپارىنا اينالعان قاراپايىم جۋسان.

«ءبىز ءۇي جاعدايىندا ءاتىر جاساۋ تاسىلدەرىن زەرتتەدىك. العان بىلىمدەرىمىزدى پراكتيكادا قولدانۋ بارىسىندا جۋساننىڭ سان ءتۇرىن انىقتادىق. ەگەر ءاتىردىڭ نەگىزگى نوتاسى رەتىندە گۇلدەر قولدانىلسا، ءبىز ونىڭ ورنىنا قاراپايىم جۋساندى تاڭدادىق. سەبەبى ونىڭ تۇنباسى تابەتتى جاقسارتادى، اسقازان-ىشەك جولدارىنىڭ قىزمەتىن نىعايتادى، جۇيكە جۇيەسىن تىنىشتاندىرادى، ءتۇرلى شانشۋ مەن قۇرىسۋلاردى، اۋىرسىنۋدى باسادى، ءتىپتى تىنىش ۇيقىعا سەپتىگىن تيگىزەدى»، - دەيدى جوبا جەتەكشىسى، باستاۋىش سىنىپ ءمۇعالىمى جۇپار احمەتوۆا.

ايتا كەتەيىك، بۇل حوش ءيىس «ەلىم-اي» دەپ اتالادى. جاس ونەرتاپقىشتىڭ ايتۋىنشا، ءاتىردىڭ اتاۋى ەلىمىزدىڭ مادەنيەتىنە دەگەن سۇيىسپەنشىلىكپەن بايلانىستى. بەسىنشى سىنىپ وقۋشىسى جاقىندا وتكەن عىلىمي جوبالار بايقاۋىندا ءوز جۇمىسىن قورعاپ، «حيميا، بيولوگيا» سەكسياسىندا جۇلدەلى 3-ورىندى يەلەندى.

سوڭعى جاڭالىقتار