وقۋشى پلاستيكتى جويۋدىڭ ءادىسىن تاپتى

استانا. قازاقپارات - پلاستيك قالدىقتى بالاۋىز كوبەلەگىنىڭ كۇيەسىمەن قايتا وڭدەۋگە بولادى. تىڭ ءادىستى ماسكەۋلىك يۋريي مەلنيكوۆ ەسىمدى جەتىنشى سىنىپ وقۋشىسى ويلاپ تاپتى.

جەتكىنشەك زەرتتەۋدى 4 جىل بۇرىن باستاعان. كوپ ۇزاماي جاندىكتىڭ تەز كوبەيىپ، ارا ۇيالارىنان بالاۋىزدى عانا ەمەس، پوليەتيلەندى دە سىڭىرەتىنىن بايقاعان. ايتۋىنشا ءبىر كەلى كۇيە 40 كۇندە 5 كەلى پوليەتيلەندى جەپ تاۋىسا الادى. ياعني 3 ميلليون كۇيە ماسكەۋدە جىل بويى جينالاتىن قالدىقتى تۇك قالدىرماي كەمىرىپ، جويىپ جىبەرەدى.

جەتكىنشەكتىڭ جوباسىنا سكولكوۆ عىلىم جانە تەحنولوگيالار ينستيتۋتى قىزىعۋشىلىق تانىتىپ وتىر. عالىمدار بۇل ەكولوگيالىق جاڭالىقتىڭ بولاشاعى زور دەيدى. ورتالىق وسى تاسىلمەن ءبىرقاتار جوبا دايىنداۋعا كىرىستى.

يۋري مەلنيكوۆ، جوبا اۆتورى:

- عالىمداردىڭ ارنايى زەرتتەۋلەرىنەن ميكروپلاستيكتىڭ ءتىرى ورگانيزمدەرگە اسەرى بارىن جانە بەلگىسىز ءتىرى اعزانىڭ پوليەتيلەندى قايتا وڭدەي الاتىنىن بىلدىك. سودان وسى ورگانيزمدى تاۋىپ، زەرتتەۋ جۇرگىزىپ كوردىك. ناتيجەسىندە پوليەتيلەننىڭ وعان كەرى اسەرى جوعىن بايقاپ، پلاستيك قالدىقتاردى قايتا وڭدەۋ جۇمىسىنا پايدالانۋعا بولاتىنىن انىقتادىق.

الەكساندر چەكانوۆ، سكولكوۆ عىلىم جانە تەحنولوگيالار ينستيتۋتىنىڭ ينكۋباتسيالىق باعدارلامالار جونىندەگى جەتەكشىسى:

- ءبىز ءوندىرىس سالاسىنىڭ تاپسىرىس بەرۋشىلەرى ءۇشىن بىرنەشە ۇسىنىس ازىرلەپ جاتىرمىز. مىسالى، قايتا وڭدەۋگە جاتپايتىن جاپسىرمالارى بار پوليەتيلەن پاكەتتى جويۋ جوباسىن ايتۋعا بولادى. ول كومپانيالارعا وسىنداي قالدىقتاردى ونەركاسىپتىك اۋقىمدا وڭدەۋگە مۇمكىندىك بەرەدى.

www.24.kz