وقۋ-اعارتۋ مينيسترلىگى جۇزەگە اسىرىپ جاتقان جاڭا جوبا وقۋشىلارعا نە بەرەدى

الماتى. KAZINFORM - وقۋ-اعارتۋ مينيسترلىگى جوعارى سىنىپ وقۋشىلارىنا مەكتەپتەن كاسىبي ماماندىق يگەرىپ شىعۋعا مۇمكىندىك بەرەتىن پيلوتتىق جوبانى جۇزەگە اسىرىپ جاتىر.

Kazinform اگەنتتىگىنىڭ ساۋالىنا جاۋاپ بەرگەن ۆەدومستۆو ەلىمىزدىڭ 17 وڭىرىندە ىسكە قوسىلعان جوبا كادرلار دايارلاۋعا كوزدەلگەن جەرگىلىكتى بيۋدجەت ەسەبىنەن قارجىلاندىرىلاتىنىن حابارلادى.

وقۋ-اعارتۋ مينيسترلىگىنىڭ مالىمەتىنشە، باستاما مەكتەپتىڭ ءبىلىم بەرۋ جۇيەسىنىڭ پراكتيكالىق باعىتىن كۇشەيتۋگە جانە جاستاردىڭ جۇمىسقا ەرتە ورنالاسۋىنا مۇمكىندىك جاساۋعا باعىتتالعان. كاسىپتىك دايارلىق كوللەدجدەر بازاسىندا، ال جالپى ءبىلىم بەرۋ پاندەرىن مەڭگەرۋ مەكتەپتەردە وتەدى.

- 11-سىنىپتى بىتىرگەننەن كەيىن وقۋشىلار اتتەستات قانا ەمەس، ورتا تەحنيكالىق ءبىلىم تۋرالى ديپلوم دا الادى. پيلوتتىق جوباعا 150-گە جۋىق كوللەدج بەن مەكتەپ، 2 مىڭعا جۋىق وقۋشى قاتىسىپ جاتىر، - دەلىنگەن ۆەدومستۆو جاۋابىندا.

رەسمي مالىمەتكە سايكەس، جوعارى سىنىپ وقۋشىلارى ەڭبەك نارىعى ءۇشىن قاجەتتى باعىتتار بويىنشا ءبىلىم الادى. ونىڭ ىشىندە تاماقتانۋدى ۇيىمداستىرۋ، اۆتوكولىككە تەحنيكالىق قىزمەت كورسەتۋ جانە جوندەۋ، تىگىن ءوندىرىسى جانە كيىمدى مودەلدەۋ، كيىم ديزاينى، گرافيكالىق جانە مۋلتيمەديالىق ديزاين، دانەكەرلەۋ ءىسى، جيھاز ءوندىرىسى، شاشتاراز قىزمەتى قامتىلعان.

- بيىل 905 تۇلەك كاسىبي بىلىكتىلىكپەن قاتار ەڭبەك نارىعىنا بىردەن شىعۋ مۇمكىندىگىنە يە بولىپ، كوللەدج ديپلومىن الادى. جوبا تەحنيكالىق جانە كاسىپتىك ءبىلىم بەرۋ جۇيەسىن ترانسفورماتسيالاۋعا، ەكونوميكانىڭ ناقتى سەكتورىنىڭ قاجەتتىلىكتەرىنە باعدارلانعان باسەكەگە قابىلەتتى ادامي كاپيتالدى قالىپتاستىرۋعا ارنالعان مەملەكەتتىك ستراتەگيالىق باعىت شەڭبەرىندە ىسكە اسىرىلىپ جاتىر، - دەپ مالىمدەدى مينيسترلىكتەن.

ەسكە سالايىق، بيىل اقپان ايىندا جوعارى سىنىپ وقۋشىلارى كاسىبي ماماندىقتى مەڭگەرىپ شىعۋعا مۇمكىن بەرەتىن زاڭدى ءماجىلىس ماقۇلدادى.

بۇعان دەيىن كوللەدج بىتىرگەندەردىڭ قانشا پايىزى جۇمىسقا ورنالاساتىنىن جازعانبىز.

اۆتور

دوسبول اتاجان