ومىردە قالاي تابىستى ءارى باقىتتى بولۋعا بولادى- 98 جاستاعى قاريا ءوز قۇپياسىمەن ءبولىستى

اقتوبە. KAZINFORM - اقتوبە قالاسىنىڭ 98 جاستاعى تۇرعىنى جولدىباي تىلەۋلى 13 جاسىنان باستاپ ەڭبەككە ارالاسىپ، تەمىرجول سالاسىندا جۇمىس ىستەدى. اسكەري بورىشىن ءوتىپ كەلگەن سوڭ دا وسى سالادا ەڭبەك ەتىپ، 7 كلاستىق بىلىمىمەن تەحنيكانىڭ ءتىلىن مەڭگەردى. كوپتى كورگەن قارت ەڭبەك قانا ادامدى تابىسقا جەتەلەيتىنىن ايتتى.

جولدىباي تىلەۋلى 5 قىزدى تاربيەلەپ وسىرگەن اكە. قازىرگى كەزدە دە سول قىزدارىنان تاراعان جيەندەرىنە قارايلاپ، دالاعا شىققان كەزدە ولاردىڭ اماندىعىن باقىلاپ وتىرادى. كوزى كورەدى، قۇلاعى ەستيدى، ءوز بەتىمەن جۇرەدى. عاسىرعا جۋىق جاساعان قاريا زەينەتكەرلىككە تەمىرجول سالاسىنان شىققان. كەيىن تىڭايتقىش وندىرەتىن فابريكادا ۇزاق جىل ەڭبەك ەتتى.

- مۇعالجار اۋدانى جۇرىن ستانساسىندا ەڭبەك ەتتىم. تەمىرجولداعى شاعىن ستانسادا كەزەكشىسى بولىپ جۇمىس ىستەدىم. سول جەردە 40 جىل ەڭبەك ەتىپ، زەينەتكە شىقتىم. زەينەتكە شىققان سوڭ قاندىاعاش قالاسىنداعى شيلىساي تىڭايتقىش وندىرەتىن فابريكاسىندا 12 جىل جۇمىس ىستەدىم. بەس قىزىم بار. كەيىن بالالار قالاعا كەلىپ، مەن دە وسىندا قونىس اۋداردىم. سوعىس جىلدارى بىزدەردى اسكەرگە الماي، تىلدا قالدىردى. ءوز ەركىمىزبەن سۇرانىپ ەدىك، بولمادى. سودان سوعىس ءبىتتى، 1948 -جىلى 2 جارىم كلاستىق ءبىلىمىم بار ماعان «ساۋاتىڭ جوق» دەدى. ءۇش ايلىق وقۋعا جىبەرىپ، 7 كلاستى اياقتاۋعا، قۇجات الۋعا مۇمكىندىك بەردى. كەيىن اسكەرگە الىپ كەتتى. 1952 -جىلدىڭ اياعىندا ەلگە ورالعاندا حالىقتىڭ ءال-اۋقاتىنىڭ جاقسارعانىن كوردىم. قايتا تەمىرجول سالاسىنا كىرىسىپ، 1987 -جىلعا دەيىن كەزەكشى قىزمەتكەر بولىپ ەڭبەك ەتتىم. قازىر ءبارى جاقسى. كيىم كوك، تاماق توق، - دەدى اقتوبەلىك تىل ارداگەرى جولدىباي تىلەۋلى.

تىل ەڭبەككەرى بىرنەشە كەزەڭدى باستاپ وتكەردى. سونىڭ ىشىندە ولشەممەن نان جەگەن كۇندەرى دە بولدى.

- نەگىزى اكەلەرىمىز شالقار اۋدانىنىڭ تۋماسى. كەڭەس ۇكىمەتى قۇرىلماي جۇرىن ستانساسىنا كەلگەن. جۇرىندا جۇمىس ىستەپ، سابان تەپتى. كەڭەس ۇكىمەتىنىڭ قۇرىلعانىن كوزىمىزبەن كوردىك. حالىقتىڭ مالىن ۇكىمەت الدى. ءبىر سيىر، ءۇش قوي قالدىردى. وتە جامان جاعداي بولدى. حالقىمىزدىڭ باس كوتەرگەن مولدالارىنا بۇيەدەي ءتيىپ، الىپ كەتتى. ول ۋاقىتتا قازىرگىدەي سوت، پروكۋرور جوق. ميليتسيا وزدەرى تەرگەپ، پالەن جىلعا دەپ قويا بەرەتىن. ات اربامەن اپارادى.

ال سوعىس كەزىندە ادام باسىنا 8 گرام نان بەرەدى. وتباسىنا - 200 گرام. وعان قارىن تويدىرمايدى. اكەلگەن ناندى بىردەن جەپ قويىپ جۇرەمىز. 2-3 كۇن تاماق تاتپاعان كۇندەر دە بولدى. ايتەۋىر سيىر ساۋىپ، ءسۇتتى ايران قىلىپ ىشتىك. ۇستىمىزدە ءبۇتىن كيىم بولمادى. ول كەزدە شالباردىڭ كەيبىرى مارلىدان تىگىلدى. ءبىر اپتادا جىرتىلىپ قالادى. ونى جامايتىن جاماۋ دا جوق. قولعا كيەتىن قولعاپ تا تاپپايسىڭ. ءسويتىپ كۇن كوردىك. قازىر راحات، نە ىشەم، نە كيەم دەمەيسىڭ. سونىڭ وزىندە ادامداردىڭ كوڭىلى تولمايدى. جۇمىسقا شىقپاي قالۋ، بارماي قالۋ بولمايدى. تەك «قۇرتام» دەپ ايتادى. مەن 13 جاسىمنان باستاپ جۇمىس ىستەدىم. مۇعالىمدەر اسكەرگە كەتىپ، دۇرىس وقي دا المادىم. قازىر ايتساق، جۇرت نانبايدى، - دەدى قارت.

ۋاقىت وتە بۇل قيىندىقتىڭ ءبارى ۇمىتىلا باستاعان. ءتىپتى كەي كەزدە ول كۇندەر كورگەن تۇستەي ەلەستەيدى.

- بۇگىندە سونداي قيىنشىلىق كورگەن سياقتى ەمەسپىن. قازىر 98 جاستىڭ نانىن جەپ وتىرمىن. كىتاپ وقيمىن. ارابشا دا بىلەمىن. اراب ءتىلىن قارتايعاندا ۇيرەندىم. جيەنشارلارعا دا قارايمىن. ولار دالاعا شىققاندا باقىلاپ وتىرامىن. تەمىرجولدا جۇمىس ىستەپ جۇرگەندە جىلىنا ەكى رەت بەرىلەتىن تەگىن بيلەتتى پايدالانىپ، تالاي ەل كوردىم. ساۋدا- ساتتىقپەن دە اينالىستىم. ادام ۇنەمى ەڭبەك ەتۋى كەرەك. ەرىنبەسەڭ جاقسى كۇن كورەسىڭ، جالقاۋ بولساڭ جوقشىلىقتان ارىلمايسىڭ، - دەدى جولدىباي تىلەۋلى.

اۆتور

التىناي ساعىندىقوۆا