مايقاپشاعاي تاسجولىنداعى قۇرىلىس 7 جىلعا سوزىلىپ كەتتى

استانا. قازاقپارات - ەل شىعىسىندا قايتا سالىنىپ جاتقان ومبى-مايقاپشاعاي حالىقارالىق تراسساسىنىڭ اياقتالۋىن ەكى بىردەي وبلىس حالقى كۇتىپ ءجۇر. 2017-جىلى باستالعان بۇل قۇرىلىس ءاۋ باستا 2022 -جىلى بىتەدى دەپ جوسپارلانعانمەن، ءالى كۇنگە ساعىزشا سوزىلىپ كەلەدى.

قازىر شىعىس قازاقستان وبلىسىنا قاراستى اۋماقتاعى جول ۋچاسكەسى اياقتالۋعا جاقىن قالدى. الايدا اباي وبلىسىن باسىپ جاتقان قالباتاۋ مەن كوكپەكتى-تاسساي اراسىنداعى بولىكتە اتقارىلاتىن شارۋا شاش ەتەكتەن. بيىل مەردىگەر كومپانيا سول شارۋانى ەڭسەرە الا ما؟

سەرگەي كۇيىكوۆ سەمەي مەن زايساننىڭ اراسىندا جولاۋشىلار تاسىمالدايدى. وسى جولى ساپارى ءساتسىز بولىپ، قالباتاۋدان اسىپ، كوكپەكتىگە جەتپەي اۆتوبۋسى قاڭتارىلىپ قالدى. ەندى يەن دالادا كەرەكتى اۆتوبولشەكتى كۇتىپ تۇرعانىنا بەسىنشى كۇنگە كەتىپ بارادى. ويدىم-ويدىم جول جەڭىل كولىك جۇرگىزۋشىلەرىنە دە وڭاي ءتيىپ جۇرگەن جوق.

جوباسى سوناۋ 2017 -جىلى باستالعان بۇل قۇرىلىستىڭ جۇرگىزىلىپ جاتقانىنا 7 جىلدىڭ ءجۇزى بولىپ قالدى. مەن قازىر اباي وبلىسىنا قاراستى قالباتاۋ مەن كوكپەكتىنىڭ اراسىنداعى جول ۋچاسكەسىندە تۇرمىن. مىنا جاقتاعى زايسانعا، تارباعاتايعا، اقسۋاتقا قاتىناعان جۇرت وسىنداي لاي، شاڭ باسقان اينالما جولمەن ءجۇرىپ ابدەن قاجىعان. سوندىقتان جولاۋشىلاردى جول قۇرىلىسى قاشان بىتەدى، - دەگەن جالعىز سۇراق قانا الاڭداتادى.

اباي وبلىسىنا قاراستى اۋماقتاعى 4 ۋچاسكەدە ءجۇرىپ جاتقان جۇمىستىڭ وتە باياۋ ەكەنىن مىنا سيفرلاردان- اق بايقاۋعا بولادى. جالپى 184 شاقىرىمنىڭ 10 شاقىرىمى عانا تولىق جوندەلىپ بىتكەن. قالعان 174 شاقىرىمنىڭ 26 شاقىرىمىنا عانا ءبىر قابات اسفالت توسەلىپتى. تاپسىرۋشى تاراپ جول ازابىن تارتقان حالىقتىڭ جانايقايى ورىندى ەكەنىن مويىندايدى. دەگەنمەن قۇرىلىسقا جاۋاپتى شەتەلدىك مەردىگەر: «كومپانياعا بارلىق جاعداي جاسالدى»، - دەپ سەندىردى.

ايدىن ەسكەنوۆ، «قازاۆتوجول» ۇ ك اباي وبلىسى فيليالى ديرەكتورىنىڭ ورىنباسارى:

- حالىقتىڭ ايتىپ وتىرعانىنىڭ شىندىعى بار، ال ەندى بيىلعى ءبىزدىڭ جوسپارىمىز بويىنشا دايىندىعىمىز بار. ءبىز ايتاتىنبىز، قاراجات دەيتىنبىز، جوبانى قايتا جاڭارتۋ، قايتا تۇزەتۋ، وتكىزۋ. ونىڭ بارلىعى الدىڭعى جىلدارى ءبارى ءوتىپ كەتتى، قاراجات بار، ادامدار دا بار، سوندىقتان قازىر مەردىگەرگە جۇمىستى توقتاتىپ، سىلتاۋ ىزدەيتىن جاعداي جوق. سىنىققا سىلتاۋ تابىلىپ جۇرمەسە، قۇجات بويىنشا بۇل جول بولىگىندەگى شارۋا بيىل اياقتالۋى ءتيىس.

قازىر 4 ۋچاسكەگە جالپى 300 تەحنيكا، 500 ادام جۇمىلدىرىلعان. جانار-جاعارماي مەن بيتۋم تاپشىلىعى دا بولمايدى، - دەيدى ماماندار.

www.24.kz