پوليتسيا كەز كەلگەن، ءتىپتى كىشىگىرىم قۇقىق بۇزۋشىلىقتارعا بىردەن دەن قويۋى ءتيىس - بەكتەنوۆ

استانا. KAZINFORM – ق ر پرەمەر-ءمينيسترى ولجاس بەكتەنوۆ قۇقىق بۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىن وتكىزدى.

قوعامدىق قاۋىپسىزدىكتى قامتاماسىز ەتۋدىڭ نەگىزگى ماسەلەلەرى قارالدى. بالالارعا قاتىستى زورلىق-زومبىلىقتىڭ الدىن الۋ جانە جاسوسپىرىمدەر اراسىنداعى قىلمىسقا، كيبەرقىلمىسقا قارسى ءىس-قيمىل، قۇقىق بۇزۋشىلىق پروفيلاكتيكاسى سالاسىندا ءتۇسىندىرۋ جۇمىستارى بويىنشا قابىلدانىپ جاتقان شارالارعا ەرەكشە نازار اۋدارىلدى.

پرەمەر-مينيستر قوعامدىق قۇقىقتىق ءتارتىپتى قامتاماسىز ەتۋ بويىنشا جۇمىستىڭ ماڭىزدىلىعىن اتاپ ءوتتى.

«پرەزيدەنت زاڭ مەن ءتارتىپ مەملەكەت پەن قوعامنىڭ ەڭ باستى قاعيداتىنا اينالۋى كەرەكتىگىن ايقىنداپ بەردى. بۇل - مەملەكەت باسشىسى ساياساتىنىڭ باستى نەگىزدەرىنىڭ ءبىرى. پرەزيدەنتتىڭ بۇل تاپسىرماسىن بۇلجىتپاي ىسكە اسىرۋ - بارلىق مەملەكەتتىك ورگاننىڭ، ەڭ الدىمەن، قۇقىق قورعاۋ قۇرىلىمدارىنىڭ مىندەتى. پوليتسيا كەز-كەلگەن، ءتىپتى كىشىگىرىم قۇقىق بۇزۋشىلىقتارعا بىردەن دەن قويۋى ءتيىس. بۇل - قۇقىقتىق ءتارتىپتى قامتاماسىز ەتۋدىڭ بىردەن-ءبىر جولى»، - دەپ اتاپ ءوتتى ولجاس بەكتەنوۆ.

مەملەكەت باسشىسى بەكىتكەن 2024-2028 -جىلدارعا ارنالعان قوعامدىق قاۋىپسىزدىكتى قامتاماسىز ەتۋ تۇجىرىمداماسىن ىسكە اسىرۋ بارىسى قارالدى. ىشكى ىستەر ءمينيسترى ەرجان سادەنوۆ بيىل 28 ءىس-شارانىڭ ورىندالعانىن باياندادى. ماسەلەن، ۇرلىققا قارسى ءىس-قيمىل بويىنشا ازىرلەنگەن باعدارلاما ولاردىڭ سانىن %29- عا قىسقارتۋعا جانە قىلمىستاردىڭ اشىلۋ دەڭگەيىن %54,4- عا دەيىن ارتتىرۋعا مۇمكىندىك بەردى. تۇرمىستىق زورلىق- زومبىلىققا قارسى كۇرەس بويىنشا سالالىق بولىمشەلەر قۇرىلدى. ەندى وتباسىلىق جانجالدارعا شاقىرىلعان كەزدە جابىرلەنۋشىلەر تۋرالى ساۋالناما تولتىرىلادى، 1 مىڭ قاساقانا ءزابىر كورسەتۋشى انىقتالىپ، ولارعا پسيحوكوررەكسيالىق جۇمىس جۇرگىزىلۋدە. ءوز كەزەگىندە، ەسەپكە الىنعاندارعا قاتىستى ەلەكتروندى باقىلاۋ قۇرالدارىن قولدانۋ قىلمىستىڭ قايتالانۋ قاۋپىن %13- عا دەيىن تومەندەتۋگە مۇمكىندىك بەردى.

بالالارعا قاتىستى زورلىق- زومبىلىقتىڭ الدىن الۋ جانە جاسوسپىرىمدەر اراسىنداعى قىلمىسقا قارسى ءىس-قيمىل شارالارى تۋرالى وقۋ-اعارتۋ ءمينيسترى عاني بەيسەمبايەۆتىڭ بايانداماسى تىڭدالدى. 2013 -جىلدان بەرى كامەلەتكە تولماعاندار اراسىنداعى قىلمىستىق قۇقىق بۇزۋشىلىقتار سانى %55- عا ازايعان. ەلىمىزدىڭ مەكتەپتەرىندە بۇزاقىلىققا قارسى 2 باعدارلاما - KiVa جانە وتاندىق دوسبولlike ازىرلەمەسى ىسكە قوسىلدى. مەملەكەت باسشىسىنىڭ تاپسىرماسى بويىنشا پسيحولوگيالىق قىزمەتتىڭ ءبىرىڭعاي جۇيەسى ازىرلەندى: بۇگىندە ەلىمىزدىڭ بارلىق وڭىرىندە 20 قولداۋ ورتالىعى جۇمىس ىستەيدى. بيىلعى 1- قىركۇيەكتەن باستاپ «ءبىرتۇتاس تاربيە» باعدارلاماسى ىسكە قوسىلدى. سونىمەن قاتار ءبىلىم بەرۋ ۇيىمدارىندا جەكە قاۋىپسىزدىك بويىنشا ساباقتار وتكىزىلەدى.

سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە- ءمينيسترى اسحات ورازبەك كيبەرقىلمىسقا قارسى ءىس- قيمىلدىڭ كەشەندى جۇمىسى شەڭبەرىندە 2024 -جىلى دەربەس دەرەكتەرگە قولجەتىمدىلىكتى باقىلاۋ مەملەكەتتىك قىزمەتى ەنگىزىلگەنىن ايتتى. eGov جۇيەسىندەگى ستوپ- نەسيە فۋنكسياسى ىسكە قوسىلدى، ول قارىزداردى ونلاين رەسىمدەۋدەن باس تارتۋعا مۇمكىندىك بەرەدى. اتالعان فۋنكسيانى بۇگىندە 1,4 ميلليوننان استام ازامات پايدالانىپ ۇلگەردى. سونىمەن قاتار ۇيالى بايلانىس ارقىلى الاياقتىققا قارسى كۇرەسۋ الگوريتمدەرىن ازىرلەۋ بويىنشا جۇمىس توبى قۇرىلدى.

سونداي-اق جامبىل جانە اتىراۋ وبلىستارىنىڭ اكىمدەرى تىڭدالدى، ولار «بەينەباقىلاۋ جۇيەلەرىمەن جاپپاي قامتۋ» جوبالارى، ۋاقىتشا بەيىمدەۋ ورتالىقتارىن اشۋ جانە باسقا دا جوبالار اياسىنداعى جۇمىستى كۇشەيتۋ قاجەتتىگىن ايتتى.

«ءبىزدىڭ ماقساتىمىز - قىلمىستىڭ الدىن الۋدىڭ ءبىرتۇتاس جۇيەسىن قۇرۋ. تۇجىرىمدامانى ىسكە اسىرۋ بارىسىندا ۇكىمەتتىك ەمەس ۇيىمدار مەن قوعامدىق بىرلەستىكتەردى بەلسەندى تارتۋ قاجەت. ازاماتتاردىڭ قاۋىپسىزدىك دەڭگەيى ءبىزدىڭ بىرلەسكەن جۇمىسىمىزدىڭ تيىمدىلىگىنە بايلانىستى. ءى ءى م -ءنىڭ ەسەپتەرىنەن ەلىمىزدە كۇن سايىن اۋىر قىلمىستار، ونىڭ ىشىندە كىسى ءولتىرۋ وقيعالارىنىڭ ورىن الىپ وتىرعانىن كورىپ ءجۇرمىن. ادام ولىمىنە اكەلەتىن جازاتايىم وقيعالاردىڭ كوپشىلىگى ماس كۇيىندە بولادى. بيىل بۇزاقىلىق پەن بانديتيزمگە بايلانىستى ەل ءىشىن شۋلاتقان ءبىرقاتار وقيعا ورىن الدى. جەرگىلىكتى پوليتسيا قىزمەتكەرلەرى قاۋىپ-قاتەردى انىقتاپ، تۇرعىندار اراسىندا الدىن الا پروفيلاكتيكالىق جۇمىستار جۇرگىزۋى ءتيىس»، - دەپ اتاپ ءوتتى پرەمەر- مينيستر. مادەنيەت جانە اقپارات مينيسترلىگىنە مۇنداي جاعدايلارعا دەر كەزىندە دەن قويۋدى، ب ا ق پەن الەۋمەتتىك جەلىلەردە ازاماتتاردى وبەكتيۆتى تۇردە حاباردار ەتۋدى تاپسىردى.

وتىرىس قورىتىندىسى بويىنشا پرەمەر-مينيستر قوعامدىق قاۋىپسىزدىكتى قامتاماسىز ەتۋ تۇجىرىمداماسىن ساپالى جۇزەگە اسىرۋ بويىنشا ءبىرقاتار تاپسىرما بەردى.

قۇقىق بۇزۋشىلىقتىڭ الدىن الۋ اسپەكتىلەرىنىڭ بارلىعىن قامتۋدى كەڭەيتۋ، ازاماتتاردىڭ قاۋىپسىز ورتا قالىپتاستىرۋ ءۇشىن شەشىمدەر قابىلداۋ پروتسەسىنە قاتىسۋ مۇمكىندىگىن قاراستىرۋ، ولاردىڭ ىسكە اسىرىلۋىن باقىلاۋ؛

جاسوسپىرىمدەر اراسىنداعى قىلمىستىڭ الدىن الۋ ءۇشىن كامەلەتكە تولماعانداردى وقۋعا، جۇمىسقا، قوعامدىق ومىرگە قاتىسۋعا ىنتالاندىرۋ تەتىكتەرىن قالىپتاستىرۋ؛

وقۋ-اعارتۋ مينيسترلىگىنە مۇددەلى مەملەكەتتىك ورگاندارمەن بىرلەسىپ، قوسىمشا شارالار ازىرلەي وتىرىپ، جاسوسپىرىمدەر اراسىنداعى قۇقىق بۇزۋشىلىقتىڭ الدىن الۋ سالاسىندا ىسكە اسىرىلىپ جاتقان ءىس-شارالاردىڭ تيىمدىلىگىنە تالداۋ جۇرگىزۋ؛

ىشكى ىستەر مينيسترلىگىنە ەسىرتكىنىڭ جاڭا تۇرلەرى پايدا بولۋىن ەسكەرە وتىرىپ، ءتيىستى بولىمشەلەردىڭ جۇمىسىن سىني تۇرعىدان باعالاپ، ەسىرتكىنىڭ زاڭسىز اينالىمىنا قارسى كۇرەستى كۇشەيتۋ شارالارىن قابىلداۋ؛

ىشكى ىستەر مينيسترلىگىنە سيفرلىق تەحنولوگيالاردىڭ كەڭىنەن ەنۋى الاياقتىق سانىنىڭ وسۋىمەن قاتار جۇرەتىنىن ەسكەرىپ، ازاماتتاردى الاياقتاردان قورعاۋ بويىنشا تۇبەگەيلى شارالار قابىلداۋ تاپسىرىلدى.