وليمپيالىق سپورت تۇرلەرىن دامىتۋ ديرەكسياسىنىڭ باسشىسى سوتتالدى

استانا. KAZINFORM - وليمپيادا تۇرلەرى بويىنشا سپورتتى دامىتۋ ديرەكسياسىنىڭ باسشىسى مەن قىزمەتكەرى بيۋدجەت قاراجاتىن جىمقىرعاندارى ءۇشىن سوتتالدى، دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.

وليمپيادا تۇرلەرى بويىنشا سپورتتى دامىتۋ ديرەكتسياسىنىڭ باسشىسى 60 ميلليون تەڭگەدەن استام بيۋدجەت قاراجاتىن ۇرلاعانى جانە قاراماعىنداعى قىزمەتكەردەن 4 ميلليون تەڭگە كولەمىندە پارا العانى ءۇشىن كىنالى دەپ تانىلدى.

سپورتشىلارعا ارنالعان سپورت زالدارىن تەگىن الۋ مۇمكىندىگى بولا تۇرا، ولاردى جالعا الۋ تۋرالى ەنشىلەس تۇلعالارمەن مەملەكەتتىك ساتىپ الۋ شارتتارى جاسالىپ، وقۋ-جاتتىعۋ جيىندارىنا بولىنگەن بيۋدجەت قاراجاتى جىمقىرىلعان.

سونىمەن قاتار، باسشىمەن بىرگە بيۋدجەت قاراجاتىن ۇرلاۋعا كومەكتەسكەنى ءۇشىن ديرەكسيا قىزمەتكەرى دە سوتتالدى.

مەملەكەتتىك ايىپتاۋشى سوتقا بارلىق دالەلدەمەلەردى ۇسىنا وتىرىپ، سوتتالۋشىلاردىڭ كىناسىزدىگى تۋرالى ۋاجدەرىن جوققا شىعاردى.

سوت ۇكىمىمەن ءارقايسىسىنا مەملەكەتتىك قىزمەتتە لاۋازىمداردى اتقارۋعا ءومىر بويىنا تىيىم سالىنا وتىرىپ، باسشى 5 جىلعا، ال ونىڭ كومەكتەسۋشىسى 4 جىلعا باس بوستاندىعىنان ايىرۋ جازاسىنا سوتتالدى.

ۇكىم زاڭدى كۇشىنە ەندى.

اۆتور

ەربول جانات