وليمپيادا ويىندارىندا قازاقستاندىق سپورتشىلاردان كىمدەر ۇزدىك العاشقى وندىققا كىردى

پاريج. KAZINFORM - فرانسيا استاناسى پاريج قالاسىندا وتكەن وليمپيادا ويىندارىندا قازاقستاندىق سپورتشىلاردان كىمدەر العاشقى وندىققا كىردى.

اتاپ ايتساق، دزيۋدودان ايەلدەر اراسىنداعى باسەكەدە ءابيبا ءابۋجاقىنوۆانىڭ وليمپيادا جۇلدەسىن الاتىن مۇمكىندىگى جوعارى بولدى. الايدا، قولا مەدال ءۇشىن وتكەن بەلدەسۋدە ابيبا شۆەتسيالىق تارا بابۋلفاتتان جەڭىلىپ، جارىستى بەسىنشى ورىنمەن اياقتادى.

سونداي-اق، گيمناست ميلاد كاريمي بەسىنشى ورىن الدى. سپورتشى ەركىن جاتتىعۋدان وليمپيادانىڭ فينالىندا ونەر كورسەتكەن بولاتىن. اقتىق سىندا ول ءوز جاتتىعۋى ءۇشىن 14.500 ۇپاي الىپ، العاشقى بەستىككە ەندى.

سپورتتىق قۇزعا ورمەلەۋ شەبەرى ءامىر مايمۇراتوۆتىڭ دا كورسەتكىشى جامان ەمەس. جىلدامدىق بويىنشا سىنعا تۇسكەن ول وليمپيادانىڭ شيرەك فينالىنا جەتىپ، جازعى ويىنداردا بەسىنشى ورىن الدى.

نىسانا كوزدەۋ شەبەرى الەكساندرا لە العاشقى وندىققا كىردى. ول پنيەۆماتيكالىق ۆينتوۆكامەن 10 مەترگە نىسانا كوزدەۋدەن فينالعا شىعىپ، جالپى ەسەپتە التىنشى ورىننان كورىندى. ايتا كەتەلىك، الەكساندرانىڭ ەنشىسىندە ارالاس كوماندالىق سىنداعى قولا مەدال بار.

وليمپياداعا العاش رەت قاتىسقان دانيل مۇسابايەۆ باتۋتتاعى گيمناستيكادان فينالعا ءبىر قادام قالعاندا توقتادى. ول ءبىرىنشى ىرىكتەۋدەن سوڭ 8-ورىننان كورىنگەن. الايدا، ەكىنشى ىرىكتەۋدە توعىزىنشى ورىنعا ءتۇسىپ قالدى. فينالعا العاشقى سەگىزدىك جولداما الدى.

3000 مەترگە كەدەرگىلەر ارقىلى جۇگىرۋدەن قازاقستان نامىسىن نورا دجەرۋتو قورعادى. ول جارىستا 9-ورىن يەلەندى. قازاقستانعا الەم چەمپيوناتىنىڭ التىنىن سىيلاعان سپورتشى جاقىندا عانا دەكرەتتىك دەمالىستان ورالعان.

شپاگامەن سەمسەرلەسۋدەن قازاقستان كومانداسى وليمپيادادا العاشقى التىلىققا ەندى. شيرەك فينالدا ءبىزدىڭ سپورتشىلار ۆەنگرياعا جول بەرىپ، كەيىن ەگيپەتتى جەڭدى. ال بەسىنشى ورىنعا تالاستا يتاليا قۇراماسىنان جەڭىلىپ، پاريج ويىندارىن التىنشى ورىنمەن ءتامامدادى. كوماندالىق سىندا قازاقستان نامىسىن رۋسلان كۋربانوۆ، ەرلىك سەرتاي، ەلمير اليمجانوۆ پەن ۆاديم شارلايموۆ قورعادى. ءبىزدىڭ نوياندار العاش رەت كوماندالىق سىن بويىنشا وليمپياداعا قاتىسىپ وتىر.

سونىمەن قاتار، شپاگامەن سەمسەرلەسۋدەن جەكەلەي سىندا قازاقستاندىق رۋسلان كۋربانوۆ التىنشى ورىن الدى. بۇل دا وتاندىق سەمسەرلەسۋ تاريحىنداعى ۇزدىك ناتيجە. كۋربانوۆ شيرەك فينالعا دەيىن جەتىپ، بولاشاق وليمپيادا چەمپيونىنا عانا ەسە جىبەرگەن بولاتىن.

وليمپيادا ويىندارى ساداق اتۋ شەبەرلەرى دە سىنعا ءتۇستى. كوماندالىق جارىستا يلفات ابدۋللين، الەكساندر ەرەمەنكو جانە داۋلەتكەلدى جاڭبىرباي 1/8-اينالىمعا جەتىپ، يتاليادان ءبىر ۇپاي ايىرماسىمەن جەڭىلدى. جالپى ەسەپتە 9-ورىنعا تابان تىرەدى.

برەيكينگتەن امير زاكيروۆ سەگىزىنشى ورىن الدى. ول توپتىق سىنداعى ەكى باتتلدا جەڭىسكە جەتىپ، شيرەك فينالعا جولداما العان. الايدا، امەريكالىق VICTOR- دان ۇتىلىپ، جارتىلاي فينالعا وتە المادى. ايتا كەتەلىك، برەيكينگ وليمپيادا باعدارلاماسىنا العاش ەنىپ وتىر.

كيريلل گەراسيمەنكو ۇستەل تەننيسىننە 1/8 فينالعا جەتتى. ءۇش وليمپياداعا قاتىسقان سپورتشىمىز بۇل جولى تاريحي ناتيجە تىركەدى. بۇعان دەيىن اتالعان سپورت تۇرىندەگى وكىلدەرىمىز العاشقى وندىققا ەنبەگەن.

سونداي-اق، بوكستان قازاقستان كومانداسىنىڭ مۇشەلەرى دە العاشقى وندىققا كىردى. نۇربەك ورالباي كۇمىس مەدال السا، ساكەن بيبوسىنوۆ (51 كەلى)، مۇحاممەدسابىر بازارباي ۇلى (63,5 كەلى) جانە ايبەك ورالباي (92 كەلى) بەسىنشى ورىن يەلەندى. ماحمۇد سابىرحان (57 كەلى) مەن قامشىبەك قوڭقابايەۆ (92 كەلى) توعىزىنشى ورىندا.

گرەك- ريم كۇرەسىنىڭ شەبەرلەرى نۇرسۇلتان تۇرسىنوۆ (87 كەلى) پەن ءالىمحان سىزدىقوۆ (130 كەلى) تيىسىنشە جەتىنشى جانە سەگىزىنشى ورىن الدى. ەركىن كۇرەس شەبەرى الىشەر ەرعالي (97 كەلى) دا جەتىنشى ورىندا.

اۆتور

كۇنسۇلتان وتارباي