وليمپيادا چەمپيونى اتاعىنان ايىرىلعان ەل سپورتشىلارى كىمدەر

پاريج. KAZINFORM - وسىعان دەيىنگى وليمپيادا ويىندارىندا جەڭىس تۇعىرىنىڭ ەڭ بيىك ساتىسىنا كوتەرىلىپ، كەيىن سول اتاعىنان ايىرىلىپ قالعان سپورتشىلارىمىز دا جوق ەمەس. بۇگىن پاريج وليمپياداسىنىڭ الاۋى تۇتانار الدىندا سول اتلەتتەرىمىز تۋرالى دا ايتا كەتكەندى ءجون ساناپ وتىرمىز.

ناقتىراق ايتساق، قازاقستان تاۋەلسىز ەل رەتىندە جازعى وليمپيادا ويىندارىنا 1996 -جىلدان بەرى قاتىسىپ كەلەدى. سودان بەرى قازاقستاندا جازعى وليمپيادانىڭ 20 التىن مەدالىن جەڭىپ العان بولاتىن. وكىنىشكە قاراي، ونىڭ التاۋىن كەيىن سپورتشىلارىمىز كەرى قايتارىپ بەردى. وعان باستى سەبەپ - دوپينگ داۋى.

ەندەشە، دوپينگپەن ۇستالىپ چەمپيوندىق اتاقتارىنان ايىرىلعان سپورتشىلارىمىزعا كەلەيىك.

قازاقستاندىقتارعا ەڭ اۋىر تيگەنى قىزىلوردالىق اۋىر اتلەت يليا يليننىڭ دوپينگ قولداندى دەپ ايىپتالىپ، پەكين جانە لوندون وليمپياداسىنىڭ التىنىن قايتارىپ بەرۋى. يليا يلين ءبىر ەمەس، ەكى بىردەي وليمپيادا چەمپيونى اتانىپ، ەكى بىردەي اتاعىنان ايىرىلىپ قالدى.

ودان كەيىن تاعى دا اۋىر اتلەتيكادان ءزۇلفيا چينشانلو، مايا مانەزا جانە سۆەتلانا پودوبەدوۆا لوندوندا العان التىندارىنان ايىرىلدى. سونداي-اق، تاعى ءبىر اۋىر اتلەت نيجات راحيموۆ «دوپينگ ەرەجەسىن بۇزدى» دەپ ايىپتالىپ، ح و ك ريو وليمپياداسىندا العان التىنىن قايتارىپ الدى.

ايتا كەتەيىك، سوڭعى ءتورت سپورتشى دا قازاقستاندا تۋماعان. ءزۇلفيا چينشانلو مەن مايا مانەزا قىتايدان كەلىپ قازاقستان ازاماتتىعىن السا، سۆەتلانا پودوبەدوۆا رەسەيدەن، ال نيجات راحيموۆ ازەربايجاننان كەلگەن بولاتىن.

اۆتور

كۇنسۇلتان وتارباي