وليمپ شىڭىن باعىندىرامىن دەگەن سپورتشى تارتىپكە باعىنا ءبىلۋى كەرەك - ەلدوس سمەتوۆتىڭ باپكەرى
پاريج. KAZINFORM - فرانسيا استاناسى پاريج قالاسىندا وليمپيادا ويىندارى جالعاسىپ جاتىر. ءبىراق، ەلدوس سمەتوۆتىڭ التىن مەدالىنەن كەيىن ءالى بىردە- ءبىر سپورتشىمىز التىنعا قول جەتكىزە العان جوق.
ەل قورجىنىنا العاشقى التىن جۇلدەنى سىيلاعان ەلدوس سمەتوۆتىڭ جەكە باپكەرى عالىمجان جىلگەلديەۆپەن سۇحباتتاسۋدىڭ ءساتى تۇسكەن ەدى.
- عالىمجان مىرزا، ءسىزدى تانىستىرۋدىڭ ءوزى ارتىق. ءسىز دزيۋدو كۇرەسىنەن قازاقتان شىققان تۇڭعىش وليمپيادا جانە الەم چەمپيونى ەلدوس سمەتوۆتىڭ باپكەرىسىز. شاكىرتىڭىزدىڭ جەڭىسىن كورگەندە قانداي سەزىمدە، قانداي كوڭىل كۇيدە بولدىڭىز؟
- بۇل سەزىمدى ەشقاشان تىلمەن ايتىپ جەتكىزە المايتىن شىعارمىن. ءتىپتى، سۋرەتپەن دە بەينەلەۋ مۇمكىن ەمەس. قالاي ايتارىمدى، قالاي جەتكىزەرىمدى دە بىلمەيمىن. تەك جۇرەگىممەن عانا ءۇنسىز سەزىنىپ ءجۇرمىن.
- ەلدوستىڭ وسىنداي چەمپيون بولاتىنىنا 100 پايىز سەنىمدى بولدىڭىز با؟
- ارينە، سەندىم. ول ناعىز بابىندا بولدى. ەڭ باستىسى ەلدوس سول بابىن ساقتاپ، بارىن سالىپ، چەمپيوندىق اتاققا قول جەتكىزدى. بۇكىل ەلدىڭ سەنىمىن اقتادى.
- وليمپيادا ويىندارىنا قالاي دايىندالدىڭىزدار؟
- ۇلكەن جاقتان ۇلتتىق قۇراما ساپىندا بولعانىمىزبەن ءوزىمىز ارناي باعدارلامامەن جۇمىس ىستەدىك. بىزگە، مەملەكەت، ۇكىمەت بار جاعدايىمىزدى جاساپ جاتىر. ونىڭ ىشىندە قازاقستان ۇلتتىق وليمپيادالىق كوميتەتى، قازاقستان تۋريزم جانە سپورت مينيسترلىگى بار. بارلىق قۇجاتتارىمىزدى ءبىتىرىپ بەرىپ، ءىر وقۋ-جاتتىعۋىنا بارۋىمىزعا اقشا تولەپ، كيىمدەرىمىزدى بەرىپ، شىعارىپ سالىپ، كۇتىپ الىپ دەگەندەي بارلىق قىزمەتتى اتقارىپ جاتىر. ءار مەكەمەنىڭ وزىنە ءتيىستى اتقاراتىن جۇمىسى بار. باستىسى، شاكىرتىمنىڭ تاريحي جەڭىسىنە كۋا بولىپ قايتتىم. بۇل جەڭىس - بۇرىنعى جەڭىستەردەن ءدامى مۇلدە بولەك قوي. سوندىقتان، اتالعان مەكەمە باسشىلارىنا العىس ايتامىن.
- وسىنداي وليمپ شىڭىن باعىندىرۋعا قالاي بىرگە جەتتىڭىزدەر؟
- مەن ەلدوستى وسىنداي بيىككە شىعارۋعا قانشاما تەر توككەنىمدى ءوزىم عانا بىلەمىن. سوندىقتان، مەنىڭ وليمپيادا ويىندارىندا قاسىندا بولۋىم، وعان قولداۋ ءبىلدىرىپ، اقىل-كەڭەسىمدى ايتۋىم زاڭدىلىق ەدى. ءبىز بىرگە چەمپيون اتاندىق دەسەم قاتەلەسپەيمىن. ءبىز جەڭىسكە بىرگە جەتتىك، ءبىز ارماندارىمىزدى بىرگە ورىندادىق. ەلدوس ەكەۋمىز وليمپيادانى بىرگە ءساتتى اياقتادىق.
- جالپى، پاريجگە الپىستان استام سپورتشىنىڭ جەكە باپكەرلەرى كەلىپتى. وسىنداي، وليمپيادا ويىندارىندا سپورتشىلاردىڭ جەكە باپكەرلەرى سپورتشىلاردىڭ قاسىندا بولۋى ولارعا قانشالىقتى كۇش بەرەدى؟
- نەگىزى، وسىنداي ءتورت جىلدا ءبىر-اق رەت وتەتىن وليمپيادا ويىندارىندا ءار ۇلتتىق قۇرامانىڭ باس باپكەرىمەن بىرگە جەكە باپكەرلەرى دە بىرگە كەلۋى وتە دۇرىس شەشىم دەپ قابىلدايمىن. جەكە باپكەرلەر وليمپيادا بارىسىندا ءوز شاكىرتتەرىنىڭ ءار قيمىلىن باعىپ، قاداعالاۋى كەرەك.
- ەلدوس قاتارىنان ءۇش وليمپيادادا جۇلدە الدى. ونىڭ وسىنداي دەڭگەيىن ۇستاپ تۇرۋىنىڭ قانداي سىرى بار؟
- ونىڭ ەشقانداي سىرى جوق. ەلدوس وسىعان دەيىن ءوزىنىڭ سپورتشى ەكەنىن ءبىر ساتكە ۇمىتقان ەمەس. ءوزىن قاتارداعى جاۋىنگەر رەتىندە ۇستاپ ءجۇردى. قاي كۇنى، قانداي بۇيرىق بولسا، سوعان دايىن بولدى. «مەن وليمپيادانىڭ ەكى دۇركىن جەڭىمپازىمىن» دەپ ءبىر كۇن ماسايراعان جوق. حالىق قالاي ەركەلەتتى، سولاي ەركەلەدى. ەركەلىكتىڭ شەگىنەن شىققان ەمەس.
- باپكەر رەتىندە ەلدوستىڭ قانداي قاسيەتتەرىن ەرەكشە اتاپ وتەر ەدىڭىز؟
- ەلدوس ەرەكشە ادام. وعان اللا سپورتتاعى باق پەن بىرگە سانانى دا قوسىپ بەرە سالعان. وتە ءوز ىسىنە جاۋاپتى. ايتقاندى ەكى ەتپەيتىن ەلگەزەكتىگى، اقكوڭىلدىگى، مەيىرىمدىلىگى، قويشى ايتەۋىر ەلدوستان بار جاقسى قاسيەتتەردىڭ بارلىعىن تاباسىڭ.
- سپورتشى بيىك بەلەسكە كوتەرىلۋ ءۇشىن باپكەردىڭ ناقتى قانداي تالاپتارىن ورىنداي ءبىلۋى كەرەك؟
- وليمپ شىڭىن باعىندىرامىن دەگەن سپورتشى تارتىپكە باعىنا ءبىلۋ كەرەك. ءتارتىپ بولماعان جەردە بەرەكە دە بولمايدى. بەرەكە بولماعان جەر دە ەشقانداي ەڭبەك جەمىسىن بەرمەيدى. «تارتىپكە باعىنعان قۇل بولمايدى» دەمەي مە؟! مىنە، ەلدوس وسىنداي تالاپتاردى ورىنداپ، تاۋداي بيىكتەرگە قول جەتكىزدى. ءبىزدىڭ كەيبىر سپورتشىلارىمىز ءبىر بەلەستى باعىندىرسا بولدى، ارى قاراي وزىنەن «جۇلدىز» جاساپ، قايدا ءۇشىپ كەتكەنىن تاپپاي جاتامىز...
- ەندى ەلدوس سپورتتىق ءمانسابىن اياقتاي ما؟ ەگەر اياقتاپ جاتسا نەمەن اينالىسۋى مۇمكىن؟
- ول جاعىن ازىرگە شەشكەن جوقپىز. بىردەن سپورتتان الىستاپ كەتەمىز دەپ ويلامايمىن. ەلدوستىڭ ارت جاعىندا دا قانشاما جاستار ءوسىپ كەلەدى. ولاردى دا ويلاۋىمىز كەرەك. جول بەرۋىمىز كەرەك.
- بولاشاقتا «مىناۋ ەلدوستىڭ سپورت مەكتەبى» دەيتىندەي ورتالىقتى كورۋىمىز مۇمكىن بە؟
- ول دا مۇمكىن. نەگە، ونداي ورتالىقتار اشپاسقا! الماتىدا، استانادان ءيا بولماسا باسقا وڭىرلەردەن، ءتىپتى ەلىمىزدىڭ بارلىق ايماعىنان ەلدوستىڭ اتىندا بولاشاق چەمپيونداردى شىڭدايتىن ارنايى ورتالىقتار بولۋ كەرەك دەپ ەسەپتەيمىن. بۇل ماسەلە الداعى ۋاقىتتىڭ ەنشىسىندە...
- ءسىز تەك باپكەر عانا ەمەس، دزيۋدو سالاسىنىڭ ۇزدىك مامانى ەكەنىڭىزدى دە جاقسى بىلەمىز. قازىرگى جاس بۋىندار اراسىنان ەلدوستاي بولاشاق چەمپيونداردى بايقاپ ءجۇرسىز بە؟ ناقتىراق ايتساق، ەلدوستىڭ ءىزىن باساتىن كىمدەر بار؟
- ەلدوستىڭ بۇل بيىگى، ەلدوستىڭ شىڭى، ەندى ەشقاشان الاسارمايدى. جىلدار وتكەن سايىن بيىكتەي بەرەدى. سوندىقتان، ەلدوسقا ەلىكتەيتىن، ەلدوستاي بولعىسى كەلەتىن جاستار بۋىنى جىلدان جىلعا ارتپاسا كەمىمەيدى دەپ ويلايمىن. ەلدوستاي ۇلدى تۋعان قازاق انالارى ءالى تالاي وسىنداي باتىرلاردى تۋاتىنىنا سەنەمىن.
- جالپى، قازىرگى ەلىمىزدەگى دزيۋدو سپورتىنىڭ دامۋىنا قانداي باعا بەرەسىز؟
- وتە جاقسى دەڭگەيدە دامىپ كەلە جاتىر. قازىر مەملەكەت سپورت سالاسىنا قاتتى قولداۋ كورسەتىپ جاتىر. وسى قولداۋدى سەزىنىپ، ارى قاراي جۇمىس ىستەۋىمىز كەرەك.
-اڭگىمەڭىزگە راقمەت!
اۆتور
كۇنسۇلتان وتارباي
