ولجاس بەكتەنوۆ «سامۇرىق- ەنەرگو» باسشىسىنىڭ نە سەبەپتى قىزمەتتەن كەتكەنىن ايتتى
استانا. KAZINFORM - «سامۇرىق- ەنەرگو» ا ق باسقارما ءتوراعاسى قايرات ماقسۇتوۆ جاڭا ەنەرگەتيكالىق قۋاتتى سالۋ جانە پايدالانۋعا بەرۋ مەرزىمىنىڭ ساقتالۋىن جەتكىلىكتى دەڭگەيدە باقىلاماعانى ءۇشىن قىزمەتىنەن بوساتىلدى. بۇل تۋرالى پرەمەر-مينيستر ولجاس بەكتەنوۆ ۇكىمەت وتىرىسىندا مالىمدەدى.
- جاڭا قۋات كوزدەرىن سالۋ مەن ىسكە قوسۋدىڭ بەلگىلەنگەن مەرزىمدەرىن ساقتالۋىن ءتيىستى دەڭگەيدە باقىلاماعانى ءۇشىن كەشە «سامۇرىق-ەنەرگو» ا ق باسقارما ءتوراعاسى قايرات ماقسۇتوۆتى قىزمەتىنەن بوساتۋ تۋرالى شەشىم قابىلداندى. وعان بىرنەشە رەت ەسكەرتۋ جاسالعان بولاتىن، ول ءتيىستى قورىتىندى جاساعان جوق. سوندىقتان كەشە پرەزيدەنت تاراپىنان قاتاڭ سىن ايتىلدى، سودان كەيىن ءتيىستى شەشىم قابىلداندى، - دەپ ءتۇسىندىردى پرەمەر-مينيستر.
سونىمەن قاتار ەندى ەنەرگەتيكا مينيسترلىگىنە «سامۇرىق-قازىنا» قورىمەن بىرلەسىپ، ەنەرگەتيكالىق جوبالاردى ىسكە اسىرۋ جانە مۇنداي جاعدايلاردىڭ الداعى ۋاقىتتا قايتالانۋىنا جول بەرمەۋ جونىندە شارالار قابىلداۋ تاپسىرىلدى.
ايتا كەتەيىك، قازاقستاندا 2029 -جىلدىڭ سوڭىنا دەيىن 13,3 گۆت جاڭا ەلەكتر قۋاتى ىسكە قوسىلادى.
