ولجاس بەكتەنوۆ ينۆەستورلارعا: مەملەكەتتىك ورگاندار تاراپىنان ەشقانداي قىسىم كورمەيسىزدەر
استانا. KAZINFORM - بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ وتاندىق جانە شەتەلدىك ينۆەستورلارعا ۇندەۋ جولدادى.
«بۇگىندە الەمنىڭ كوپتەگەن ەلدەرى ينۆەستيتسيا تارتۋعا بارىنشا ءمان بەرىپ وتىر. قازاقستاننىڭ دا ماقساتى - سول! ءبىز وتاندىق جانە شەتەلدىك بيزنەسپەن ءوزارا ءتيىمدى ىنتىماقتاستىق ورناتۋعا مۇددەلىمىز. ءبىز ۇزاقمەرزىمدى ينۆەستيتسيا ءۇشىن بارىنشا قولايلى جاعداي جاساۋعا ۇدايى ۇمتىلىپ كەلەمىز. جوعارى دەڭگەيدە وڭدەلگەن ونىمدەر شىعارۋعا، اقپاراتتىق تەحنولوگيانى وزىق قارقىنمەن دامىتۋعا، ەلىمىزدىڭ سەرپىندى دامۋىنا ىقپال ەتەتىن يننوۆاتسيالىق كاسىپورىن قۇرۋعا باعىتتالعان ءاربىر ءىرى ينۆەستيتسيالىق جوباعا قولداۋ كورسەتۋگە قازاقستان ۇكىمەتى كەپىلدىك بەرەدى دەپ سەندىرگىم كەلەدى»، - دەدى ۇكىمەت باسشىسى.
ولجاس بەكتەنوۆ ۇكىمەت ينۆەستورلارعا رەسۋرستارعا كەدەرگىسىز قول جەتكىزۋگە مۇمكىندىك جاسايتىنىن، ينفراقۇرىلىمدىق جانە كونسۋلتاتيۆتىك قولداۋ كورسەتىپ، ءونىمىن وتكىزۋگە كومەكتەسەتىنىن باسا ايتتى.
«سىزدەر مەملەكەتتىك جانە قۇقىق قورعاۋ ورگاندارى تاراپىنان ەشقانداي قىسىم كورمەيسىزدەر. وعان ەشقانداي كۇمان بولماسىن. كەرىسىنشە، ۇكىمەت سىزدەرگە سەنىمدى ءارى اشىق ارىپتەس بولادى. بۇل ماسەلەلەردى شەشۋ ءۇشىن ينۆەستيتسيالىق شتاب جۇمىس ىستەيدى. وتكەن جىلدىڭ سوڭىندا پرەزيدەنت قاسىم-جومارت توقايەۆ اتالعان شتابقا ەرەكشە وكىلەتتىكتەر بەردى. ءبىز وتاندىق جانە شەتەلدىك ينۆەستيتسيالار اعىنىن ارتتىرۋ ءۇشىن باسقا دا باستامالاردى ىسكە اسىرۋعا نيەتتىمىز. ولاردىڭ قاتارىندا ەكونوميكانىڭ باسىم سالالارىندا ينۆەستورلار ءۇشىن تۇبەگەيلى ىنتالاندىرۋ شارالارى مەن جاڭا تاسىلدەردى قولدانۋ، سالىقتىق پرەفەرەنسيالار، بيۋروكراتيانى جانە بيزنەسكە قاجەتسىز تالاپتاردى الىپ تاستاۋ كوزدەلۋدە. كۇش-جىگەرىمىزدى جۇمىلدىرا وتىرىپ، ءبىز قازاقستان ەكونوميكاسىن دامىتۋدا ەلەۋلى تابىستارعا قول جەتكىزەمىز جانە ءوزارا ءتيىمدى ىنتىماقتاستىقتى قامتاماسىز ەتەمىز دەپ سەنەمىن»، - دەدى پرەمەر-مينيستر.
ينۆەستورلارعا ىڭعايلى بولۋى ءۇشىن مەملەكەتتىك قولداۋ شارالارىنىڭ ءبىرىڭعاي سيفرلىق پلاتفورماسىن ەنگىزۋ قاجەت.
«تاعى ءبىر ماڭىزدى ماسەلە - جەرگىلىكتى قامتۋ ۇلەسىن ۇلعايتۋ. ينۆەستورلاردىڭ، كۆازيمەملەكەتتىك سەكتوردىڭ ساتىپ الۋ راسىمدەرىندە وتاندىق تاۋارلار مەن قىزمەتتەردىڭ ۇلەسىن بارىنشا ۇلعايتۋ قاجەت. وتاندىق ءوندىرىستى دامىتۋ، شاعىن جانە ورتا بيزنەستى قولداۋ، جاڭا جۇمىس ورىندارىن قۇرۋ - ءبىزدىڭ نەگىزگى باسىم مىندەتتەرىمىزدىڭ ءبىرى. ينۆەستورلار دا ونى ىسكە اسىرۋعا بەلسەندى ۇلەس قوسا الادى. مەملەكەت ينۆەستورلارعا ايتارلىقتاي قولداۋ كورسەتىپ وتىر»، - دەدى پرەمەر- مينيستر.
ۇكىمەت باسشىسىنىڭ اتاپ وتۋىنشە، ولار دا ءوز تاراپىنان ونىمدىلىكتى ارتتىرۋ، ەڭبەك قاۋىپسىزدىگىن قامتاماسىز ەتۋ، جەرگىلىكتى كادرلاردى وقىتۋ، تاۋارلار مەن قىزمەتتەردىڭ ەكسپورتىن جانە باسەكەگە قابىلەتتىلىگىن ارتتىرۋ بويىنشا قارسى مىندەتتەمەلەردى ورىنداۋعا ءتيىس.
«اگرو ونەركاسىپ كەشەنى سالاسىنداعى سۋبسيديالاۋ تاسىلدەرى دە وزگەرتۋدى قاجەت ەتەدى. قولدانىستاعى پراكتيكا شارۋالاردى وزىق اگروتەحنولوگيا مەن يننوۆاتسيانى تارتۋعا ىنتالاندىرمايدى. وسىلايشا، بولىنگەن اقشانىڭ قايتارىمى بىلىنبەي قالادى. جەر ۋچاسكەلەرىن الۋ، ينفراقۇرىلىم جەتكىزۋ راسىمدەرىنىڭ ۇزاق ءارى قۇرىلىس نورمالارىنىڭ كۇردەلى بولۋى - مۇنىڭ بارلىعى ينۆەستيتسيالىق احۋالعا تەرىس اسەرىن تيگىزەدى. مەملەكەت قولداۋ شارالارىنا وراسان كوپ قاراجات ءبولىپ وتىرعانىمەن، جەكە كاپيتالدى تارتۋ مۇلدەم جەتكىلىكسىز. بۇل ىسكە وتاندىق بانكتەر مەن حالىقارالىق قارجى ينستيتۋتتارىنىڭ قاتىسۋى دا ماردىمسىز. وسىعان بايلانىستى قوسىمشا قارجىلاندىرۋ كوزدەرىن تارتۋ بويىنشا پارمەندى شارالار قابىلداۋ كەرەك. ونىڭ ۇستىنە، مەملەكەتتىك ورگاندار مەن دامۋ ينستيتۋتتارى اراسىندا ءوزارا ۇيلەسىمدى ءىس-قيمىلدىڭ جوقتىعىنان ينۆەستورلار مەملەكەتتىك قولداۋ شارالارى تۋرالى اقپاراتتى بىلە بەرمەيدى»، - دەدى ولجاس بەكتەنوۆ.
ونىڭ سوزىنە قاراعاندا، ينۆەستورلاردىڭ كوپشىلىگى قازاقستان دامۋ بانكى نەمەسە دامۋ سياقتى بىرنەشە ينستيتۋتتى عانا بىلەدى.
«مەملەكەتتىك قولداۋ شارالارىن ۇسىنۋدىڭ ءبىرىڭعاي بازاسى جانە ولاردىڭ تيىمدىلىگىن باعالاۋ جۇيەسى جوق. ينۆەستورلارعا ىڭعايلى بولۋى ءۇشىن مەملەكەتتىك قولداۋ شارالارىنىڭ ءبىرىڭعاي سيفرلىق پلاتفورماسىن ەنگىزۋ قاجەت. بۇل ماسەلە تىم سوزىلىپ كەتتى. اكىمشىلىك راسىمدەرگە ارنالعان سيفرلىق قىزمەتتەردىڭ بولۋى - ينۆەستورلار ءۇشىن ماڭىزدى. مىسالى، قىزمەتتەردى ءبىر تەرەزە ونلاين-مەحانيزمى ارقىلى قولجەتىمدى ەتۋگە بولادى. ءبىز مۇنى بۇرىننان ايتىپ كەلەمىز. ءبىراق، ناتيجە شامالى. كورىپ وتىرعانىمىزداي، پروبلەمالار بار جانە ءبىز وسى باعىتتاعى جۇمىستى تەز ارادا ءبىر جۇيەگە ءتۇسىرىپ، جەڭىلدەتۋىمىز كەرەك»، - دەدى ول.
اۆتور
مارلان جيەمباي
