ولجاس بەكتەنوۆ تاپسىرمالارىن دۇرىس ورىنداماي وتىرعان وڭىرلەردى اتادى

استانا. KAZINFORM - بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ ورتكە قارسى شارالاردى باياۋ جۇرگىزىپ جاتقان وڭىرلەردى اتادى.

پرەمەر-مينيستر مامىر ايىنداعى ۇكىمەت وتىرىسىندا اكىمدىكتەرگە ورتكە قارسى بارلىق قاجەتتى دايىندىق شارالارىن جۇرگىزۋدى تاپسىرعانىن ەسكە سالدى.

«الايدا، كەيبىر وبلىستاردا اتالعان جۇمىس ءوز دەڭگەيىندە جۇرگىزىلمەي وتىر. ماسەلەن، اباي، جەتىسۋ، قاراعاندى، قوستاناي جانە پاۆلودار وبلىستارىندا سۋ كوزدەرىنىڭ ءتۇبىن تەرەڭدەتۋ جۇمىستارى جۇرگىزىلگەن جوق. قوستاناي، اباي جانە ۇلىتاۋ وبلىستارىندا وتىن قورىمەن قامتاماسىز ەتۋ ماسەلەلەرى تولىق شەشىلمەي وتىر. قوستاناي وبلىسىندا ءورتتىڭ الدىن الۋ جانە ءسوندىرۋ جونىندەگى ءتيىستى جەدەل شتاب ۋاقتىلى قۇرىلماعان. اقمولا، اتىراۋ، سولتۇستىك قازاقستان جانە ۇلىتاۋ وبلىستارىندا ورتكە قارسى جەر جىرتۋ جۇمىستارى باياۋ ءجۇرىپ جاتىر. ونسىز دالا نەمەسە ورمان ورتتەرىن اۋىزدىقتاۋ قيىن بولادى»، - دەدى ۇكىمەت باسشىسى.

ونىڭ اتاپ وتۋىنشە، اقتوبە، اتىراۋ جانە سولتۇستىك قازاقستان وبلىستارىنىڭ اۋىلدارىن قۋراعان وسىمدىكتەر مەن قوقىستاردان تازارتۋ جۇمىستارى ءالى اياقتالماعان.

«ءوڭىر اكىمدەرى وسى ماسەلەلەرمەن تىكەلەي اينالىسۋى قاجەت»، - دەدى ولجاس بەكتەنوۆ.

اۆتور

مارلان جيەمباي