ولجاس بەكتەنوۆ : قوجا احمەت ياساۋي كەسەنەسى - ادامزاتتىڭ اسىل مۇراسى
استانا. KAZINFORM - قازاقستان پرەمەر-ءمينيسترى ولجاس بەكتەنوۆ تۇركىستان وبلىسىنا جۇمىس ساپارى اياسىندا قوجا احمەت ياساۋي كەسەنەسىنە بارىپ، مەملەكەت باسشىسىنىڭ ساۋلەت ونەرىنىڭ جارقىن ۇلگىسى ءارى يۋنەسكو-نىڭ الەمدىك مادەنيەتتىڭ بىرەگەي مۇراسىن ساقتاۋ ءىسى جونىندەگى تاپسىرماسىنىڭ ورىندالۋ بارىسىمەن تانىستى، دەپ حابارلايدى ۇكىمەتتىڭ باسپا ءسوز قىزمەتى.
قوجا احمەت ياساۋي كەسەنەسى - تۇركىستاننىڭ ساۋلەت-تاريحي كەشەنىنىڭ ءبىرى، وعان جىل سايىن 1 ميلليوننان استام ادام كەلىپ، زيارات ەتەدى. كەسەنەنىڭ ءتيىستى جاي-كۇيىن ساقتاۋ جونىندەگى جۇمىستار تابيعي جاعدايلاردىڭ اسەرىنە بايلانىستى جانە بىرەگەي ساۋلەت ەسكەرتكىشى مەن يۋنەسكو-نىڭ دۇنيەجۇزىلىك مۇرا نىسانىنىڭ ساقتالۋىن قامتاماسىز ەتۋگە باعىتتالعان.
كۇردەلى جوندەۋ جۇمىستارى وتكەن جىلدىڭ تامىز ايىنان باستاپ جۇرگىزىلىپ كەلەدى. بۇگىندە كەسەنەدە سىرتقى ورتا مەن كليماتتىق فاكتورلاردىڭ اسەرىن ولشەيتىن داتچيكتەر ورناتىلعان.
عىلىمي-رەستاۆراتسيالىق جوندەۋ جۇمىستارى جالعاسۋدا. ۇكىمەت باسشىسى مادەني ەسكەرتكىشتى ساقتاۋ بويىنشا جۇرگىزىلىپ جاتقان جۇمىستاردىڭ ماڭىزدى ەكەنىن اتاپ ءوتتى.
«قوجا احمەت ياساۋي كەسەنەسى - تەك قازاق حالقىنىڭ ەمەس، بۇكىل ادامزاتتىڭ اسىل مۇراسى. مەملەكەت باسشىسى كەسەنەنىڭ تاريحي كەلبەتىن ساقتاۋعا قاتىستى تاپسىرما بەردى. بۇل - ءبىزدىڭ ورتاق مىندەتىمىز. كەسەنەنىڭ جاي-كۇيىن ەرەكشە باقىلاۋدا ۇستاۋ قاجەت»، - دەدى ولجاس بەكتەنوۆ. پرەمەر-مينيستر ۇكىمەت تاراپىنان جۇرگىزىلىپ جاتقان جۇمىستارعا بارلىق قولداۋ شارالارى كورسەتىلەتىنىن اتاپ ءوتتى.
اۆتور
ەلميرا ورالبايەۆا
