ولجاس بەكتەنوۆ: قازىر باستىسى - ادام ءومىرىن ساقتاپ قالۋ جانە اپات زارداپتارىن ازايتۋ

ت ج م دەرەكتەرى بويىنشا اكىمدىكتەرمەن بىرلەسىپ، 2,3 ميلليون м3 استام اعىن سۋ شىعارىلىپ، 162 مىڭنان استام قۇم تولتىرىلعان قاپشىق جانە 31587 توننا ينەرتتى ماتەريال توسەلدى.

اپاتتىق-قۇتقارۋ جۇمىستارىنا 6349 ادام، 2192 تەحنيكا، 689 سورعى قۇرالى جانە ت. ب. جۇمىلدىرىلدى.

«بۇل - سوڭعى جىلدارداعى ەڭ ۇلكەن سۋ تاسقىنى. قازىر باستىسى - ادام ءومىرىن ساقتاپ قالۋ جانە اپات زارداپتارىن ازايتۋ. كەيىن جەكەلەگەن لاۋازىمدى تۇلعالاردىڭ ءوز قىزمەتتىك مىندەتتەرىنە سالعىرت قاراۋىنىڭ ىقتيمال فاكتىلەرىن انىقتاۋ ماقساتىندا ەگجەي-تەگجەيلى تەكسەرۋ جۇرگىزىلەتىن بولادى. مەن بۇل ماسەلەنى باس پروكۋرورمەن تالقىلادىم. بۇگىندە بارلىق كۇش سۋ تاسقىنىنا قارسى جۇمىستارعا جۇمىلدىرىلدى. مەنىڭ ءبىرىنشى ورىنباسارىم رومان ۆاسيليەۆيچ سكليار ەڭ قاتتى زارداپ شەككەن وڭىرلەردە ءجۇر»، - دەدى ولجاس بەكتەنوۆ.

ۇكىمەت باسشىسى سونداي-اق سولتۇستىك وڭىرلەردە دە سۋ باسۋ قاۋپى بار ەكەنىن اتاپ ءوتتى. بۇعان دەيىن سولتۇستىك قازاقستان وبلىسىنداعى سۋ توراپتارىنىڭ جاعدايى تەكسەرىلگەن بولاتىن.

اۆتور

اسحات رايقۇل