ولجاس بەكتەنوۆ ەكونوميكانىڭ 6 پايىز ءوسىمىن قامتيتىن جوسپار ازىرلەۋدى تاپسىردى
استانا. KAZINFORM - ۇكىمەت باسشىسى ولجاس بەكتەنوۆ ۇلتتىق ەكونوميكا مينيسترلىگىنە ەكونوميكانى دامىتا ءتۇسۋدىڭ جاڭا جوسپارىن ازىرلەۋگە ءبىر اي ۋاقىت بەردى.
«ارىپتەستەر، ەڭ كەمى %6 دەڭگەيىندە تۇراقتى ەكونوميكالىق ءوسۋدى قامتاماسىز ەتۋ ۇكىمەتتىڭ بيىلعا جانە ورتا مەرزىمدى كەزەڭگە ارنالعان باسىم مىندەتى بولىپ قالا بەرەدى. وسىعان بايلانىستى مەملەكەتتىك قولداۋ شارالارىن، سونداي-اق جاڭا جانە ىسكە اسىرىلىپ جاتقان جوبالاردىڭ سالالاردى دامىتۋعا قوساتىن ۇلەسىن ەسكەرە وتىرىپ، ەلىمىزدىڭ الەۋمەتتىك-ەكونوميكالىق دامۋ بولجامىنىڭ پارامەترلەرىن قايتا قاراۋ قاجەت»، - دەدى ولجاس بەكتەنوۆ ۇكىمەت وتىرىسىندا.
ونىڭ ايتۋىنشا، ۇكىمەت ناتيجەلى جۇمىس ىستەپ، ەكونوميكانىڭ بارلىق سالاسىن ءتيىمدى ۇيلەستىرۋى كەرەك.
«ۇلتتىق ەكونوميكا مينيسترلىگىنە سالالىق مەملەكەتتىك ورگاندارمەن بىرلەسىپ، ءبىر اي مەرزىمدە بيىل %6 دەڭگەيىندە ەكونوميكالىق ءوسىمدى قامتاماسىز ەتۋ جونىندەگى ءبىرىنشى كەزەكتەگى ءىس-قيمىل جوسپارىن ازىرلەپ، بەكىتۋدى تاپسىرامىن. جوسپاردا قارجىلاي قامتاماسىز ەتىلگەن ناقتى ءارى ءتيىمدى ءىس-شارالار كورىنىس تابۋى ءتيىس»، - دەدى پرەمەر-مينيستر.
اۆتور
داۋلەت ىزتىلەۋ
