ولجاس بەكتەنوۆ جۇمىس ساپارىمەن بىشكەككە باردى

بىشكەك. KAZINFORM - مەملەكەت باسشىسىنىڭ تاپسىرماسى بويىنشا قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ قىسقا مەرزىمدى جۇمىس ساپارىمەن قىرعىز رەسپۋبليكاسىنا باردى، دەپ حابارلايدى ۇكىمەتتىڭ باسپا ءسوز قىزمەتى.

بىشكەكتە قازاقستان ۇكىمەتىنىڭ باسشىسىن قىرعىزستان پرەزيدەنتى سادىر جاپاروۆ قابىلدادى. ولجاس بەكتەنوۆ مەملەكەت باسشىسى قاسىم-جومارت توقايەۆتىڭ سالەمىن جەتكىزىپ، قازاقستان ۇكىمەتى ەكىجاقتى ساۋدا- ەكونوميكالىق ىنتىماقتاستىقتى ودان ءارى دامىتۋ ءۇشىن بار كۇش- جىگەردى جۇمساۋعا دايىن ەكەنىن ءبىلدىردى.

قىرعىزستان مينيسترلەر كابينەتىنىڭ ءتوراعاسى - پرەزيدەنت اكىمشىلىگىنىڭ باسشىسى اقىلبەك جاپاروۆپەن ۇكىمەتتىك دەڭگەيدەگى كەلىسسوز بارىسىندا پرەزيدەنت سادىر جاپاروۆتىڭ قازاقستانعا الداعى رەسمي ساپارىنا دايىندىق ماسەلەسى قارالدى.

تاراپتار ءوزارا تاۋار اينالىمىن $2 ميللياردقا دەيىن ۇلعايتۋ جونىندەگى بىرلەسكەن شارالاردى تالقىلادى. ونىڭ ىشىندە ەكى ەلدىڭ ساۋدا- ەكونوميكالىق ىنتىماقتاستىعىن نىعايتۋعا باعىتتالعان ناقتى جوبالارعا نازار اۋدارىلدى.

قازاقستان $260 ميلليون سوماسىنا 195 تاۋار پوزيتسياسى بويىنشا ەكسپورتتى ۇلعايتۋعا دايىن. ازىق- تۇلىك، ونەركاسىپ، مۇناي- حيميا، قۇرىلىس، فارماتسيەۆتيكا جانە باسقا دا سالالاردىڭ الەۋەتى زور. سونداي- اق بۇعان شەكارا ماڭىندا يندۋستريالىق ساۋدا- لوگيستيكالىق كەشەن قۇرۋ تۋرالى جوسپارلار دا ىقپال ەتەدى. اتالعان جوبانىڭ ىسكە قوسىلۋى مۋلتيپليكاتيۆتى اسەرگە يە بولىپ، ساۋدا- ەكونوميكالىق جانە ينۆەستيتسيالىق بايلانىستارعا قوسىمشا سەرپىن بەرەدى.

اۋىل شارۋاشىلىعىنداعى ىنتىماقتاستىقتىڭ الەۋەتىن تولىققاندى اشۋ ءۇشىن ەكى ەلدىڭ ۇكىمەتتەرى ونىمدەردىڭ ءوزارا تاسىمالىن ۇلعايتۋ جانە بىرلەسكەن جوبالاردى ىسكە قوسۋ جونىندە شارالار قابىلدايتىن بولادى، سونداي-اق ەكى ەلدىڭ عىلىمي- زەرتتەۋ ينستيتۋتتارى مەن اگرارلىق جوعارى وقۋ ورىندارى اراسىنداعى بەلسەندى ءوزارا ءىس- قيمىل جالعاسادى.

ولجاس بەكتەنوۆ 2024 -جىلعى ۆەگەتاتسيالىق كەزەڭدە مەملەكەتارالىق پايدالانۋداعى سۋ شارۋاشىلىعى وبەكتىلەرىنىڭ جۇمىس رەجيمدەرىن بەكىتۋدىڭ ماڭىزىن اتاپ ءوتتى.

سونىمەن قاتار تاراپتار قازاق- قىرعىز شەكاراسىنىڭ وتكىزۋ قابىلەتىن جانە جۇك تاسىمالداۋشىلار ءۇشىن ترانزيتتى تارتىمدى ەتۋ باعىتىندا اتقارىلىپ جاتقان جۇمىس قارقىنىن اتاپ ءوتتى. قازاقستاننىڭ ترانزيتتىك كولىك الەۋەتىن دامىتۋدىڭ 2030 -جىلعا دەيىنگى تۇجىرىمداماسىنا سايكەس «قاراسۋ»، «بەساعاش»، «اۋحاتتى»، «سارتوبە» «ايشا ءبيبى»، «سىپاتاي باتىر»، «كەگەن» وتكىزۋ بەكەتتەرىن سالۋ جانە رەكونسترۋكتسيالاۋ كوزدەلىپ وتىر.

كەزدەسۋ بارىسىندا تاراپتار ءبىلىم، مادەنيەت جانە تۋريزم سالالارىنداعى ءوزارا ءىس- قيمىل ماسەلەلەرىن دە تالقىلادى.

كەلىسسوز قورىتىندىسى بويىنشا ەكى ەلدىڭ مەملەكەت باسشىلارى قويعان مىندەتتەردىڭ بارلىعىن تولىق كولەمدە ىسكە اسىرۋعا جانە قازاق- قىرعىز ىنتىماقتاستىعىن جاڭا دەڭگەيگە كوتەرۋگە دايىندىق ماسەلەسى ناقتىلاندى.

اۆتور

ايدار وسپاناليەۆ