ولجاس بەكتەنوۆ اۋىل تۇرعىندارىنىڭ جاپپاي كوشىپ كەتۋ سەبەپتەرىن اتادى

استانا. KAZINFORM - بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ اۋىل تۇرعىندارىنىڭ جاپپاي كوشىپ كەتۋ سەبەپتەرىن اتادى.

«ءار اۋىل تۇرعىنى تۇرمىستىق احۋالدىڭ جاقسارعانىن قالايدى. ول ءۇشىن ءبىز قالا مەن اۋىلدىڭ تۇرمىس دەڭگەيىندەگى الشاقتىقتى بىرتىندەپ قىسقارتىپ كەلەمىز. مۇنداعى نەگىزگى فاكتور - قولجەتىمدى قىزمەتتەر، ياعني ساپالى جول، مەديتسينا مەن ءبىلىم بەرۋ سياقتى اۋىل حالقىنىڭ جايلى تۇرمىسىنا قاجەتتى يگىلىكتەردىڭ بولۋى. قازىرگى ۋاقىتتا وڭىرلىك ستاندارتتار جۇيەسىنە سايكەس، اكىمدىكتەرگە اۋىل تۇرعىندارىنىڭ تۇرمىس ساپاسىن جاقسارتۋ بويىنشا مىندەتتەر قويىلىپ وتىر. وبەكتىلەر مەن قىزمەتتەردىڭ ناقتى تىزبەسى وسى جۇيەدە قامتىلعان. تىزبەدە جازىلعان يگىلىكتەردىڭ بارلىعى ءاربىر ەلدى مەكەندە بولۋعا ءتيىس. الايدا ستاندارتتار جۇيەسىن باسقا باعدارلامالىق قۇجاتتارمەن، سونىڭ ىشىندە ۇلتتىق جوبالارمەن ءوزارا ۇيلەستىرۋ ماسەلەسى شەشىمىن تاپپاي كەلەدى. وسىنىڭ كەسىرىنەن اۋىلداردىڭ سۇرانىستارى ءتيىمسىز جوسپارلانادى. مەكتەپتەر مەن مەديتسينالىق مەكەمەلەر - اۋىلداعى ەڭ ماڭىزدى وبەكتىلەر. ولارعا ايرىقشا نازار قاجەت»، - دەدى ۇكىمەت باسشىسى.

ونىڭ ايتۋىنشا، قازىرگى تاڭدا اپاتتى جاعدايدا تۇرعان اۋىل مەكتەپتەرى از ەمەس. دەنساۋلىق ساقتاۋ عيماراتتارى تاپشى. كەيبىر اۋىلداردىڭ تۇرعىندارى باسقا ەلدى مەكەندەرگە بارىپ ەمدەلۋگە، وقۋعا ءماجبۇر.

«سونداي-اق اۋىزسۋ مەن جولداردىڭ ساپاسىنا، ەلەكتر قۋاتى مەن ۇيالى بايلانىستىڭ جاعدايىنا جانە ينتەرنەتتىڭ قولجەتىمدى بولۋىنا قاتىستى مىڭداعان شاعىم كەلىپ تۇسەدى. مۇنىڭ بارلىعى اۋىل تۇرعىندارىنىڭ جاپپاي كوشىپ كەتۋىنە سەبەپشى بولادى. سوندىقتان الەۋمەتتىك، ينجەنەرلىك جانە كولىك ينفراقۇرىلىمىن، اسىرەسە شەكارا ماڭىنداعى اۋماقتاردىڭ ينفراقۇرىلىمىن دامىتۋ جۇمىستارىن كۇشەيتۋ كەرەك. وسى مىندەتتەردى كەزەڭ-كەزەڭمەن شەشۋ ءۇشىن سالىقتاردىڭ جانە بيۋدجەتكە تۇسەتىن تولەمدەردىڭ كەيبىر تۇرلەرىن اۋىلدىق وكرۋگتەردىڭ بيۋدجەتىنە بەرۋدى جالعاستىرۋ قاجەت. سونداي- اق جەكە باستامالارعا بەلسەندى قولداۋ كورسەتۋ كەرەك. ءاربىر بيزنەس سۋبەكتىسى ەكونوميكالىق جاۋاپكەرشىلىكپەن قاتار، حالىق الدىنداعى الەۋمەتتىك جاۋاپكەرشىلىگىن دە تەرەڭ سەزىنۋگە ءتيىس»، - دەدى ولجاس بەكتەنوۆ.

ۇكىمەت باسشىسى جەكە باسىنىڭ عانا ەمەس، تۋعان اۋىلىنىڭ دا قامىن ويلايتىن كاسىپكەر ماڭىزدى ينفراقۇرىلىمدىق جوبالاردى ىسكە اسىرۋدا مەملەكەتكە جاردەم كورسەتە الاتىندىعىن باسا ايتتى.

«ماسەلەن، بىلتىر تۇركىستان وبلىسىنىڭ شۇبارسۋ اۋىلىنان شىققان كاسىپكەر سول ەلدى مەكەنگە ۇلكەن مەكتەپ سالىپ بەردى. اقمولا وبلىسىنىڭ قاراوتكەل اۋىلىندا جەكە قاراجاتقا بالاباقشا سالىندى. كاسىپكەرلەر تۇرعىن ءۇي قۇرىلىسىنا، جولداردى جوندەۋگە، كوشەلەردى اباتتاندىرۋعا، قوعامدىق دەمالىس ورىندارىن سالۋعا قولداۋ كورسەتۋدە. ەلىمىزدە مۇنداي جاقسى مىسالدار جەتكىلىكتى. اكىمدىكتەر اۋىل تۇرمىسىن جاقسارتۋ ىسىنە بيزنەستى دە بەلسەندى جۇمىلدىرۋعا ءتيىس. سونىمەن قاتار اكىمدىكتەر اۋىلدىق جەرلەردە كادر تاپشىلىعى ماسەلەسىن شەشۋى قاجەت. كەلگەن ماماندارعا، اسىرەسە جاستارعا قولداۋ كورسەتۋ كەرەك. ول ءۇشىن «ديپلوممەن اۋىلعا» جوباسى بار. جالپى، اۋىلدىق اۋماقتاردى دامىتۋ تۇجىرىمداماسىنىڭ ءىس- شارالارىنان تۋىندايتىن بارلىق ماسەلەلەر جەرگىلىكتى جەرلەردە جەدەل ءارى تۇرعىنداردىڭ پىكىرىن ەسكەرە وتىرىپ، شەشىلۋگە ءتيىس»، - دەدى پرەمەر- مينيستر.

اۆتور

مارلان جيەمباي