ولجاس بەكتەنوۆ اقتوبە وبلىسىنداعى سۋ تاسقىنى جاعدايىن تەكسەردى
اقتوبە. KAZINFORM - قازاقستان پرەمەر- ءمينيسترى، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى زارداپتارىن جويۋ جونىندەگى رەسپۋبليكالىق شتابتىڭ باسشىسى ولجاس بەكتەنوۆ اقتوبە وبلىسىنداعى سۋ تاسقىنىنا بايلانىستى جاعدايدى تەكسەرىپ، مەملەكەت باسشىسىنىڭ تاپسىرمالارىنىڭ جەرگىلىكتى جەرلەردە ورىندالۋ بارىسىمەن تانىستى.
اتاپ ايتقاندا، ۇكىمەت باسشىسى ءبىرقاتار سۋ قويماسىن تىكۇشاقپەن ارالاپ، سۋ تاسقىنىنان زارداپ شەككەن ۇيلەرگە باردى، سونداي-اق احۋالدىق ورتالىقتىڭ جۇمىسىمەن تانىسىپ، رەسپۋبليكالىق شتابتىڭ وتىرىسىن وتكىزدى.
سول جەردە ولجاس بەكتەنوۆ سۋ باسقان ۇيلەردىڭ جاي-كۇيىن قاراپ، تۇرعىنداردىڭ باسپانالارىن قالپىنا كەلتىرۋ جانە باسقا دا قوسىمشا قولداۋ شارالارىن كورسەتۋگە قاتىستى سۇراقتارىنا جاۋاپ بەردى. ماسەلەن، اكىمدىك تىزىمدەرى بويىنشا سۋ تاسقىنىنان زارداپ شەككەندەر ساناتىنا جاتقىزىلعان بارلىق ازاماتقا نەسيەلەر بويىنشا جىلدىڭ ماۋسىم ايىنىڭ سوڭىنا دەيىن 3 ايعا كرەديتتىك تولەمدەرىن اۆتوماتتى تۇردە كەيىنگە شەگەرۋ مۇمكىندىگى بەرىلەدى. سونىمەن قاتار تولەمدەردى كەشىكتىرگەنى ءۇشىن ايىپپۇلدار مەن ءوسىمپۇلدار سالىنبايدى.
جالپى وبلىستا تاسقىن قاۋپى ءالى سەيىلمەگەن. قازىر وزەندەردىڭ كوپشىلىگىندە سۋ ارناسىنان اسىپ كەتكەلى تۇر. وڭىردە 772 ءۇي سۋ استىندا قالدى. وبلىستىڭ 5 اۋدانىندا (قوبدا، مۇعالجار، تەمىر، ايتەكە ءبي، ويىل) جانە اقتوبە قالاسىندا جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى. سۋ تاسقىنىنا قارسى ءىس- شارالارعا جەكە قۇرامنان 3 140 ادام، 664 تەحنيكا جۇمىلدىرىلدى. بارلىعى 8 763 ادام قاۋىپسىز جەرگە كوشىرىلدى.
ولجاس بەكتەنوۆ كولەمى 15,8 ميلليون كۆپ مەتىر بولاتىن ماعادجان بوگەتىن ارالاپ كوردى، وندا قارعىن سۋ اعىنى سالدارىنان ماعادجان سۋ قويماسىنىڭ بوگەتى بۇزىلدى. ول 1985 -جىلى پايدالانۋعا بەرىلگەن. گيدروتەحنيكالىق قۇرىلىس جەكەمەنشىك «تۇلپار» ج ش س كومپانياسىنىڭ يەلىگىندە. قىزىلتۋ اۋىلىنان 25 ادام، تابانتال قىستاعىنان 11 ادام ەۆاكۋاتسيالاندى.
سونىمەن قاتار بولجامدارعا سايكەس، 5-11 -ءساۋىر ارالىعىندا وبلىستىڭ بارلىق اۋماعىندا اۋا تەمپەراتۋراسى ايتارلىقتاي جىلىنۋى مۇمكىن، قاتتى جاۋىن- شاشىن كۇتىلمەيدى. وسىعان بايلانىستى سۋ تاسقىنىنان زارداپ شەككەن اۋىلدارمەن قاتار، قايتا سۋ الىپ كەتۋ ءقاۋپى جوق ايماقتارداعى ەلدى مەكەندەردىڭ تىنىس- تىرشىلىگىن دە قالپىنا كەلتىرۋگە نازار اۋدارىلدى.
ماسەلەن، قازىردىڭ وزىندە 26 ەلدى مەكەندە ەلەكتر قۋاتىمەن جابدىقتاۋ قالپىنا كەلتىرىلدى. «ەنەرگوجۇيە» ج ش س- ءنىڭ بارلىق بولىمشەلەرى كۇشەيتىلگەن رەجيمدە جۇمىس ىستەۋدە. رەسپۋبليكالىق ماڭىزى بار 9، وبلىستىق ماڭىزى بار - 3 جولدا جانە 9 اۋداندىق ماڭىزى بار جولدا سۋدىڭ توقتاۋىنا بايلانىستى كولىك قوزعالىسىنا قويىلعان شەكتەۋلەر الىنىپ تاستالدى. وڭىردە شىعىندى وتەۋ كوميسسياسى جۇمىس ىستەيدى. ءۇش كۇن ىشىندە كوميسسياعا ماتەريالدىق شىعىنداردى وتەۋ تۋرالى 1623 ءوتىنىش تۇسكەن.
الگوريتمگە سايكەس، تج بولعان كۇننەن باستاپ كۇنتىزبەلىك 30 كۇن ىشىندە كەلتىرىلگەن شىعىندى وتەۋ تۋرالى جەرگىلىكتى اكىمدىكتەرگە ءوتىنىش بەرىلەدى. سونىمەن قاتار اقتوبە وبلىسىندا سۋ تاسقىنىنان زارداپ شەككەن جانە قيىن جاعدايعا تاپ بولعان تۇرعىندار اكىمدىككە ءتيىستى وتىنىشپەن جۇگىنۋ ارقىلى ءبىر رەتتىك تولەم الا الادى.
ولجاس بەكتەنوۆ وبلىس اكىمدىگىنىڭ احۋالدىق ورتالىعىندا بولدى. احۋالدىق ورتالىقتىڭ وپەراتورلارى «109» قىسقا ءنومىرى بويىنشا تاۋلىك بويى جۇمىس ىستەيتىن Call-ورتالىق ارقىلى حالىقپەن بايلانىستا بولادى. سۋ تاسقىنىنا قارسى ءىس-شارالار باستالعاننان بەرى 109 احۋالدىق ورتالىعىنا 15 مىڭنان استام قوڭىراۋ تۇسكەن. 12293 ءوتىنىم تىركەلدى. احۋالدىق ورتالىق كۇشەيتىلگەن رەجيمدە جۇمىس ىستەۋدە، وعان ت ج جانە سۋ تاسقىنىنا قارسى شتاب قىزمەتتەرى قوسىلعان.
قورىتىندى بويىنشا ۇكىمەت باسشىسى ولجاس بەكتەنوۆ سۋ تاسقىنى سالدارىن جويعاننان كەيىن كوممۋنالدىق جانە جەكە مەنشىكتەگى گيدروتەحنيكالىق قۇرىلىستاردا جان-جاقتى تەكسەرۋلەر جۇرگىزۋدى تاپسىردى. اقتوبە وبلىسىندا بارلىعى 206 گيدروتەحنيكالىق قۇرىلىس بار.
اۆتور
ابىلايحان جۇماشيەۆ
