گونكونگتا التايدىڭ قىسقى تۋريزمىنىڭ تانىستىرىلىمى «قاراجورعا» بيىمەن اشىلدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
تۇركياداعى تەمەكى شەكپەيتىن اۋىل: ءبىر عاسىردان بەرى جالعاسقان ءداستۇر - TRT
تۇركيانىڭ باتىسىنداعى تازلار اۋىلى تۇرعىندارى 1928 -جىلدان بەرى تەمەكى شەكپەۋ ءداستۇرىن ۇستانىپ كەلەدى. افيونكاراحيسار ءۋالاياتىنا قاراستى اۋىلدا بۇل باستاما اقساقال احمەت اعانىڭ ۇسىنىسىمەن قولعا الىنعان. سودان بەرى تەمەكىدەن باس تارتۋ ۇرپاقتان-ۇرپاققا جالعاسىپ، جەرگىلىكتى مادەنيەتتىڭ اجىراماس بولىگىنە اينالعان. بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
«TRT» - نىڭ دەرەگىنشە، ءتۇرلى زەرتتەۋلەر تۇركيانىڭ تەمەكى تۇتىنۋ بويىنشا الەمدە الدىڭعى قاتاردا ەكەنىن كورسەتەدى. وسى تۇرعىدان العاندا، شامامەن 2 مىڭ تۇرعىنى بار تازلار اۋىلىنىڭ تاجىريبەسى ەرەكشە نازار اۋدارتادى. اۋىلدىڭ 66 جاستاعى ۋاعىزشىسى ءارى ەسەپشىسى مەحمەت ايدوعمۋشتىڭ ايتۋىنشا، بالالار تەمەكى شەكپەۋدى ارنايى ناسيحات ارقىلى ەمەس، اتا-انالارى مەن ۇلكەندەرىنە قاراپ ۇيرەنەدى. بۇل ءداستۇردىڭ قالىپتاسۋىنا دەنساۋلىققا قامقورلىق، ءدىني قۇندىلىقتار جانە قوعامداعى ءوزارا جاۋاپكەرشىلىك ىقپال ەتكەن.
الايدا جاستاردىڭ ءبىلىم الۋ جانە جۇمىس تابۋ ماقساتىمەن ستامبۋل مەن بۋرسا سياقتى ءىرى قالالارعا قونىس اۋدارۋى عاسىرلىق ءداستۇردىڭ بولاشاعىنا قاتىستى الاڭداۋشىلىق تۋعىزادى. اۋىل جاستارىنىڭ ءبىرى مۋرات كاراسوگۇتتىڭ سوزىنشە، تازلاردا تەمەكى شەكپەۋ قالىپتى ءومىر سالتى سانالادى. ەندىگى مىندەت — وسى ۇستانىمدى كەلەسى ۇرپاققا جەتكىزىپ، اتا-بابادان قالعان ءداستۇردى ساقتاپ قالۋ.
گونكونگتا التايدىڭ قىسقى تۋريزمىنىڭ تانىستىرىلىمى «قاراجورعا» بيىمەن اشىلدى- «التاي اقپاراتى»
قىتايدىڭ شىڭجاڭ-ۇيعىر اۆتونوميالىق اۋدانىنداعى التاي ايماعىنىڭ قىسقى تۋريزم الەۋەتىن تانىستىرۋعا ارنالعان «شىعىستىڭ ءىنجۋ- مارجانىندا باس قوسىپ، قارلى مەكەنگە بىرگە ساپار شەگەيىك» اتتى مادەنيەت جانە تۋريزم تانىستىرىلىمى گونكونگتا ءوتتى، دەپ حابارلايدى «التاي اقپاراتى» باسىلىمى.
اتالعان ب ا ق- تىڭ دەرەگىنشە، 8-قازاندا ۇيىمداستىرىلعان ءىس-شاراعا ساياسي، ساۋدا-ەكونوميكا، ءبىلىم بەرۋ سالالارىنىڭ وكىلدەرى، حالىقارالىق سەرىكتەستەر مەن ب ا ق وكىلدەرىن قوسقاندا 150-دەن استام ادام قاتىستى.
تانىستىرىلىمدا التايدىڭ ۇزاققا سوزىلاتىن قارلى ماۋسىمى، ساپالى ۇلپا قارى، شاڭعى تەبۋگە قولايلى جاعدايلارى جانە ءتورت ماۋسىمدىق تۋريستىك مۇمكىندىكتەرى تانىستىرىلدى.
«ءىس-شارانىڭ بەتاشار ءبيى بولعان «قارا جورعا» شىڭجاڭنىڭ سالت-ءداستۇرىن تولىق ايگىلەپ، التايدىڭ كەڭ-بايتاق كوركەم قار-مۇز كورىنىسىن كوز الدىعا اكەلگەندەي بولدى»، دەپ جازادى قىتايلىق ب ا ق. سونداي-اق «قار- مۋز ماياگى» اتتى ناسيحاتتىق بەينەروليك كورسەتىلىپ، جاساندى ينتەللەكت پەن كەڭەيتىلگەن شىنايىلىق تەحنولوگيالارى ارقىلى قوناقتارعا التايدىڭ شاڭعى كۋرورتتارىن ۆيرتۋالدى تاماشالاۋ مۇمكىندىگى ۇسىنىلدى.
جيىندا گونكونگتىڭ حالىقارالىق نارىقتاعى ارتىقشىلىقتارىن پايدالانىپ، التايعا كەلەتىن تۋريستەر اعىنىن ارتتىرۋ، قىسقى سپورتتى دامىتۋ جانە مادەنيەت پەن تۋريزم سالاسىنداعى ىنتىماقتاستىقتى كەڭەيتۋ ماسەلەلەرى تالقىلاندى. ۇيىمداستىرۋشىلاردىڭ ايتۋىنشا، بۇل باستاما التايدىڭ حالىقارالىق تۋريستىك نارىقتاعى تانىمالدىلىعىن ارتتىرىپ، ءوڭىردىڭ «قىتايدىڭ قارلى مەكەنى» رەتىندەگى برەندىن ىلگەرىلەتۋگە ىقپال ەتەدى.
قازاقستان مەن يران ىنتىماقتاستىقتى كەڭەيتۋ ماسەلەلەرىن تالقىلادى - Eurasia Today
قازاقستان سىرتقى ىستەر ءمينيسترىنىڭ ورىنباسارى ارمان يساعاليەۆ يراننىڭ قازاقستانداعى جاڭادان تاعايىندالعان ەلشىسى ماحمۋد سافاري فارحۋدپەن كەزدەستى.
بۇل تۋرالى وسى اپتادا قىرعىزستاندا شىعاتىن Eurasia Today اقپارات اگەنتتىگى حابارلادى.
اتالعان ب ا ق- تىڭ كەلتىرگەن دەرەكتەرىنە سۇيەنسەك، كەزدەسۋ بارىسىندا تاراپتار ساياسي ديالوگتى دامىتۋ، ساۋدا- ەكونوميكالىق ىنتىماقتاستىقتى كەڭەيتۋ جانە مادەني- گۋمانيتارلىق بايلانىستاردى نىعايتۋ ماسەلەلەرىن تالقىلادى. سونداي- اق ءوزارا ساۋدا كولەمىن ارتتىرۋ، كولىك- لوگيستيكالىق الەۋەتتى دامىتۋ جانە بۇرىن قول جەتكىزىلگەن ۋاعدالاستىقتاردى ىسكە اسىرۋعا باسا نازار اۋدارىلدى.
تاراپتار ەكىجاقتى جانە كوپجاقتى فورماتتارداعى ىنتىماقتاستىقتى ودان ءارى جالعاستىرۋعا دايىن ەكەندىكتەرىن راستادى.
وزبەكستاندا ىشكى اۋە رەيستەرىنىڭ بيلەتتەرى 20 پايىزعا دەيىن ارزاندايدى - ءو ز ا
وزبەكستاندا 2026 -جىلعى 16 -قازاننان باستاپ ىشكى اۋە رەيستەرىنىڭ بيلەتتەرى ورتا ەسەپپەن 20 پايىزعا دەيىن ارزاندايدى، دەپ حابارلايدى«ءو ز ا» اقپارات اگەنتتىگى.
جەرگىلىكتى ب ا ق- تىڭ حابارلاۋىنشا، تاريفتەردى تومەندەتۋ تۋرالى شەشىم باسەكەلەستىك كوميتەتى جۇرگىزگەن زەرتتەۋ ناتيجەسىندە قابىلدانعان. زەرتتەۋ بارىسىندا اۋە تاسىمالىنا بايلانىستى شىعىنداردى وڭتايلاندىرۋ مۇمكىندىكتەرى قاراستىرىلىپ، بيلەتتەر باعاسىن تومەندەتۋ جونىندە ۇسىنىستار ازىرلەنگەن.
جاڭا تاريفتەر ىشكى اۋە قاتىناسىن حالىق ءۇشىن قولجەتىمدى ەتۋگە، ىشكى تۋريزمدى دامىتۋعا جانە وڭىرلەر اراسىنداعى قاتىناستى كەڭەيتۋگە باعىتتالعان.
استانا مەن قۇلجا اراسىندا تىكەلەي اۋە رەيسى اشىلادى- حالىق گازەتى
26 -قازاننان باستاپ FlyArystan اۋە كومپانياسى استانا - قۇلجا باعىتى بويىنشا تىكەلەي رەيستەردى ىسكە قوسادى. بۇل تۋرالى قىتايدىڭ جەنمين جيباو (حالىق گازەتى) اقپاراتتتىق پورتالى حابارلايدى.
اتالعان ب ا ق- تىڭ دەرەگىنە سۇيەنسەك، جاڭا باعىت بويىنشا ۇشاقتار اپتاسىنا ءۇش رەت - دۇيسەنبى، سارسەنبى جانە سەنبى كۇندەرى قاتىنايدى. استانادان ۇشاتىن FS7989 رەيسى جەرگىلىكتى ۋاقىت بويىنشا ساعات 7:55-تە جولعا شىعىپ، بەيجىڭ ۋاقىتىمەن 13:20-دا قۇلجاعا جەتەدى. كەرى باعىتتاعى FS7990 رەيسى قۇلجادان ساعات 15:20-دا ۇشىپ، استاناعا جەرگىلىكتى ۋاقىت بويىنشا 14:50-دە قونادى. بۇل - FlyArystan كومپانياسى الماتى - قۇلجا باعىتىن اشقاننان كەيىنگى قۇلجاعا قاتىنايتىن ەكىنشى حالىقارالىق اۋە باعىتى. جاڭا رەيس ەكى ەل اراسىنداعى تۋريزم، ساۋدا جانە مادەني بايلانىستاردى دامىتۋعا ىقپال ەتەدى دەپ كۇتىلۋدە.
ايتا كەتەيىك، قۇلجا - قىتايدىڭ شىڭجاڭ ولكەسىندەگى ىلە قازاق اۆتونوميالىق وبلىسىنىڭ اكىمشىلىك ورتالىعى. ىلە وزەنى اڭعارىندا، قازاقستان شەكاراسىنا جاقىن ورنالاسقان قالا ءوڭىردىڭ ساۋدا- ەكونوميكالىق، كولىك جانە مادەني ورتالىقتارىنىڭ ءبىرى سانالادى.
سونداي- اق وسى اپتادا جەنمين جيباو اقپاراتتىق پورتالىندا «قازاقستاندا ورتالىق ازياداعى العاشقى «چانان شەبەرحاناسى» قۇرىلدى» دەگەن تاقىرىپتاعى اقپارات جارىق كورگەن بولاتىن.
قازاقستاندا ورتالىق ازيا ەلدەرى اراسىنداعى العاشقى «چانان شەبەرحاناسى» قۇرىلدى. قىتايلىق باسىلىمنىڭ حابارلاۋىنشا، جوبانى شىڭجاڭ كولىك كاسىپتىك- تەحنيكالىق ۋنيۆەرسيتەتى، قىتايدىڭ Changan Automobile كومپانياسى جانە قازاقستانداعى Satbayev University بىرلەسىپ جۇزەگە اسىرعان.
جوبا جاڭا ەنەرگيا كوزدەرىمەن جۇرەتىن اۆتوموبيلدەر سالاسىنا ماماندار دايارلاۋعا، وقىتۋشىلار تاجىريبەسىمەن الماسۋعا جانە تاجىريبەلىك وقىتۋ بازالارىن قۇرۋعا باعىتتالعان. باستاما قىتاي مەن قازاقستان اراسىنداعى كاسىپتىك ءبىلىم بەرۋ بايلانىستارىن نىعايتىپ، كولىك سالاسىنا قاجەتتى بىلىكتى كادرلار دايارلاۋعا مۇمكىندىك بەرەدى.
قازۇۋ ستۋدەنتتەرى حافيز شيرازيدىڭ عازالدارىن پارسى تىلىندە وقىدى - ParsToday
12-قازاندا قازاقستان رەسپۋبليكاسى ۇلتتىق كىتاپحاناسىندا پارسى پوەزياسىنىڭ كورنەكتى وكىلى حافيز شيرازيدىڭ شىعارماشىلىعىنا ارنالعان ادەبي-پوەزيالىق كەش ءوتتى. ءىس-شارانى ۇلتتىق كىتاپحانانىڭ «الەم ادەبيەتى» ءبولىمى جانىنداعى يران بۇرىشى مەن يران يسلام رەسپۋبليكاسىنىڭ الماتىداعى باس كونسۋلدىعى بىرلەسىپ ۇيىمداستىردى، دەپ جازدى ParsToday اقپارات اگەنتتىگى.
يراندىق اقپارات اگەنتتىگىنىڭ مالىمەتىنشە، كەش بارىسىندا اقىننىڭ ءومىرى مەن شىعارماشىلىعى، پارسى كلاسسيكالىق ادەبيەتىندەگى ورنى جانە پوەزياسىنىڭ كوركەمدىك ەرەكشەلىكتەرى تانىستىرىلدى. ءال-فارابي اتىنداعى قازۇۋ شىعىستانۋ فاكۋلتەتىنىڭ ءۇشىنشى كۋرس ستۋدەنتتەرى حافيزدىڭ عازالدارىن پارسى تىلىندە وقىدى. ءىس-شاراعا ۇلتتىق كىتاپحانا ديرەكتورى عازيزا نۇرعاليەۆا، يراننىڭ الماتىداعى باس كونسۋلى سونا احمادي، مادەني ىستەر جونىندەگى اتتاشە موحامماد ماسۋد سادەعي، سونداي- اق وقىتۋشىلار مەن ستۋدەنتتەر قاتىستى. كەشتىڭ ماقساتى — پارسى ادەبي مۇراسىن ناسيحاتتاۋ جانە قازاقستان مەن يران اراسىنداعى مادەني بايلانىستى نىعايتۋ ەكەنى ايتىلادى.
اۆتورلار
بەيسەن سۇلتان
