وكسفورد ستۋدەنتتەرى قازاق ءتىلىن ۇيرەنەدى
الەمگە ايگىلى وكسفورد ۋنيۆەرسيتەتى ستۋدەنتتەرى مەن وقىتۋشىلارىنا قازاق ءتىلىن ۇيرەتۋگە نيەتتى. بۇل - ءبىزدىڭ انا تىلىمىزگە قىزىعۋشىلىق تانىتىپ وتىرعان ۇلى بريتانياداعى العاشقى جوعارعى وقۋ ورنى، دەپ حابارلايدى Kazinform.

لەيلا نادجافزادا - وكسفورد ۋنيۆەرسيتەتى جانىنداعى «ءبىر ءسوز» باستاماسىنىڭ ديرەكتورى. ول قازىر قازاق ءتىلىن ۇيرەنىپ ءجۇر. باستاما دەپ مۇندا ۋنيۆەرسيتەت قارجىلاندىراتىن، ءبىراق اكادەميالىق بىلىمگە جاتپايتىن جوبالاردى ايتادى. الداعى ۋاقىتتا لەيلا سەكىلدى ستۋدەنتتەر مەن وقىتۋشىلار دا قازاق ءتىلىن وقىماق. قازىر دايىندىق جۇمىستارى باستالىپ كەتتى.
«ءبىز احمەت بايتۇرسىن ۇلى اتىنداعى ءتىل ءبىلىمى ينستيتۋتىمەن تىعىز بايلانىس ورناتىپ، قازاق ءتىلىن وقىتۋ ادىستەمەلەرىن مەڭگەرۋدەمىز. وكسفورد ۋنيۆەرسيتەتى قازاقشا ۇيرەتەتىن ۇلىبريتانياداعى العاشقى وقۋ ورنى بولعالى تۇر»، - دەيدى وكسفورد ۋنيۆەرسيتەتىنىڭ جانىنداعى «ءبىر ءسوز» باستاماسىنىڭ ديرەكتورى لەيلا نادجافزادا.

ۇلى دالا ەلىنىڭ تىلىمەن قاتار، تاريحى، بۇگىنى جانە بولاشاعى تۋرالى بىلگىسى كەلەتىن وكسفوردىقتار كوپ. ولارعا قازاقستاننىڭ ۇلى بريتانياداعى ەلشىسى ارنايى ءدارىس وقىدى. ماعجان ءىلياسوۆ وكسفورد يسلام تانۋ ورتالىعىندا ەلىمىزدىڭ ماڭىزدى تاريحي كەزەڭدەرىنە توقتالىپ، جەتكەن جەتىستىكتەرى تۋرالى باياندادى. تولەرانتتىلىق ۇلگىسىن تانىتقان كوپ ۇلتتى جانە كوپكونفەسسيالى قازاقستان تۋرالى ايتىپ بەردى.

«ءبىزدىڭ ورتالىق قازاقستانمەن بايلانىس ورناتۋعا مۇددەلى. وكسفورد جۇرتشىلىعى ەلدەرىڭىزدىڭ تاريحىنان بولەك تىڭ اقپاراتتارمەن دە تانىسقىسى كەلەدى. ەلشى بىزگە قازاقستاننىڭ وركەنيەتتىڭ دامۋىنا قوسقان ولشەۋسىز ۇلەسى تۋرالى ەسكە سالدى. وتكەنىنەن بولەك، بۇگىنگى تىنىس- تىرشىلىگى تۋرالى دا اڭگىمەلەدى. سىزدەرمەن ەكونوميكا، ءبىلىم سالالارىنداعى بايلانىستاردى نىعايتىپ، بولاشاققا بىرگە جوسپار قۇرۋ وتە ماڭىزدى»، - دەيدى وكسفورد يسلام تانۋ ورتالىعىنىڭ ديرەكتورى احماد نيزامي.

كەزدەسۋ XVI- XIX عاسىرلاردا ەۋروپالىق جانە امەريكالىق زەرتتەۋشىلەر جاساعان قازاق مەملەكەتى كارتالارىنىڭ كورمەسىنە ۇلاستى. ەكسپوزيتسيا ورتا عاسىرلاردا ءومىر سۇرگەن شەتەلدىك عالىمداردىڭ ءبىزدىڭ ايماق تۋرالى ويلارىنان حابار بەرەدى. بۇل كۇنى وكسفوردتىڭ اكادەميالىق ورتاسى، ەكسپەرتتىك قاۋىمداستىعى جانە بيزنەسمەندەرى وتكەنگە ساياحات جاساۋعا مۇمكىندىك الدى.
ايتا كەتەيىك، وكسفورد - دۇنيەجۇزىندەگى ەڭ كونە، ءارى رەيتينگىسى ەڭ جوعارى ۋنيۆەرسيتەتتەردىڭ ءبىرى. مۇندا الەمنىڭ 140 مەملەكەتىنەن كەلگەن 26 مىڭعا جۋىق ستۋدەنت ءبىلىم الادى. سونداي- اق وقۋ ورنىندا قازاق تىلىنەن وزگە 11 ءتىل وقىتىلادى.
اۆتور
عالىمجان قارامان ۇلى