نوبەل لاۋرەاتتارىنىڭ قولتاڭباسى بار تەلەسكوپ قازاقستانعا تابىستالدى
استانا. KAZINFORM - مارتەبەلى مەيماندار Alem.ai حالىقارالىق جاساندى ينتەللەكت ورتالىعىن ارالادى. پرەزيدەنت قاسىم-جومارت توقايەۆقا، بەلگيالىقتار كورولى فيليپپ پەن پاتشايىم ماتيلداعا مۋزەي ەكسپوزيتسياسى، روبوتتى تەحنيكا ايماعى جانە ج ي- كينوتەاتر مۇمكىندىكتەرى تانىستىرىلدى، دەپ حابارلايدى اقوردانىڭ باسپا ءسوز قىزمەتى.
قۇرمەتتى قوناقتارعا Alem.ai ورتالىعىن دامىتۋدىڭ ۇزاقمەرزىمدى ستراتەگياسى، TUMO Astana ءبىلىم بەرۋ باعدارلاماسى، سونداي-اق قازاقستان-بەلگيا بىرلەسكەن جاساندى ينتەللەكت جانە ماتەماتيكا زەرتحاناسىنىڭ جۇمىسى تۋرالى مالىمەت بەرىلدى.
زەرتحانادا NeuroLearn (ج ي، نەيروعىلىم مەن بەيىمدەپ وقىتۋ سالالارىنداعى زەرتتەۋلەر) جانە ParkScreen (پاركينسون اۋرۋىن الدىن الا انىقتايتىن ج ي سكرينينگ ادىستەرى) سەكىلدى باستامالار قولعا الىنعان.
ءىس-شارا بارىسىندا گەنت ۋنيۆەرسيتەتىنىڭ اتىنان قازاقستاننىڭ تالانتتى وقۋشىلارى مەن ستۋدەنتتەرىنە تەلەسكوپ تابىستالدى.
تەلەسكوپتا نوبەل سىيلىعىنىڭ فيزيكا سالاسى بويىنشا لاۋرەاتتارى فرانسۋا ەنگلەردىڭ، گەرارد ’ت حووفتتىڭ جانە ميشەل مايوردىڭ، سونداي-اق بەلگيالىق استروناۆت فرانك دە ۆيننەنىڭ قولتاڭباسى بار.
بۇدان بۇرىن توقايەۆ پەن كورول فيليپپ قازاقستان-بەلگيا ىسكەرلىك كەڭەسىنىڭ ءتورتىنشى وتىرىسىنا قاتىسقانىن جازعانبىز.
