و. بەكتەنوۆ مەكتەپتەردە ءبىرىڭعاي تاماقتانۋ ستاندارتىن قابىلداۋدى تاپسىردى
استانا. قازاقپارات - ەلىمىزدە ءبىرىڭعاي تاماقتانۋ ستاندارتىن ازىرلەپ، قابىلداۋ كەرەك. ولجاس بەكتەنوۆ ۇكىمەت وتىرىسىندا وقۋ-اعارتۋ، دەنساۋلىق ساقتاۋ مينيسترلىكتەرىنە وسىنداي تاپسىرما بەردى، دەپ حابارلايدى 24kz.
جيىندا باستاۋىش سىنىپ وقۋشىلارى مەن از قامتىلعان وتباسىلاردان شىققان بالالاردى مەكتەپتە تەگىن ىستىق تاماقپەن قامتاماسىز ەتۋ ماسەلەلەرى قارالدى.
ولجاس بەكتەنوۆ بالالارعا بەرىلەتىن تاماقتىڭ ساپاسى مۇقيات تەكسەرۋدى قاجەت ەتەتىنىن اتاپ ءوتتى. ال وقۋ-اعارتۋ جانە قارجى مينيسترلىكتەرىنە مىندەتىن ادال اتقارماعان جەتكىزۋشىلەر ءتىزىلىمىن اۆتوماتتاندىرىپ، جاۋاپسىز مەردىگەرلەردىڭ اكىمشىلىك جاۋاپكەرشىلىگىن بەلگىلەۋ جونىندە شارالار قابىلداۋ تاپسىرىلدى.
«اكىمدىكتەر مەكتەپ اسحانالارىنىڭ ماتەريالدىق-تەحنيكالىق بازاسىن جاقسارتۋ ماسەلەسىن ەرەكشە باقىلاۋعا الۋى كەرەك. سونىمەن قاتار ينفلياتسيا دەڭگەيىن ەسكەرە وتىرىپ، تاماقتانۋ قۇنىن قايتا ەسەپتەۋ جانە وعان قوسىمشا قاراجات ءبولۋ قاجەت»، - دەدى ۇكىمەت باسشىسى.
24.kz
