تىيىم سالىنعان ءدىني ماتەريالداردى تاراتقان اتىراۋلىق 5 جىلعا سوتتالدى
اتىراۋ. KAZINFORM - اتىراۋدا ينتەرنەت جەلىسىندە تىيىم سالىنعان ءدىني ماتەريالداردى تاراتقان ازامات 5 جىلعا باس بوستاندىعىنان ايىرىلدى.
اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە قاراعاندا، 2023-جىلعى ماۋسىمدا كۇدىكتىنىڭ تەرىس ءدىني اعىمدى ناسيحاتتاپ جۇرگەنى انىقتالعان.
«ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى 39 جاستاعى اتىراۋلىق ەر ادامنىڭ 2022 -جىلدان بەرى ينتەرنەت رەسۋرستارىندا تەرروريزمدى، ءداستۇرلى ەمەس ءدىندى ناسيحاتتايتىنى انىقتالدى. سوتقا دەيىنگى تەرگەۋ جۇرگىزۋ كەزىندە كۇدىكتىنىڭ ۆكونتاكتە الەۋمەتتىك جەلىسىندە ءدىني ەكسترەميزم تۋرالى ماتەريالداردى اشىق جاريالاپ، تىيىم سالىنعان ءدىني ۋاعىزداعى اۋديولاردى تاراتىپ كەلگەن. قازاقستان رەسپۋبليكاسىنىڭ اۋماعىندا ينتەرنەت رەسۋرستاردا جاريالاۋعا، باسىپ شىعارۋعا جانە تاراتۋعا تىيىم سالىنعان ءدىني ەكسترەميستىك باسپا ماتەريالدارىن الەۋمەتتىك جەلىلەر ارقىلى تاراتقانى دالەلدەندى. مۇنداي باسپا ماتەريالداردى 2014-جىلى قىزىلوردا قالالىق سوتىنىڭ جانە 2018-جىلى جەتىساي اۋداندىق سوتىنىڭ شەشىمىمەن ەل اۋماعىندا تاراتۋعا تىيىم سالىنعان» دەپ حابارلادى دەپارتامەنتتىڭ باسپا ءسوز قىزمەتى.
اتالعان دەرەكتەر بويىنشا 39 جاستاعى ەر ادام ءوزىنىڭ كىناسىن تولىقتاي مويىنداعان. سوت شەشىمىمەن وعان ق ر قىلمىستىق كودەكسىنىڭ 256-بابىنىڭ 2-بولىگىمەن (تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ) 5 جىلعا باس بوستاندىعىنان ايىرۋ جازاسى تاعايىندالدى.
ەسكە سالا كەتەلىك، بۇدان بۇرىن سينتەتيكالىق ەسىرتكى ساتقان 43 جاستاعى اتىراۋلىق 10 جىلعا سوتتالعانىن جازعان ەدىك.
اۆتور
جولداسبەك شوپەعۇل
